Ich Vlreich Drochawer verieh vnd tun chunt mit dem gegenwortigen prief offenbar allen lewten, di in sehent lesent oder hoerent lesen, di nu lebent oder hernach chvemftig sein, daz ich mit gesunten leib vnbetwungenleichen zu den zeiten, do ich is wol tuen mocht, mit verdachtem muet vnd mit gutem willen meiner hausvrawen Gewten mit gunst vnd rat aller meiner erben vnd aller meiner vrewnt mir vnd meiner tochter Margareten vnd allen mein vorvadern vnd allen mein nochoemen zv einem ewigen selgeret lauterleichen durch got recht vnd redleichen han geben mit vollem ganczem gewalt mit allen nveczen zu ewigem vreien erb vnd aigen ewigleichen ze haben, den erbern vnd den geistleichen hern dem abpt vnd der sammvng vnd conuent dez chlosters ze Hohenfurt in ir pitanczampt ein schok grozzer phenning vnd vier grozz phenning Prager mvenz ewiges zins vnd gelts alle iar in meinem dorf mit namen gehaizzen Stiekeinsdorf, gelegen pei dem dorff Aynsidel; denselben zins vier grozz vnd ein schok phenning schvellen dien vnd geben alle iar ierigleichen zu zwain tegen im iar, an sant Goergen tag halben vnd an sand Michels tag halben, zwen holden gesessen in dem obgenanten dorff, der ein haisset Walther vnd dient drey vnd vierczig grozz, der ander hold haisset Niclo vnd dient ain vnd czwainczig grozz, fuer rowolt vnd fuer alle sach vnd vadrvng an gemain kvenigstewer, wan di gepoten wirt, di schvellen si paid geben gancz vnd gar, sam der ober vnd der nider ir nochpawer. Ich schol auch di selben paid holden in nvcz vnd gewer inn haben mit allen sachen vncz an meinen tod vnd schol meinem sun prveder Fridreichen priester in dem vorgenanten chloster geben vnd raichen den vorgeschriben zins zu rechten tegen vnverczogenleichen alle iar venczen an sein tod, vnd noch meinem tod so schol er sich dez selben czins vnd derselben holden vnterwinten mit vollem gewalt venczen an sein tod, vnd noch seinem tod so schol sich der selben holden vnd czins vnterwinten mit vollem gewalt di sammvng vnd der conuent gemain. Daz di red dicz prieff vnd geschefft allez gancz stet vnd vnczuprochen ewigleichen beleib von mir vnd von allen meinen nochkomen, dor vmb geb ich den prieff zu einem ewigen offen sichtigen verchvnd mit meinem vnd mit meines suens Vlreichs anhangvnden ingsigeln, vnd besvnderleichen zu einer pessern sichervng mit meines gnedigens hern hern Jostes von Rosenberch anhangvndem ingsigel vnd mit meines aydem Seyfrides anhangvnden ingsigel, di daz haben durch meiner pett willen zu einer beczewgnvezz in an schaden. Der prieff ist geben do noch Chsistes gepuert ergangen waren drewczehen hvndert jar do noch in dem acht vnd sechsczigstem jar an sand Goergen tag.

Source Fulltext: PANGERL, Stift Hohenfurth (=FRA II/23, Wien 1865) S. 143-144