Ich Marchwart von Metling vnd ich Sdenka sein hawsvraw^e vnd alle venser paider gerben veriehen vnd tun chunt offenbar mit dem gegenwortigem prief allen lewten, di in sehent lesent oder hoerent lesen, di nu lebent oder hernach chvemftig sein, daz wir mit guetem willen mit veraintem rat mit verdachtem mvet vnd mit wizzen vnd gunst aller venserr vrewnt vnverschaidenleichen vnbetwungenleichen mit gesuntem leib zu den zeiten, do wir iz wol tuen mochten, den erbern vnd den geistlichen hern dem abpt conuent vnd sammvng dez chlosters ze Hohenfurt haben verchaufft recht vnd redleichen ewigleichen in dem dorf, daz mit namen gehaissen ist Czuchadol vnd gelegen pey dem dorff, daz do haisset Ainsidel, mit allen nveczen mit allen rechten mit allen sachen mit wazzer mit pechen zu holcz vnd zu veld versuecht vnd vnversucht mit vischwaid mit wiezzmait vnd mit allen andern dingen, sam aigens recht ist vnd sam wir iz in nvcz vnd gewer haben von venserm vater vnd von venserm vater vnd von vensern vorvadern ingehabt an allew ansprach vnd an allen krieg, daz venser rechtes vreys erb vnd aigen gewesen ist vnversprochens vnd vnverchummerts, vmb ains vnd sechszig schok grozzer phenning Prager mvencz vnd vmb ain vnd vierzig grozz vnd vmb ein Pazzawer phenning, der wir aller schon gancz vnd gar von in mit beraiten phenning gewert vnd gericht sein zu rechter zeit vnd zu rechten tegen vor erbern pidern lewten. Wir verhaizzen in auch vuer allez abschvetten vnd vuer abzuloezen von vens vnd von allen vensern vrewnten vnd vuer allen zuchvemftigen chrieg vnd schaden, der in mit einem landes recht auff daz selb erb vnd aigen zins oder gelts zu chvemftigleichen get oder wiert von chainerlay menschen, daz wir in den gancz vnd gar zu aller zeit an aller stat schvellen auz richten vnd richtig machen mit venserm aigenheftigem guet vnd mit venser aigen zervng an alle ir mvehe vnd an allen iern schaden. Dar veber zu einer pezzer sicherung hab wir in geben vnd geseczt di erbern lewt, di sich durch vensern willen noch venser pet mit iern trewen vnd mit ieren anhangunden insigeln in dem prieff verhaizzen vnd verpinten, daz si mit sampt vens sein ier recht ausrichter noch dez landes recht ze Pehem, di her nach sich mit namen in dem prief offenleichen erkennen. Dar veber ich Mikscho von Malating vnd ich Dwuersat von Cypping vnd ieh Troyan von Tewdlieb all drei besunderleichen verpinten vens an disem prieff mit vensern trewen vnd mit vensern anhangunden insigeln mit gesampter hant an allez gever zu dem obgenanten Marchwarten von Metling noch seiner pet willen vnd aller seiner gerben, daz wir sein vnd schvellen sein rechtew vnd gancz trew ausrichter an aller stat zu aller zeit noch landes recht ze Pehem mit venser aigen zerung vnd aigenheftigem gvet vmb alle sach gelveb red vnd chauff, sam hie vor an dem prief verhaizzen vnd geschriben stet, den erbern geistleichen hern dem abpt vnd dem conuent dez chlosters ze Hohenfurt, also daz in an den sachen nichtes schol abpgen an vens weder mit red noch an werchen. Geschech dez nicht, welhew zwen man vnter vens viern mit namen vadert vnd haist, di schvellen an alle widerred ein iedleicher mit einem knecht vnd mit zwain pherchten laisten vnd einvaren in eines erberigen gastgeben havz in der stat ze Chrumpnawe oder ze Rosenberch, wo man im hin zaiget, vnd schvellen von dann nicht auzchoemen, venczen dem obgenanten chloster werd richtig gemacht aller chrieg vnd alle sach. Daz alle sach chauff red gelveb dicz prieffs stet gancz vnzuprochen ewigleichen bleib, dar vmb geb ich vorgenanter Marchwart von Metling mit den egenanten erbern lewten, di diser sach vnd chauff vnd prieff auzrichter sein mit sampt mir, disen prieff dem oft genantenten (sic) chloster vnd sammvng ze Hohenfurt zu einem ewigen offen sichtigen verchvend versigelten mit meinem aigen anhangunden insigel. Diser prieff ist gegeben do noch Christes gepuert ergangen waren drewczehen hvndert jar, do noch in dem newn vnd sechszigstem jar an vensirr vrawen tag zu der lyechtmess.

Source Fulltext: PANGERL, Stift Hohenfurth (=FRA II/23, Wien 1865) S. 144-146