Ich Vlreich Stvebler zv den zeiten gesessen mit haws in der stat ze Rosenberch verieh vnd tvn chunt offenbar allen lewten mit dem gegenwortigen prief, daz ich recht vnd redleichen mit gesvntem leib vnbetwungenleichen zv der zeit, do ich is wol tven mocht, mit wol verdachtem mvet mit gvetem willen vnd gvnst aller aller (sic) meiner gerben vnd mit rat aller meiner vrevnt verchawft han den erbern hern dem abpt vnd der sammvng dez chlosters ze Hohenfuert ewigleichen ze haben czwai schok rechtes gelts vnd czyns grosser phenning Prager mvencz vnd echt hvener in dem dorff, daz do mit namen gehaissen ist Seherleins pei Strobnicz gelegen, daz mein vreis erb vnd aigen gewesen ist vnverchummerts, dez vier ganczew lehen sint vnd alle gelegen sint an der zeil gegen dem dorf, daz do mit namen gehaissen. ist Svnnberch, vmb vierczig phunt phenning vnd vmb sechtet halbs phvnt Wyenner mvencz, der ich mit beraiten phenning von in gewert pin vnd gericht gancz vnd gar. Vnd vuer allen schaden vnd zvchvemftigen chrieg vnd ansprach dez selben erb vnd aigens hab ich dem obgenanten chloster noch meiner pet geben vnd geseczt zwen erber mann Marchwarden von Metling vnd Seyfriden von Perngersdorff, di paid mit sampt mir awsrichter schvellen sein mit ganczen trewen noch landes recht ze Pehem. Dar veber ich vorgenanter Marchwart von Metling vnd ich Seyfrid von Perngersdorf veriehen vnd verhaissen paid mit gesampter hant an allez gever mit vensern trewen vnd mit vensern anhangvnden insigeln dicz prief, daz wir mit Vlreichen dem Stvebler recht ausrichter sein dicz vorgenanten chawfs zins erb vnd aigens noch landes recht in dem land ze Pehem, sam erbs vnd aigens recht ist. Vnd wer daz tan, daz chain chrieg oder schaden dor awf in zvchvemftiger zeit gieng auff daz selb erb vnd aigen an chainerlai sach oder ansprach, den schvell wir den erberigen hern dem abpt vnd der sammvng dez obgeschriben chlosters ze Hohenfvrt gancz vnd gar an aller stat zv aller zeit ausrichten vnd richtig machen mit venserm aigenheftigem gvet vnd mit vensir czervng an allen iren schaden vnd an alle ir mveh. Tet wir dez nicht, swen si venter vens drien vadern vnd manen mit dem prief, der schol an alle widerred einvarn mit einem knecht salb ander mit zwain pherchten in aines erbern gastgeben haws in der stat ze Rosenberch, wo man im hin zaiget vnd schol dor inn laisten vnd zern awff seins selbs schaden vnd phenning vnd von dann nicht auskvemen also lang, venczen daz dem egenanten chloster ze Hohenfvert werd ausgericht alle sach schaden chrieg vnd ansprach gancz vnd gar, der in get auff daz vorgenant erb vnd aigen, daz si chawft haben in dem dorff zem Seherleins pey Strobnycz gelegen vmb sechst halbs phvnt vnd vmb vierczig phvnt phenning Wyenner mvencz von Vlreichen dem Styebler von Rosenberch, der er gancz vnd gar mit beraitem gelt von in gericht vnd gewert ist. Dez ausrichter wir sein diser sach, daz wir veriehen vnd verhaissen mit vensern trewen vnd mit vensern anhangvnden insigeln. Daz wir mit venserm gveten willen vnd wissen tan haben an allez gever zv einem ewigen verchvend. Vnd ich oftgenanter Vlreich Stvebler von Rosenberch han peten den erbern ritter hern Marchwarten von Porisching zv den zeiten purkgvafen ze Rosenberch, daz er durch mein willen sein ingsigel hat angehangen an den prief an meiner stat, wan ich aigens ingsigels nicht hab. Der prief ist geben do noch Christes gepverd ergangen waren drewczehen hvndert jar do noch in dem svebenten vnd sechczigstem jar an der heiligen dreivaltigkait tag.

Source Fulltext: PANGERL, Stift Hohenfurth (=FRA II/23, Wien 1865) S. 138-140