Wir Cun von gotz gnaden abt des gotzhus ze sant Gallen¹, daz ân alles mittel zugehort dem stul ze Rom, sant Benedicten ordens in Costentzer bistum veriehen vnd tunt kunt allermenglichem mit disem brief, dz fur vns kam der beschaiden Walti Hornli vnd offnot vor vns, dz er an barem gelt nach sinem nutz vnd willen gantzlich ingenomen vnd enpfangen habi von vnserm koch Rudin Wolfli, der ôch do vor vns zegegen stund, aht pfund pfenning guter vnd genamer Costentzer muns, vnd habi im vnd sinen erben dar vmb wissentklich vnd wolbedaht fur sich vnd sin erben mit sines gemainders zu den nachgeschriben akkern Cunrat Studeruzz willen, der ôch do vor vns zegegen stund vnd sinen willen vnd gunst hier zu gab, ains vngeuarlichen ewigen koffes ze koffent geben sinen halbtail vnd alli sini rechten an den nachgeschriben akkern vff Wiler veld² gelegen mit allen rechten gewonhaiten vnd zugehorden, die von vns vnd vnserm gotzhus sin vnd des egenanten Cunrat Studenrussen gemain lehen warint. Des ersten ain akker ze dem Mos³ gen Bromshouen⁴ vshin gelegen stosset ainhalb an Walti Tintzen salgen akker vnd anderthalb an Hansen Arnoltswiles salgen akker vnd stosset ôch an das Mos, desselben akkers sint zwo jucharten vnd gehort der zehend wider dar in, item ain akker vff der Ow³ gelegen bi dem nussbom gelegen stosset ainhalb an Hans Sennen akker vnd anderthalb an ainen akker, den ettwenn Arnoltswile salig buwt, desselben akkers ist ain juchart, vnd ain akker an Wilberg⁵ gelegen, der ettwenn Vli Lemans salgen waz, da obnan abher stosset Cuni Moggwiles salgen akker vnd vndnan daran stosset Hansen Brakers salgen akker, desselben akkers sint vier jucharten, vnd batt vns derselb Walti Hornli ernstlich, dz wir sinen halbtail vnd alli sini recht der ietzgenanten drier akkren von im vffnemen woltint vnd die ze lehen lihen woltint dem egenanten Rudin Wolflin. Dar vmb erhorten wir gnadklich sin ernstlich bett vnd nament die selben akker halbe vnd alle rechtung, so er dar an iendert hatt, von im vff an vnser hand vnd haben dieselben drie akker mit allen rechten nutzen gewonhaiten vnd zugehorden vnd alli die rechtung, so der obgenant Walti Hornli an denselben akkern iendert hatt, gelihen dem obgenanten Rudin Wolfli ze lehen vnd lihent im ôch ietz wissentklich mit disem brief, waz wir im von rechtz wegen dar an lihen sont ald mugent, doch vnserm gotzhus vns vnd vnsren nachkomen an allen vnsern rechten nutzen vnd guten gewonhaiten vnschadlich. Vnd nach dem do verzech vnd entwert sich do vor vns der obgenant Walti Hornli fur sich vnd alle sin erben gegen dem obgenanten Rudin Wolfli vnd gegen allen sinen erben aller rechtung vordrung vnd ansprach, so er ald sin erben zu den obgenanten akkern mit aller zugehort ie gehatten ald gehaben mohtint in dehain wis ald weg, so ieman erdenken kan, ân geuard. Vnd lobt ôch do vor vns fur sich vnd alle sin erben, der obgenanten akkren mit aller zugehord halber vnd dis redlichen koffs in aller vorgeschriben wis des obgenanten Rudi Wolflis vnd siner erben gen allermenglichem allenthalben, wenn wa vnd wie dikk si des notturftig sint vnd dar vmb mit dem rechten von ieman vffgetriben ald angesprochen wurdint, recht weren ze sint nach dem rechten vnd nach des landes sitten vnd gewonhait ân geuard. Des alles ze warem offem vrkund.