Nos frater Rudolfus dei gratia Syriquensis episcopus vniuersis Christi fidelibus presentem paginam inspecturis salutem in omnium saluatore. - Quaslibet mentes fidelium cupientes ad pie deuocionis opera et deuotarum orationum studia invitare et monasterium beate virginis in Altovado congruis honoribus preuenire, nos de omnipotentis dei misericordia et beatorum apostolorum Petri et Pauli auctoritate confisi omnibus vere penitentibus confessis et contritis, qui ad predictum monasterium in dominica aduentus domini in natiuitate domini in circumcisione in epyphania domini in cena domini parasceve pasche et pentecosten in ascensione domini et in omnibus festiuitatibus beate Marie virginis insuper in die beate Marie Magdalene et beati Marci ewangeliste et in die beati Johannis baptiste necnon in festiuitatibus omnium apostolorum et in anniuersario dedicacionis, causa deuocionis confluxerint oraturi, vel ad ipsum de bonis suis aliquid dederint, vel in morte legauerint, de duobus altaribus, que in abside dicti monasterii domino adiuuante dedicauimus, videlicet in honore beati Johannis baptiste et in honore beatorum apostolorum Petri et Pauli, de vno quoque altari singulariter, de iniuncta eis pena quadraginta dies criminalium et centum venialium misericorditer in domino relaxamus. In cuius rei testimonium presentem litteram curauimus nostri sigilli munimine consignari. - Datum anno domini M^o CCC^o xx^ovj^o in die beatorum martyrum Fabiani et Sebastiani.

Source Fulltext: PANGERL, Stift Hohenfurth (=FRA II/23, Wien 1865) S. 72-73