In nomine domini amen. Ne humani actus operum precipue pietatis sub decursu temporis per maliciam seu quamcumque aliam hominum negligenciam a memoria euellantur, nec esse est, eos maxime scripturarum testimonio frequencius renouare. Quamobrem nos Petrus et Johannes fratres de Rosemberg ad vniuersorum noticiam volumus deuenire, quod ex salubri mentis feruore fideliter cupientes, ne nobilis domini domini Petri de Rosemberg genitoris nostri et Katherine conthoralis sue genitricisque nostre karissime ac aliorum nostrorum predecessorum feruor deuocionis ac caritatis zelus, quem erga monasterium in Altowado fratrum sancti Benedicti ordinis Cisterciensis et precipue erga hospitale, quod prefatus genitor noster iuxta prefatum monasterium pro pauperibus nutriendis, ut inferius patebit, in Christi et sue matris nomine erigendo de nouo suis liberis bonis fideliter dotauit, ac in ceteris operibus caritatis necnon in suarum elargicione elemosinarum deuocius in vita et in morte finaliter habuerunt, per quemcumque modum aut formam in obliuionem deducatur, sed ut ipsorum nostrorum predecessorum omnium in anniuersariis et singulis priuatis et generalibus deuocionibus per fratres in dicto monasterio deo famulantes necnon per pauperes in prefato hospitali decumbentes memoria in deo vigilancior iugiter habeatur: omnia priuilegia prefati hospitalis statum dotacionem et aliam ipsius disposicionem necnon et predictorum fratrum quasdam speciales pitancias singulariter tangencia anno domini millesimo trecentesirno oetuagesimo in die conuersionis sancti Pauli vidimus legimus sana non rasa nec violata sed in omni suorum parte integra invenimus, quorum priuilegorium clausulas puncta et articulos validiores et in omni parte plus necessarios ad cautelam monasterio et hospitali prefatis summe competentes huic littere non inmerito fidelissime duximus introponi. In quorum priuilegorium vno continebatur, quod prefatus genitor noster dominus Petrus de Rosemberg dedit et assignauit perpetue possidendam dicto monasterio in Altowado villam Neslboch cum aratura et pomerio eidem ville adiacente cum omnibus juribus atque agris cultis et incultis pratis pascuis aquis aquarumve decursibus rubetis montibus planiciebus emolimentis censibus aliisque vtilitatibus et pertinenciis vniuersis, que nunc ibi sunt aut fieri poterint in futurum, ita ut predicti fratres in prefato hospitali sex pauper es enutrire et tenere debeant per modum et formam, que inferius annotantur. Insuper in dicto priuilegio prefatus genitor noster disposuit, ut die sancti Kalixti anniuersarius suus in sepedicto claustro singulis annis solempnius peragatur sic videlicet, ut vigilie||
maiores ad vesperam decantentur et in crastino dominus abbas, nisi legittima causa prepeditus fuerit, missam summam debeat celebrare, reliqui vero fratres sacerdotes, quotquot fuerint, missas dicere non negligant eodem die pro anima sua ac suorum omnium predecessorum et omnium fidelium defunctorum, ut tenentur. Eodem die prandium cum pitanciis in refectorio singulis laucius porrigatur ducentis quoque pauperibus, eodem die victus pro vna uice tribuatur, vnicuique vnum denarium Wienensem tribuendo iniungentes eisdem pauperibus, ut anime sue ac predecessorum suorum et omnium fidelium defunctorum in suis orationibus memorentur. Ceterum idem genitor noster rogat et hortatur, ut omnes monachi tam clerici quam laici singulis diebus in suis specialibus deuocionibus ob respectum diuine remuneracionis sui dignentur perpetue memorari. Hoc autem faciendum perpetue sic conscienciis abbatis et prioris loci predicti committimus, quodsi aliquid de prescriptis obmiserint, quatenus sciant, se penam, qua nos ratificarunt, incurrisse et rationem de hoc in die iudicii reddituros. Preterea in secunda dicti monasterii priuilegiorum littera legendo invenimus, quod nos Petrus et Johannes prefati necnon Jodocus et Vlricus fratres, dum adhuc indiuisi essemus, antefato monasterio seu hospitali dedimus et perpetue assignauimus vnam villam Aynsidel nominatam, quam pro centum viginti quatuor sexagenis grossorum comparauimus cum omni vtilitate ac toto dominio ad eam pertinente adiungendo vnam libram denariorum Wyenensis monete perpetui census in theloneo nostro Rosemberg, primos denarios recipiendos, pro animabus dilecte genitricis nostre domine Katherine de Rosemberg et domine Margarethe de Baworow amitte nostre felicis recordacionis cum condicionibus infrascriptis,ita videlicet ut tercio die post festum sancti Ambrosii in anniuersario prefate genitricis nostre vigilie