Ego Nicolaus de Swietlik recognosco tenore presencium vniuersis, quod bona deliberacione et maturo amicorum meorum prehabito consilio et consensu villam meam dictam Okol quatuor laneos in se continentem, quam a fratribus meis Leonhardo videlicet et Jescone de Swietlik comparaueram pro septuaginta sexagenis, domino Thome reuerendo abbati et toto conuentui de Altovado rite et rationabiliter pro quinquaginta sex sexagenis grossorum Pragensium, quas ab eisdem plene et integre me percepisse fateor, duxi vendendam cum agris cultis et incultis pratis pascuis montibus planis siluis rubetis aquis aquarumve decursibus censibus dominio proprietate necnon aliis suis pertinenciis et fructibus vniuersis, que nunc ibi sunt vel fieri poterint in futurum, in quibuscumque rebus consistant, aut quocumque nomine censeantur. Valorem vero qui dictas quinquaginta sex sexagenas excrescit, in remedium anime mee et omnium meorum predecessorum dicto monasterio et fratribus pie largiendo promittens bona et sincera fide fraude et dolo remotis vna cum fideiussoribus meis Chwalone de Swietlik et Petro de Sestow prefatam villam cum pertinenciis suis vniuersis qualibet remota postergacione contra quamlibet personam, cuiuscumque status fuerit, iure terre iuxta regni Bohemie approbatam et hactenus obseruatam consuetudinem disbrigare; quod si quoquo modo facere neglexerimus, obstagium debitum in ciuitate Chrumpnaw dominorum de Rosenberch ad hospitem per dominum abbatem vel conuentum predictos nobis deputatum tenebimur in personis propriis obseruare, quousque per nos antedicta villa ipsis sufficienter fuerit disbrigata. In cuius rei testimonium sigillum meum vna cum sigillo Leonhardi de Swietlik fratris mei presentibus duxi appendendum. Insuper ego Leonhardus predictus de Swietlik predicta protestor et recognosco et in euidens testimonium sigillum meum presentibus duxi appendendum. Datum Chrumpnaw die ascensionis domini millesimo trecentesimo quadragesimo nono.

Source Fulltext: PANGERL, Stift Hohenfurth (=FRA II/23, Wien 1865) S. 96-97