Dem edeln hoch erbornen minem genedigen herren graf Rudolf von Hapspurg¹ enbut ich Albrecht Vogt von||
Vtzna² minen willigen dienst bereit ze allen vwern sachen. Genediger herr, ich tun vwer erwirdikeit ze wissen||
das ich von vch^a ze lehen han gehebt dritte halb iuchart reben sint gelegen vf Rekolter bul³ bi Golpach⁴ an dem Zurich se⁵||
vnd hus vnd hofstat mit aller zu gehort, die selben reben vnd das lehen mit aller zu gehort ich vch send vnd vf gib mit disem gegenwrtigen brief fur mich vnd alle min erben vnd nachkomen mit der bescheidenheit, das ich vwer erwirdekeit bitte flisseklich vnd ernstlich, das ir die selben reben hus vnd hofstat mit aller zu gehord lihent vnd gebent dem erbern geistlichen herren bruder Wernher Schurer comendur des huses ze Bubikon sant Iohans ordens⁶ vnd dem selben hus vnd den brudern des selben huses vnd allen iren nachkomen mit solicher ehafti vnd sicherheit, das si vnd alle ir nachkomen da ran habent siient, wan ich inen och die selben reben hus vnd hofstat mit aller zu gehort geben han vnd och gib mit disem brief luterlich dur got vnd vmb ein libding, das si mir vnd miner elichen wirtinnen dar vmb geben sont, als der brief⁷ wol wiset, den si mir dar vmb geben hant, vnd verzich mich och fur mich vnd alle min erben vnd och nachkomen alles rechten vordrung vnd ansprach, so ich oder dekein min erb oder nachkom zu den selben reben hus vnd hofstat vnd zu aller zu gehord, als ich si vntz har gehebt han, iemer mer gewinnen mocht mit keinen sachen, vnd lob och fur mich vnd alle min erben, das war vnd stete ze han vnd da wider niemer ze tun noch schaffen getan mit keinen sachen, da mit der vorgenant comendur vnd das vorgeschriben hus vnd alle ir nachkomen ze Bubikon an den selben reben hus vnd hofstat mit aller zu gehord iemer mer nu oder har nach bekrenket gesumet oder geirret werden in dekein weg, an alle geuerde. Vnd des vnd aller dir vorgeschriben dingen ze einem waren vrkund so gib ich der vorgenant Albrecht Vogt disen brief besigelt mit minem eigen ingesigel. Dis beschach vnd wart och diser brief geben, do man zalt von gottes geburt druzehen hundert vnd sibenzig iar, dar nach in dem dritten iare, vf den meiien tag.