maiores de vespere et in crastino misse cantate et lecte cum aliis cerimonialibus obseruationibus singulis annis per fratres tam clericos quam layos fideliter et solempniter obseruentur, ut in auniuersario genitoris nostri extat superius annotatum. Illo namque die fratribus ad refectorium pro prandio seu pitancia vna sexagena grossorum et pro prandio quindecim pauperum, qui ipso die nutriri debentur (sic), octo grossi annis siugulis efficaciter tribuantur. Insuper secunda sexagena de redditibus prefate ville Aynsiedel in singulis quatuor temporibus fratribus ad conuentum per vnum fertonem diuidenda pro pitanciis tribuatur, ita tamen quod in illis quatuor temporibus vno die quilibet fratrum pro anima ipsius domine genitricis nostre dicat septem psalmos penitentiales cum letania et in missis suis piam eiusdem memoriam habere tenebuntur. Idem dispositum et ordinatum est, ut tercio die post sancti Viti dies anniuersarius prefate amitte nostre domine Margarethe de Baworow in omnibus cerimoniis et aliis solempnitatibus, ut in exequiis funeralibus fundatorum prefati monasterii fieri est consuetum, per abbatem et fratres clericos et laicos in vigiliis et missis ac orationibus cum summa deuocione et diligencia peragatur et fratribus ad conuentum pro prandio eodem die vna sexagena grossorum et pro prandio triginta pauperum semel nutriendorum duodecim grossi assignentur et ipsis triginta pauperibus post refectionem cuilibet vnus denarius Wyenensis caritatiue in domino porrigatur. Residuus vero census prefate ville Aynsidel in vtilitatem et vsum pauperum dicti hospitalis fideliter reseruetur, super quo censu quatuor pauperes duo videlicet pro anima genitricis nostre et duo pro anima amitte nostre in prefato hospitali nutriendi et tenendi graciosius augeantur per modum similiter et formam, ut inferius continetur. Ceterum in tercia littera vidimus, quod nos Petrus Vlricus et Johannes fratres prefati de Rosemberg, dum adhuc diuisi non essemus, prefato monasterio et hospitali pro anima beate recordacionis domini Jodoci de Rosemberg fratris nostri karissimi ac pro finali ipsius testamento vnam villam dictam Chunratslag cum omnium et singulorum fructuum redituum ac prouentuum vniuersa vtilitate ad eam singulariter uel generaliter spectante contulimus dedimus et efficaciter assignauimus, prefatam villam per fratres dicti monasterii regendam et perpetue possidendam, ita tamen, quod in die anniuersario memorati fratris nostri omnia et singula, que in celebracione anniuersariorum dicti monasterii fundatorum in cultu diuino per fratres clericos et laycos et in refectione fratrum consueuerunt, singulis annis in die sancti Johannis baptiste et in crastino deuocius obseruentur, et in ipso die sexaginta pauperes cum cereuisia et pane fideliter pascantur, ipsorum cuilibet per vnum denarium Wyenensem largiendo; et super censu residuo prefate ville Chunratslag pro anima prefati fratris nostri domini Jodoci clare memorie in antedicto hospitali duo pauperes perpetuo augeantur, qui pauperes cum aliis supradictis in ipso hospitali teneri et foueri debent, uelut postea lucidius exprimetur. Nos insuper Petrus et Johannes sepefati de Rosemberg cupientes iuxta ewangeliste consilium licet inmeriti amicos nobis de iniquitatis mammona celestes efficere ac de terrena substancia per pietatis studia quamuis modica thezauros inmarcescibiles in celestibus aggregare, et vt nostri in predicto loco per fratres et pauperes in vita nostra et post mortem inpressior et zelancior habeatur memoria, prefatis monasterio et hospitali villam nostram hereditariam wlgariter Larenpecher nuncupatam cum duobus molendinis et piscina ad eam pertinentibus, que omnia simul pro censu et quauis alia vtilitate annuatim soluunt duodecim libras et tres solidos Wyenensium denariorum, cum agris cultis et incultis pratis pascuis rubetis iudicio et dominio ac qualibet alia libertate ad predictam villam in omnibus suis metis diuisim uel generaliter quocumque modo spectantibus conferimus donamus et per presentes perpetuo resignamus cum condicionibus hic notabiliter sub expressis, ita videlicet quod ad votum et voluntatem nostram et omnium successorum nostrorum dominorum tamen de Rosemberg abbas prefati monasterii in Altowado vnum de suis confratribus, quemcumque protunc domini de Rosemberg duxerint eligendum, prefato hospitali et pauperibus in procuracione efficiat et disponat, cui idem abbas sub inveccione et districcione obediencie sancte mandet strictissime et iniungat, quatenus idem frater seu procurator predicti