Nos frater Hainricus dictus abbas totusque conuentus monasterii in Altovado ordinis Cysterciensis Pragensis dyocesis uniuersis Christi fidelibus presentibus et futuris liquido per hec scripta presencia profitemur, quod venerabilis prespiter bone memorie dominus Vlricus filius quondam Alberti magistri hospitalis in Libera Ciuitate ob specialem deuocionem gratiam ac amorem, quam erga nos habuit, sue anime in perhenne remedium comparauit emit et donauit nobis et monasterio nostro perpetue possidendos vnam sex agenam census grossorum Pragensium denariorum in villa, que vocatur Sacherleins, prope Reychnawe Tevtunicale, pro sedecim sexagenis grossorum Pragensium et pro quadraginta grossis promptorum denariorum dicte monete, tali specificacione ac condicione adiecta, quod nos et nostri successores omnibus futuris temporibus singulis annis in die sancti Francisci confessoris peragere et obseruare debemus anniuersarium diem predicti Vlrici cum vna speciali missa defunctorum, que legi debet ob salutem anime sue ac cum ceteris religiosis operibus secundum nostri ordinis laudabilem consuetudinem. Et eodem die omni anno in sui memoriam debet ipsi conuentui nostro prouideri in vno prandio in refectorio pro viginti grossis denariorum prefati census, sed residuam partem eiusdem census videlicet quadraginta grossos Pragenses debemus dare et porrigere singulis annis germano prefati domini Vlrici confratri nostro Eberhardo monacho et professo domus nostre tantum vsque ad mortem suam; sed eo mortuo extunc eternaliter porrigi et ministrari debet ipsi congregacioni loco et die quo supra prandium et seruicium de integro et toto suprascripto censu, scilicet de vna sexagena census grossorum Pragensium denariorum. In cuius rei perpetuam memoriam et euidenciam clariorem presentes litteras tradidimus cum sigillorum nostrorum manifesta appensione nostri videlicet ac conuentus nostri munimine roboratas. Datum et actum anno domini millesimo trecentesimo sexagesimo tercio in octaua natiuitatis beate ac gloriose dei genitricis virginis Marie. Nos insuper frater Waltherus dictus abbas in Wilhering supradicti monasterii pater et visitator suppliciter rogati ac precibus inclinati ob maius robur et euidens testimonium onnium et singulorum superius scriptorum, ut semper et vbique illibata et inconuulsa permaneant, de maturo et sano consilio nostrum huic presenti pagine sigillum duximus firmiter appendendum. Datum et actum loco ac die et tempore quo supra.

Source Fulltext: PANGERL, Stift Hohenfurth (=FRA II/23, Wien 1865) S. 127-128