Ich Mychlis Vlreichs sun vom Guetemwasser, dem got genad, vergich vnd tuen chvnt offenbar an dem prief allen den, di in sechent lesent oder horent lesen, daz der erber conuent des chlosters ze Hohenfuert mier geliehen hat auf meinen halben hof, den ich han datz dem Guetemwasser, achtzk vnd drev phunt Passawer phenning, also beschaidenleich daz si den eins, daz iar achtzk phenning dienst an sand Georgen tag viertzk vnd an sand Mychels tag viertzk, innemen schullen. Vnd wer daz, daz ich in di egenanten achtzk vnd drev phunt phenning vor sand Mychels tag viertzehen tag wider chert, so ist mein vorgenanter halber hof wider mein als ee. Tet ich des nicht, so schullen si in dann furbas inn haben in alle dem nustz vnd gewer, als ich in vnd mein vorvodern inn gehabt haben, an allen chrig an allev widerredd vnd an allev ansprach ewichleich. Daz di redd stet gantz vnd vnzeprochen weleib, darum gib ich in den prief versigelten mit hern Ludweiges purgrauens insigels ze Rosenberch, wand ich aygens insigels nicht het, der mit sant (sic) dem Qualn von Chirichslag vmb di sach mein purgel warden ist, vnd ein warr gezevg mit andern pidern levten. Der prief ist gegeben do von Christes gepuerd ergangen warden ||
drevtzehenhundert jar dar nach in dem fumftzkistem jar an des heiligen herren sand Lamprecht tag.

Source Fulltext: PANGERL, Stift Hohenfurth (=FRA II/23, Wien 1865) S. 98-99