In nomine domini amen. Ego Jehlynus plebanus ecclesie in Herzycz coram vniuersis presencium tenore profiteor publice protestando, me ab honorabilibus et religiosis viris et dominis Petro abbate Martino priore Przybicone celerario totoque conuentu monasterii in Altouado ordinis Cisterciensis dyocesis Pragensis vnam domum cum agris et pratis ac omnibus aliis utilitatibus vniuersaliter ad eam pertinentibus iuxta domum meam ibidem in Herzicz contigue situatam pro quatuordecim cum medio talentis Wyennensium denariorum pro mea et meorum successorum plebanorum in Herzicz vtilitate et perpetuo dominio vero empcionis titulo hereditarie comparasse condicione tali notabiliter expressa, quod nullus in eadem domo sine speciali licencia et assensu prefatorum dominorum de Altiuado vinum dumtaxat debeat propinare. Eciam quocunque tempore inter quoscunque homines in ipsa domo, quod absit, litigia et dissensiones fierent uel orerentur (sic), ad sedandum et pacificandum eadem iudex uel alius capitaneus opidi prefati ipsam domum manu eciam armata intrando omnes discordes et maleficos arestare poterit et capituare licite in eadem eciam sine mea et meorum successorum omnium uoluntate. Quidquid autem domus prefate pincerna pro emendis talibus uel quibuscunque aliis dare debuerit, hoc non monasterio uel eius iudici aut aliis eorum officialibus sed michi et meis successoribus plebanis in Herzicz tamquam suo proprio dominio tribuere opertebit. In cuius rei robur perpetue duraturum sigillum meum et ad meam instantem supplicacionem nobilium dominorum Petri et Johannis fratrum et dominorum de Rosennbergh et discretorum virorum Hostislay plebani in Chrumpnaw et Johannis plebani de Rosennbergh sigilla pro maiori testimonio presentibus sunt appensa. Datum in Chrumpnaw anno domini millesimo trecentesimo octuagesimo in die translacionis sancti Benedicti.

Source Fulltext: PANGERL, Stift Hohenfurth (=FRA II/23, Wien 1865) S. 187