Ego Katherina relicta olym Vlrici dicti Schauffler de Sacherleins ad vniuersorum noticiam volo peruenire tenore presencium publice protestans, quod ego animo deliberato et sano meorum liberorum ex me per ipsum Vlricum procreatorum et amicorum ipsorum ad hoc accedente consensu pariter et assensu honorabilibus et religiosis viris dominis Henrico abbati totique conuentui monasterii in Altovado ordinis Cistercyensis quinque sexagenarum minus octo grossis cum dimidio redditus necnon curiam, in qua cum dictis meis liberis residenciam feci personalem, in prefata villa Saherlins sitos seu sitam vere vendicionis tytulo cum omnibus et singulis juribus vtilitatibus consuetudinibus fructibus agris cultis ac incultis metis terminis pratis pascuis siluis rubetis aquis riuis aquarumque decursibus ac pertinenciis vniuersis, quibuscunque censeantur nominibus, vendidi pro centum et octo sexagenis grossorum denariorum Pragensium, quas pecunias ab ipsis dominis abbate et conuentu me percepisse fateor integraliter et complete finemque et quittacionem de solucione dictarum pecuniarum eis facio et pactum de vlterius ab ipsis non petendis. Totum jus quod michi et dictis meis liberis in prefatis redditibus et curia competebat seu competere posset, quouismodo in futuro in supradictos dominos abbatem et conuentum transfero et transfundo, per ipsos huiusmodi redditus et curiam habendos tenendos possidendos obligandos et vendendos hereditarie pacifice et quiete et alias ipsos conuertendos, prout ipsis videbitur expedire. Volens itaque prenominatos dominos abbatem et conuentum in dicta vendicione certos reddere et securos proinde honestos viros Swatomyrum de Zahorczi fratrem meum germanum, dominum Marquardum militem de Porzyessin protunc purcrauium in Rosmberch, Rinhardum de Brzyezie, Nycolaum de Welehlaw et Nycolaum de Bylcz, meos occasione dictorum reddituum et curie constituo exbrigatores et disbrigatores in hiis scriptis. Nos quoque Swatomirus Marquardus Rynardus Nycolaus et Nycolaus suprascripti per presentes recongnoscimus (sic) vniuersis, nos esse exbrigatores et disbrigatores reddituum et curie iamdictorum, eosque prefatis dominis . . abbati et conuentui a quolibet homine ipsos in eisdem aut eorum occasione inpedicione uel inpedire volente jure terre Bohemie exbrigare et disbrigare bona nostra fide promittimus excepcione qualibet procul mota. Alioquin si requisiti id facere non curaremus, extunc sine quauis renitencia et contradicione ipsis dominis in bonis nostris propriis in tercia parte plus, quam valor dictorum reddituum et curie se extendit, condescendere tenebimur et assignare. In quorum omnium euidens testimonium nobilis domini Petri de Rosmberch ac nostra propria sigilla presentibus sunt appensa. Acta et data sunt hec anno domini millesimo trecentesimo sexagesimo secundo in die beati Michaelis archangeli.

Source Fulltext: PANGERL, Stift Hohenfurth (=FRA II/23, Wien 1865) S. 124-126