Nos Anna de Lipa tenore presencium publice recognoscimus vniuersis, quod matura deliberacione prehabita ac nostrorum amicorum de consilio et consensu rite et legitime ac iusto vendicionis tytulo vendidimus necnon vendimus per presentes discreto clienti Marquardo dicto Metlyn suis heredibus et successoribus vniuersis villam nostram dictam Bukausk cum omnibus et singulis ad ipsam spectantibus, videlicet siluis pratis pascuis aquis venacionibus piscationibus agris cultis et incultis plenoque dominio ad eandem perfinente, per ipsos tenendam et habendam in antea perpetuis temporibus libere et hereditarie possidendam, pro ducentis et sexaginta sex sexagenis grossorum Pragensium, quas quidem pecunias nos percepisse fatemur integraliter et in toto, promittentes dictis Marquardo heredibus et successoribus suis vna cum fideiussoribus nostris fratribus dominis Vlrico et Hermanno de Nouadomo prefatam villam a quolibet homine ipsam impetente secundum conswetudinem regni Bohemie disbrigare. Nos vero Vlricus et Hermannus fratres de Nouadomo recognoscimus, nos fore veros et legitimos dicte ville in Bukausk disbrigatores, in casu autem, vbi pretactam villam, ut prefertur, non disbrigaremus secundum conswetudinem regni Bohemye, extunc pertinentie singule et vniuersi dicte ville, quantum se extendunt, tantum dicto Marquardo heredibus et successoribus suis in nostra libera hereditate et plus tercie partis in augmento debemus condescendere tam diu, quousque dictis Marquardo heredibus et suis successoribus dictam villam cum omnibus suis pertinentiis, vt premittitur, debite et finaliter disbrigemus; quod si non faceremus, extunc quandocumque per predictum Marquardum heredes seu suos successores moniti fuerimus, tunc quilibet nostrum vna cum prefata domina Anna sorore nostra vnum clientem honestum cum vno famulo et duobus equis loco nostri in ciuitatem Budways ad obstagium mittere debemus ad hospitem per pretactum Marquardum heredes et successores suos nobis deputatum, ibidem obstagiaturi et abinde non exire, quousque sepefatis Marquardo heredibus et suis successoribus plenarie fuerit satisfactum. Elapsis vero quatuordecim diebus nobis obstagiantibus uel non tunc predictus Marquardus heredes aut sui successores plenam et omnimodam habent potestatem, prefatas ducentas et sexaginta sex sexagenas cum augmento tercie partis, prout superius est expressum, conquirere inter Christianos vel Judeos; nostrum super dampnum et omne dampnum, quod ex eo perciperent, promittimus ipsis plene et totaliter resarcire. Et quicumque hanc litteram de prefati Marquardi heredum et successorum suorum bona habuerit voluntate, eidem competit jus omnium premissorum. In cuius rei robur et euidens testimonium nos Anna Vlricus et Hermannus prescripti sigilla nostra presentibus duximus appendenda. Datum anno domini millesimo trecentesimo septuagesimo septimo in vigilia beati Jacobi apostoli.

Source Fulltext: PANGERL, Stift Hohenfurth (=FRA II/23, Wien 1865) S. 171-172