Ich Wusk von Harach vergich vnd tuen chund alle den, di disen prief lesent oder horent lesen, daz mier der erwer herr abt Bartolome dem got genad vnd di samnung gemain ze Hohenfuert in dem chloster gelten scholden tzwai hundert phunt alter Wienner phenning; vm daz selbe gelt satzten si mier ze phant iern weingarten, der do leit an dem Sauperg vnd genant ist "in dem gereud“, vnd gaben mier dar vber einen prief versigelten mit dez vor genantes hern dez abtes insigl von Hohenfuert vnd mit hern Duerings insigl, der ze den selbe zeeiten pergmaister waz vber den selben weingarten. Den selben prief den hab ich vlarn; wer daz daz den selben prief iemant meiner gerben oder ander iemaat funden hiet oder noch fund, vnd den chumftichleichen her fuer zaigen wold den vorgenanten hern ze Hohenfuert ze schaden vm daz vor geschriben gelt, so mag den selben hern von Hohenfuert der selbe prief nichtiz nicht geschaden, noch chain ansprach hintz in geprueven vm daz vor genant gelt, wan si mich dez selbe geltez schan vnd erleich habent verricht an allen chrieg. Daz daz allez, daz nu vor geschriben ist, wor vnd stet sei, dar vber so gib ich den vor genanten hern von Hohenfuert disen prief zu einem gewissen vrchund versiglt mit meinem insigl. Diser prief ist gegeben do von Christes gepuerd ergangen warn dreuczehen hundert jar dar nach in dem suben vnd tzwaingistetn jar an dez heiligen hern sand Veites tag.

Source Fulltext: PANGERL, Stift Hohenfurth (=FRA II/23, Wien 1865) S. 73