Ich Czasstowoy von Walkunslag ich Prziedslawa sein elich hausfrowe vnd alle vnser erben vergehen vnd tun chunt offenlich mit dem brif allen den di in sehen oder hoern lesen, di nu leben oder hernach kvnftig sind, daz wir mit woluerdachtem muet mit gemaym rat vnd gunst aller unsrer friuent ze der czeit, do wir es wolgetuen moechten, recht vnd redlich verkauffet haben vnsers rechten freys aigen erbs czway pfunt pfenning geldez Wiener muncz, die gelegen sind auf gestiften holden, da di czeit auf gesezzen sind Mixo Martin Phillipp vnd Swacho, der yeglicher aller jar dynet vnd cynset ayn halb pfunt pfening sechczik pfening ze sand Gallen tag vnd sechk pfenning ze sand Joergen tag, in dem dorff ze Walkunslag mit allen den rechten vnd nutczen, als wirs vnd vnser voruodern in nutcz vnd in gewer herbracht vnd inne gehabt haben, dem geystlichen herren pruder Hoygern grabs oerdens dez chloesters ze Hohenfuert nach rat hilf vnd gunst dez aptez vnd dez conuents gemaynleich dazelbs vmb vierczehen schok grozzer Prager pfening, der wir von ym gancz vnd gar verricht vnd gewert sein. Wir haben ym auch die vorgenanten czway pfunt pfenning geldez verkauffet vnd geben in solicher beschaidenhait, daz sy im di weil er lebt nuer ze seiner notdurft, er sey inner lants oder ausser lants, sullen gevallen an all widered, vnd nach seym toed so schullen diselben czway pfunt pfening geldez mit allen den rechten vnd nutczen, als vorgeschriben stet, in dasselb chloester ze Hohenfuert furbas ewikleich gehoern vnd geuallen an allen chrieg irrung vnd widerred. Vnd durch ein pesser sicherhait so globen wir ich vorgenanter Czasstowoy ich Prziedslawa sein hausfrowe vnd all vnser erben, vnd ich Peter vom Troyans ich Marchart von Metlin vnd ich Jesk genant Zwietli von Chirichslag mit gesampter hant vnd vnuerschaidenleich, di vorgenanten czway pfunt pfenning geldez ze freyn vnd entwerren vor allen leuten vnd sein der auch rechter scherm vnd gewer fuer allen chrieg vnd ansprach, als freys aygens recht ist vnd dez landez recht ist ze Behem an allez geverd. Vnd ich egenante Prziedslawa verczeich mich an dem brif gancz vnd gar aller ansprach vnd allez meins tayls, der mich angepurd vnd angehoert von meiner margengab wegen an denselben czwayn pfunt pfenning geldez. Vnd daz dise red also stet vnd vnczebrochen beleib, dez geb wir ich vorgenanter Czasstowoy ich Prziedslawa sein hausfrowe vnd all vnser erben dem vorgenanten pruder Hoygern vnd dem conuent dez chlosters ze Hohenfuert den brif versigelten mit der vorgenanter vnsrer friuent Petreins vom Troyans Marchartz von Metlin vnd Jeskein genant Zwietli von Chirichslag aigen anhangunden insigeln. Wan ich oft genanter Czasstowoy nicht aigens insigels hab, so verpind ich mich Czasstzwoyn mich Prziedslawan sein hausfrawen vnd aller vnser erben dorunder mit voller chraft gar vnd gancz. Der brif ist geben do man von Christez gepurd dreytzehen hundert jar vnd darnach in dem drev vnd sechczigsten jar an sand Matheus abent dez heiligen czwelefpoten vnd ewangelisten.

Source Fulltext: PANGERL, Stift Hohenfurth (=FRA II/23, Wien 1865) S. 128-129