Cum ad bene faciendum omnibus simus debitores, pocius tamen illis benefacere tenemur, qui nobis familiares existunt. Hinc est, quod nos Petrus de Rosenberch summus regni Bohemie camerarius et predecessores nostri monasterii monachorum ordinis Cistarsiensis sub regula sancti Benedicti nocte dieque deuote militancium in Altovado fundatores existentes notum facimus vniuersis presentes perpetue inspecturis, quod nos bona deliberacione maturo consilio consensu ac beneplacito omnium heredum nostrorum prehabito contulimus et exnunc assignamus et resignamus perpetue possidenda dicto monasterio in Altouado villam nostram Nesselbach cum aratura nostra atque pomerio nostro eidem ville adiacente, cum omnibus iuribus atque agris cultis et incultis pratis pascuis aquis aquarumue decursibus rubetis montibus planiciebus emolimentis (sic) censibus prouentibus aliisque cunctis vtilitatibus et pertinenciis vniuersis, que nunc ibi sunt aut fieri poterunt in futurum, quocunque nomine censeantur, ipsi monasterio et ad usus monachorum ibidem deo ac beate virgini incessanter deseruiencium et sex infirmorum perpetue in hospitali sepedicti claustri connutriendorum, tali condicione adiecta, quod dictis infirmis necessaria omnia tam victus quam amictus deuocius ac perhenniter porrigantur consuetudinem hospitalis nostri in Chrumpnaw in omnibus obseruando, excluso dumtaxat denario, qui pro speciali recreacione singulis diebus in Chrumpnaw infirmis porrigitur. Insuper volumus ac ordinamus et ratum perpetue habere volumus, vt anniuersarius noster in sepedicto claustro nostro singulis annis post obitum nostrum sollempnius peragatur sic videlicet, vt vigilie maiores ad vesperam decantentur, et in crastino dominus abbas, nisi legittima causa propediente missam summam celebret, reliqui vero sacerdotes, quodquod (sic) fuerint, missas dicere eodem die non negligant pro anima nostra ac omnium predecessorum nostrorum. et omnium fidelium defunctorum, vt tenentur; eodem quoque die prandium cum pitaneiis in refectorio singulis laucius porrigatur, ducentis quoque pauperibus eodem die victus pro vna vice tribuatur, vnicuique vnum denarium Wyennensis vel Patauiensis monete errogantes, iniungendo eisdem pauperibus, vt anime nostre ac animorum predecessorum nostrorum et omnium fidelium defunctorum in suis oracionibus memorentur. Ceterum hortamur et rogamus, vt omnes monachi tam clerici quam layci singulis diebus in suis specialibus deuocionibus ob respectum diuine remuaeracionis nostri dignentur perpetue memorari. Hoc autem faciendum perpetue sit conscienciis abbatis et prioris loci predicti committimus, quod si aliquid de prescriptis obmiserint, quatenus sciant, se penam qua nos ratificarunt incurrisse et racionem de hoc in die dei districti judicii reddituros. Et vt prescripta robur perpetue firmitatis sorciantur, ideo iussimus presentes conscribi et eas sigilli nostri munimine roborari. Insuper ego Petrus junior de Rosenberch Pragensis Olomucensis Patauiensis ecclesiarum canonicus hec appensione sigilli mei ratifico ac protestor. Acta sunt hec et data in Chrumpnaw. Anno domini millesimo trecentesimo quadragesimo septimo, in die sancti Egidii confessoris.

Source Fulltext: PANGERL, Stift Hohenfurth (=FRA II/23, Wien 1865) S. 88-89