In nomine domini amen. Anno natiuitatis eiusdem millesimo trecentesimo septuagesimo quinto indiccione xiii^a die vicesima quinta mensis Aprilis hora uesperorum uel quasi in stuba maiori in castro Chrumpnaw, pontificatus sanctissimi in Christo patris et domini domini Gregorii diuina prouidentia pape vndecimi anno quinto, imperii uero serenissimi principis et domini nostri domini Karoli Romanorum imperatoris semper augusti et Boemie regis anno uicesimo, in mei notarii publici et testium presencia subscriptorum constituti personaliter honorabiles et religiosi fratres Otto Altiuadensis et Gerhardus Sancte Corone monasteriorum abbates ordinis Cisterciensis diocesis Pragensis pro se et conuentibus ac successoribus eorum de comuni uoluntate vnanimi sponte et consensu in strennuum militem dominum Marchquardum de Poreschin burchgrauuium protunc in Rosemberch et discretum ac honestum Johannem de Bor alias de Rowna dictum ex una, et Nicholaum de Bielcz protunc in Rosemberch procuratorem necnon Conradum de Troianow alias dictum de Herslag arbitros parte electos ex altera, promiserunt specialiter tamen in reuerendum dominum Gerlacum abbatem Pomucensem superabitrum de alto et basso, compromiserunt tamquam in arbitros arbitratores et amicabiles compositores laudatores et communes amicos stare laudo arbitrio ipsorum et precepto de omni lite questione dissensione et peticione, quam uel quas predicti Otto Altiuadensis et Gerhardus Sancte Corone monasteriorum et conuentuum abbates occasione metarum limitum et siluarum opido Altiuadensi Huerzicz contigue adiacencium alter contra alterum vice et nomine suo suique monasterii scandoloso rancoris non cessante dissidio agere de jure uel de facto petere et litigare possent diem usque in presentem; vt memorati arbitri presentes et recipientes de iamdictis litibus controuersiis ac contentionibus occasione metarum limitum siluarum prescriptarum vertentibus arbitrari quomodolibet percipere laudare et diffinite valeant coniunctim uel diuisim presentibus uel absentibus partibus omni loco et tempore, quocies eorum placuerit uoluntati uel uidebitur expedire, promittentes ad invicem sollempni manuum stipulacione facta michique notario infrascripto sub pena quinquaginta sexagenarum grossorum Pragensium denariorum parti seruanti a non seruante soluendorum pro omnibus rite ac racionabiliter tenendis et obseruandis quauis cessante contrauencione, quidquid dicti arbitri partes inter predictas duxerint faciendum laudandum et diffiniendum, qua pena commissa semel uel pluries exacta et soluta aut non exacta uel non soluta nichilominus omnia et singula premissa in sua semper firmitate maneant et perdurent. Qui quidem arbitri ab utraque parte ibidem conuenientes dei invocato nomine et ipsum semper habendo pre oculis pro bono pacis et salubri uia concordie arbitrati fuerunt concorditer pronuncciantes, quod abbas et conuentus monasterii Altiuadensis predicti silue seu nemoris, pro quibus litis uertebatur occasio, in parte tercia debens contentari, in residuisque duabus eiusdem nemoris partibus uel earum possessione . . abbatem et conuentum monasterii Sancte Corone ullo umquam tempore minime inpedientes quemquam nenemorum (sic) due partes curiam monasterii Sancte Corone dictam Macracuria contiguare dinoscuntur. Cuius quidem silue seu nemoris mete et limitaciones, ut ipsi arbitri affirmarunt, modum distincte sunt per infrascriptum: Primo incipiendo uel eundo a fonte aput uillam abbatis et conuentus monasterii Sancte Corone dictam Slabs, deinde per viam obinde de nouo factam per siluam secundum cruces et aceruos ac signa in arboribus et lapidibus pluribus excisa vsque ad Multauie flumen superius littus wlgariter Swarczsteten dictum, ubi eciam paruus riuulus cadere fertur in ipsum Multauie flumen. In quo quidem Multauie flumine ipsiusque coherenciis vniuersis superius locum et vsque ad locum Swarczsteten nuncupatum abbas et conuentus monasterii Altiuadensis sepefati nil iuris requirere habent, nec spem obtencionis et libertatis attemptent aut exposcant uoluntate et permissione abbatis et conuentus monasterii Sancte Corone non adiunctis. Ibique aput littus Swarczsteten prenotatum lapis magnus cum pluribus aliis lapidibus contra nemus signati (sic) crucibus feruntur, ut sint in signa et annos perpetuo duraturi. In cuius rei euidenciam et robur in futuro valiturum abbatis et conuentus monasterii de Altouado sigilla vnacum honorabilis domini Petri de Rosemberch prepositi omnium sanctorum capelle regie in castro Pragensi auditoris ipsius cause specialis sigillo presentibus sunt appensa. Datum et actum anno indiccione die mensis hora loco pontificatus et imperii, quibus supra, presentibus strennuis militibus dominis Marchquardo de Porzesschin et Troyano de Dubrawiczie necnon discretis Johanne de Bor alias de Rowna dicto et Conrado de Troianow alias de Herslag dicto et aliis quam pluribus fide dignis testibus vocatis ad premissa. Nos quoque frater Gerlacus abbas monasterii Pomucensis ordinis Cisterciensis Pragensis diocesis predictus a memoratis partibus nobis porrecte peticionis ad instanciam pro causa dissensione inter prefatos Altiuadensis et Sancte Corone monasteriorum et conuentuum abbates ac litis materia uertentibus prescriptis arbitracionem diffinicionem cum plenaria pronuncciandi potestate de prenotatorum consensu et suadela arbitrorum in nos profitemur assumpsisse, quam quidem arbitracionem diffinicionem et pronuncciacionem antedictam a pretactis arbitrorum partibus celebratam virtute presencium, quibus nostrum appendimus sigillum, laudamus approbamus et ratificamus sollempniter in singulis suis clausulis et articulis omnium premissorum. Et ego Johannes quondam Petri de Magnauilla clericus Pragensis diocesis publicus auctoritate imperiali notarius huiusmodi compromissioni arbitracioni pronuncciacioni diffinicioni et approbacioni suprascriptis, dum sic fierent et agerentur, vnacum prenominatis testibus presens interfui, eaque sic fieri uidi et audiui manu propria conscripsi et in hanc publicam formam redegi consuetisque meis signo et nomine consignaui in testimonium omnium requisitus premissorum.

Source Fulltext: PANGERL, Stift Hohenfurth (=FRA II/23, Wien 1865) S. 158-161