Nouerint presencium inspectores vel auditores vniuersi, quod ego Johannes rector ecclesie parrochialis in Rosenberg matura prehabita deliberacione cum scitu et consilio nobilium dominorum Petri et Johannis de Rosenberg dominorum meorum graciosorum curiam in villa dicta Kwasow sitam, in qua Benessius dictus Haracher et Proczko successor suus olim residenciam tenuerunt corporalem, cum omnibus agris suis cultis et incultis rubetis pratis pascuis omnibusque et singulis aliis juribus et prouentibus ad eandem spectantibus provt ego et alii antecessores mei tenuere, honestis Paulo et Swachoni villanis ac eorum heredibus jure emphiotetico possidendam et tenendam rite et legittime vendidi pro viginti duobus ta-[lent-]is denariorum Wyennensium, quas quidem peccunias integraliter persoluerunt hoc adiecto, quod di-[cti vill-]ani et heredes eorum michi omnibusque successoribus meis [futur-]is plebanis de eadem curia singulis a-[nnis] nomine census duo talenta denariorum Wyennensium [in festis] sanctorum videlicet Jeorgii et Galli diuisim censuabunt. Item circa festum penthecostes quinquaginta oua sex pullos duos caseos quatuor denarios Wiennenses valentes duos falcatores et duos rastratores feni censuare tenebuntur et debebunt. Promittens bona fide meo ac successorum meorum nomine dictam curiam cum suis appendiciis, vt premittitur, iuxta formam et ritum juris emphiotetici in terra Boemie actenus obseruatos cum adiutorio dominorum meorum de Rosenberg predictorum disbrigare ac omnimode libertare sine dolo. In quorum omnium robur et euidenciam pleniorem sigillum meum proprium presentibus est appensum. Nos itaque Petrus et Johannes de Rosenberg antedicti recongnoscimus huiusmodi vendicionem de scitu et consilio nostris rite et legittime fore factam. In cuius euidens testimonium sigilla nostra ex certa sciencia presentibus duximus appendenda. Sub anno domini millesimo trecentesimo septuagesimo septimo quarta die mensis Marcii.

Source Fulltext: PANGERL, Stift Hohenfurth (=FRA II/23, Wien 1865) S. 170-171