Ich Vlreich hern Johans sven von Schzawflern, dem got genadt, vergich vnd tven chvnt offenbar an dysem prief allen den, die yn sehent lesen oder hoerent lesen, dye nv lebent oder hernach chvemftig synt, daz meyn egenanter vater Johan von Schzawflern gelten scholt der erbern sammvng des clasters cze Hohenfurt fvemf phvnt Pazzawer phenning vmb eyn ebeges selgeraet seym oehem Pescheyn vom Hatslabs; dar czv hat er geschaft an seynem todpett fvemf phvnt Pazzawer phenning den vorgenanten hern cze Hohenfurt seyn selbes sel czv aynem rechten vnd ewygen selgeraet mit meym gveten wyllen mit gvnst vnd mit rat aller venser vrevnt. Vnd dye czehent phvnt hat er yn geschaft avf vensern czwayn mvelen, die da lygent da czem Saeherleyns; dye erst dyent ayn halbs schok groser phenning Prager mvencz, dye ander dreysich Pazzawer. Von dem phunt schzvellen die egenanten hern von Hohenfvrt alle jar begen ayn jartag mit ayner ewygen bedaechtnvezz meyns vaters sel vnd seynes oehems nach yrs ordens gewanheyt vnd mit aynem mal der gemayn in daz refent. Waer aver das, daz ich egenanter Vlreich den oftgenanten herren von Hohenfurt czehen phvnt phenning gaeb, wan daz geschae, so schzvellen dye vorgenanten mvel wyder an mych gevallen als ee. Vnd schzvellen dye hern vmb dye czehen phvnt ayn phvnt gelczs chawfen, da meynes vater sel vnd seynes oehems bey gedacht werd ewygleych. Daz dye red all staet vnd vnczeprochen veurbaz beleyb an allen chryeg, dar vmb gib ich yn dysen prief versygelten mit meym ingsygel mit Vlreichs von Drochaw vnd mit Benyschzs von Rosenberch ingsygeln, dye dyrr sach mit andern pidern levvten geczevgen synt. Der prief ist gegeben da von Christes gepvrd ergangen warden drewczen hvndert jar dar nach yn dem nevn vnd vyerczygistem jar an sand Ceczilgen tag.. ,

Source Fulltext: PANGERL, Stift Hohenfurth (=FRA II/23, Wien 1865) S. 97-98