Ich Nyclo Hainreichs svn dez Pogners von Piberslag, dem got genad, veriech offenbar vnd tvn chvnt mit disem prief allen levten, di in sehent oder hoerent lesen, di nv lebent oder hernach chvernftig sint, daz ich mit verdachtem mvet mit gvetem willen meyner hausvrawen, Margreten vnd mit gvnst vnd mit veraintem rat aller meyner vrewnt zv den zeyten, do ich iz wol tven mocbt, vntwungenleychen verchavft hab recht vnd redleychen gancz vnd gar ewigleychen an allew ansprach den erbern hern dem apt vnd der sammvng gemain dez chlosters ze Hohenfvert zway schok zyns vnd geltes, die ich hab do zvm Seherleyns auf vier holden vnd lehen vnd ie daz lehen dient eyn halbes schok grosser Prager phenning zv dien zwier im iar, halbes zv sant Georgen tag vnd halbes zv sant Michels tag, vmb vier vnd zwaynzig schok grosser phenning Prager mvencz, der ich gericht vnd gewert pin gancz vnd gar. Also bescheidenleynchen mit auzgenomem red, daz mir di egenanten erbern hern dvrch besonder lieb genad vnd trewen mit irem gvtern willen gvennen vnd erlavbt haben mir zv vuedrvnng (?), ab ich den vorgeschriben zyns vnd dyenst zway schok mveg ab geloesen, mit meynem aigenhaftigen gvet vnd phenning, mit vier vnd zwaynzig schok grosser phennig zv den weynachten di schirst chvemen, so schol an dem vorgenanten kavf nichtes stet noch gancz seyn. Wer aber daz tan, daz ich den selben zyns vnd dienst zway schok phenning grosser Prager mvencz zv dem egenanten tag nicht loesacht mit meim aigen gvet, so schvellen sich di obgenanten hern der apt vnd di sammvng zv Hohenfvert dez oft genanten zyns vnd gvtez venterwinten vnd ir seyn ewigleychen vrey vnd aigen vnd ledigleychen an allew ansprach, wan iz mey vreyes erb vnd aigen ist vnd meyn rechtes erbtail von meynem egenanten vater. Vnd daz daz egenante gvet zway schok zins vnd dienst zv rechten tegen vnd zv rechter zeit werd richtig vnd auzgericht an aller stat mit allen sachen, sam landez recht ist ze Pehem, an allen krieg an alle ansprach, dar vmb verhais ich egenanter Nyclo vnd der erber man her Marchart von Ostrobsdorf mit gesamter hant vnd mit vensern trewen vnd mit vensern paiden anhangvnden insigeln. Vnd zu eyner ewigen offen zevgnvess vnd vrchvend geb wir disen prief versigelten mit dez erbern ritter ingsigel hern Lvdweygs von Zwetlarn, den wir besunder dar vmb peten haben, daz er seyn ingsigel gelegt hat an disen prief zv eyner gezevgnvezz im an schaden. Diser prief ist gegeben do noch Christes gepverd ergangen waren drevzehen hvndert jar dar nach in dem ayns vnd sechzigstem iar an dem svntag zv mitter vasten.

Source Fulltext: PANGERL, Stift Hohenfurth (=FRA II/23, Wien 1865) S. 121-122