Nos frater Hainricus abbas monasterii in Altovado ordinis Cysterciensis Pragensis dyocesis vniuersis Christi fidelibus liquido presentibus publicamus, quod discretus vir Wernhardus Stainprecher ciuis de Libera Ciuitate noster singularis et fidelis promotor nobis et nostro prenominato cenobio cum suis propriis pecuniis emit et comparauit perpetui census quinque sexagenas grossorum Pragensium denariorum monete publice in villa, que vocatur nominatim Seherleins, sita prope Reichnawe Tevtunicale, non longe distans de foro dicto Strobnitz. Eundem censum predictum in villa prescripta cum vniuersis juribus et fructibus ac prouentibus suis presentibus et futuris, videlicet censibus redditibus stevris emendis robotariis exaccionibus bernis regalibus aut propriis judiciis subuencionibus contribucionibus piscacionibus siluis rubetis pratis aquarumque decursibus metis limitibus pascuis omnibus et singulis, quibuscunque nominibus censeantur, cum viue vocis oraculo rite et racionabiliter ac legittime personaliter constitutus nostra in presencia coram sufficienti testimonio fratrum et seniorum nostrorum conuentualium cum humili et deuota supplicacione sanus suis sensibus cum racione sua perfecta loco hora tempore sibi et nobis conuenienti et opportuno, quo hec de jure licenter et potenter facere et ordinare cum plenaria potestate et voluntate valuit et potuit, cum nostra plenissima voluntate expressa personali et consensu nostro totali sibi et omnium suorum progenitorum perpetuum in remedium libere et absolute fideliter et deuote manifeste testauit cum pleno testamento dedit donauit lagauit pure propter deum nostro laudabili conuentui in Altovado ad officium pitancie perhenniter tollendum possidendum recipiendum recolligendum in vsus proprios et necessarios conuertendum annis singulis perpetuis successiuis seculi temporibus absque cuiusquam viuentis hominis impedimento. Ne igitur nostro collegio monasterii prelocuti in Altovado in futuro tempore in hoc presenti testamento facto rite et racionabiliter aliqua quecunque, quod absit, deo auertente fiat contingat fraus violentia et preiudicium per nos aut per nostros futuros successores abbates iam sepedicti loci vel visitatores nostros qualibet ex causa emergente vndecunque, ideoqne ipsi congregacioni domus nostre prefate in euidens testimonium robur robur (sic) et cautelam presentes paginas tradidimus obseruandas et publicandas, si necesse fuerit, cum nostri sigilli de nostra certa sciencia appensione firmiter et munimine roboratas obnixe humiliter et deuote debita cum reuerencia obediencia filiali vna nostro cum sepe dicto conuentu flagitantes reuerendum in Christo patrem et dominum dominum Andream abbatem venerabilem in Wilhering nostrum visitatorem generosum cum sua honorificabili congregacione, quatenus amore nostri maioris ob roboris firmitatem in munimentum singulorum prescriptorum ob mutue vicissitudinis complacenciam et indigenciam presentibus sua sigilla largiter hic appendant. Insuper nos frater Andreas abbas totusque conuentus cenobii prelocuti in Wilhering patres ac visitatores veri et legittimi a primeua fundacione nostre predilecte filie monasterii supradicti in Hohenfurt per ipsos instanter pie et humiliter rogati et requisiti et ipsorum communibus supplicacionibus et postulacionibus racionabilibus deuotis necessariis inclinati et prouocati cum nostrorum sigillorum in hac pagina vnanimi et deliberato consilio et consensu nostro appensione omnia et singula suprascripta pollicita legata testificata facta et acta, quomodocunque vel qualitercunque auctoritate visitatoria nostra perhenniter rata et grata inviolabiliter judicantes et per nos et nostros successores fideliter et firmissime approbantes. Datum et actum anno domini millesimo trecentesimo lxvnj^o in die purificacionis sancte dei genitricis virginis Marie.

Source Fulltext: PANGERL, Stift Hohenfurth (=FRA II/23, Wien 1865) S. 140-141