In nomine domini amen. Omnes enim vnum corpus secundum apostolum sumus in Christo, debemus ergo karitatis operibus, que sola sunt profutura, frequenter intendere, ne scindamur ab huius corporis vnitate, que magis pro illis fiunt necessario, qui iam extra statum merendi positi penarum transeuncium subduntur rigori. Proinde nos frater Benessius prepositus cum toto conuentu monasterii sancti Egidii canonicorum regularium in Trzebon alias in Wytignaw ordinis sancti Augustini Pragensis dyocesis vobis venerabilibus in Christo patribus et dominis ac viris spiritu vtique ad alta volantibus domino Ottoni abbati presenti ac successoribus eius futuris et suo deuotissimo conuentui in Altouado ordinis Cisterciensis vniuersis ac singulis tam presentibus quam futuris concorditer de capitoli nostri consensu damus et concedimus in vita pariter et in morte nostrorum ac vestrorum successorum per tempora perpetua duraturam plenam ac perfectam deuotamque in deo et inconwlsam confraternitatem et participacionem cunctorum spiritualium bonorum, vt missarum orationum abstinenciarum vigiliarum elemosinarum omniumque virtutum salutarium, que in domo nostra per presentes atque futuros diuina dignabitur clementia operari, specialiter nichilominus nos obligantes ob eiusdem karitatis vicissitudinem, vt cum fratris vnius vel plurium domus vestre dies obitus, quem dominus felicem faciat, nostre domui fuerit intimatus, cum solempni obseruancia ordinis nostri omnia et singula humiliter in missis vigiliis defunctorum oracionibus et aliis piis operibus suis nominibus nuncupatis suffragia, sicut pro nostris specialibus fieri consuetum est, secundum ordinis nostri statuta salutaria peragemus. In premissorum omnium testimonium nostrum et conuentus nostri sigilla presentibus sunt appensa. Datum et actum in monasterio Trzebon anno domini M^o CCC^o septuagesimo septimo secunda die mensis Decembris.

Source Fulltext: PANGERL, Stift Hohenfurth (=FRA II/23, Wien 1865) S. 173-174