hospitalis omnes defectus detracciones et iniuriosas abrogaciones, si quas predictus abbas uel suus conuentus pauperibus prefatis inferre quouis modo uel irrogare iniuriose aliqualiter conarentur, ad audienciam dominorum de Rosemberg nostrorum successorum per se uel per aliam personam aut per scriptum deferre valeat atque possit, in hoc timorem et disciplinam seu rigorem abbatis et ordinis sui nichil penitus formidando, ut idem frater seu hospitalis procurator consilio dominorum pro tunc de Rosemberg et auxilio mediante tales iniurias per abbatem uel suos fratres ipsis infirmis illatas per hunc modum ammouendo saltim valeat propulsare. Idem eciam procurator seu frater de diligencia et fidelitate circa predictos pauperes et hospitale per ipsum seruanda ad nostras et nostrorum successorum dominorum de Rosemberg manus promissum et fidem faciat sine fraude de mandato et obediencia sui conuentus et abbatis. Denique ordinamus et volumus, ut in prefato hospitali superius nominati vndecim pauperes et pro duodecimo paupere vna honesta et prouida ancilla, que ipsis pauperibus in omnibus eorum necessitatibus seruire et administrare valeat, caritatiue teneantur et in domino foueantur perpetue in hunc modum, ita videlicet ut ipsis duodecim personis de coquina familie domini abbatis omnibus diebus omnia fercula communia, uelut ipsius domini abbatis seruitoribus dari et ministrari consueuerunt, sine quauis diminucione in perpetuum tribuatur, in melioracionem vero qualibet septimana, qua carnes a ceteris Christi fidelibus manducantur, triginta duo Wyenenses denarii ipsis pauperibus cum scitu eorum procuratorio pro carnibus emendis recentibus assignentur. Et omnibus diebus ieiuniorum statutis ab ecclesia ad ieiunandum et consuetis omnibus pauperibus in communi vnam libram puri olei papaueris uel canapi tribuendo cuilibet pauperi per vnum allec singulariter uel equiualens ferculum, si alleca sine fraude nullo modo possent haberi, ipse abbas de predicta sua coquina assignari mandet fideliter et disponat. Insuper volumus et ordinamus, quod ipsis pauperibus ad braxandam specialiter ceruisiam sex bona ordeacea brasea de humulo, quantum ad ipsa brasea necesse fuerit, ad requisicionem suprascripti procuratoris annis singulis tribuantur, quod et ipsa ceruisia per familiam et seruitores domini abbatis in suo braxatorio braxata demum ad mandatum procuratoris per eosdem seruitores ad celare pauperum deportetur, ac singulis annis cuilibet infirmorum pro lineis vestibus quinque vlne cum dimidia in festo sancti Georgii erogentur necnon vnicuique lecto infirmorum infra duos annos de nouem vlnis eiusdem linei panni pro duobus lintheamibus (sic) in festo sancti Georgii prouideatur. Et similiter infra duos annos cuilibet infirmorum sex vlne grisei panni de lana facti pro tunica uel palio in festo sancti Wenczeslai tribuantur, cuius panni vlnam ipse abbas pro decem et septem denariis debet minime comparare. Ceterum volumus, ut sex vacce pro speciali emendacione et melioracione ipsorum pauperum in hyeme per fenum et stramina, in estate vero per pastorem dicti abbatis seruando debent fideliter enutriri. Si vero predictarum vaccarum aliqua uel earum plures mortue fuerint, ad restauracionem ipsarum prefatum abbatem nolumus (?) obligare. Et quidquid in supplemento predictorum omnium statutorum per abbatem uel suum conuentum neglectum uel abstractum fuerit, hoc prefatus procurator ipsius hospitalis sine omni timore sui abbatis et conuentus salua consciencia et sui ordinis rigore ad nos seu nostros successores dominos de Rosemberg deuoluere et deferre potent, uelut extat superius lucide declaratum. Vltimo in vna littera vidimus, quod nostri antecessores in fundacione prefati monasterii veras decimas de suis araturis in villa Hlawatecz prope Podiehus ipsi monasterio perpetuo assignauerunt, pro quibus decimis in forma cambii et permutacionis prefato monasterio in quinque laneis in villa nostra Humpno quinque sexagenas grossorum et decem pullos annui et perpetui census assignauimus et dedimus, ipsos laneos cum omnibus suis vtilitatibus pre (sic) sepefatum monasterium perpetuo possidendos, ulla nostra necnon nostrorum successorum instancia non obstante. In quorum omnium euidenciam et robur firmitatis sigilla nostra propria de certa sciencia nostra et pro maiori testimonio sigillum fratris nostri domini Vlrici etiam de Rosemberg presentibus duximus appendenda. Actum et datum anno die et loco quibus supra.

Source Fulltext: PANGERL, Stift Hohenfurth (=FRA II/23, Wien 1865) S. 179-185