Ineuitabilis et incertus humane condicionis decursus tantis mutabilitatum vicissitudinibus alternatur, tamque dubiis et inoppinatis euentibus concutitur, vt merito in presentis vite lubricitate non aliis quam piis et bonis operibus insudare debeamus. Hinc igitur naufragiosum mundi labentis statum pretendentes nos Petrus et Johannes de Rosennbergh ad vniuersorum noticiam tenore presencium volumus deuenire, quod diuini cultus augmentum et dilatacionem sicientes pro transitoriisque rebus bona inmarcessibilia comparare cupientes de bonis hereditariis nobis a deo colatis pro animabus nostris nostrorumque progenitorum villam nostram Preterslag dictam cum molendino eidem proxime adiacente monasterio nostre fundacionis in Altouado dedimus et presentibus damus incorporamus condescendimus et resignamus cum vniuersis juribus et pertinenciis suis ac pleno dominio, prout nos ipsi hucusque tenuimus, pacifice et quiete perpetuis temporibus tenendam regendam et possidendam, omne jus, quod nobis in eadem villa et molendino competebat, in ipsum monasterium penitus transfundentes, nec nobis aliquid juris aut proprietatis seu dominii ibidem reseruantes, sic tamen quod occasione huius nostre donationis in Pombergh, que in wlgari Bohemico Babye vocitatur, a solutione decimarum, quas antea dare consueuerat, omnino libera et soluta existat. Et quod fratribus vniuersis ibidem in Altouado manentibus semper in spacio duorum annorum cuilibet eorum de vno scapulerio prouideatur, quia pro illis scapuleriis eis deputauimus tria cum medio talenta denariorum Wiennensium in villa antedicta. Promittimus itaque sincera fide nostra sine dolo pro nobis successoribus nostris vniuersis dictum monasterium in villa sepetacta ac molendino et vniuersis ac singulis ad ea pertinentibus, quibuscunque nominibus censeantur, nunquam verbo uel facto impedire uel inquietare quouismodo, sed pocius proposse nostro tueri defendere et gubernare. In cuius rei euidentiam et roboramentum sigilla nostra propria et pro maiori testi(m)onio sigillum fratruelis nostri Henrici de Rosennbergh presentibus duximus appendenda. Ratum et datum castro nostro Chrumphnaw anno domini millesimo trecentesimo octuagesimo tercio dominica ante sancti Martini confessoris gloriosi.

Source Fulltext: PANGERL, Stift Hohenfurth (=FRA II/23, Wien 1865) S. 189-190