Wolframus dei gracia sancte Pragensis ecclesie archiepiscopus apostolice sedis legatus vniuersis Christi fidelibus, ad quos presentes peruenerint, salutem in domino sempiternam. Votis fidelium libenter anuimus, si per ea fidelium Cristi crescat deuocio et Christi fideles ad deuocionem donis spiritualibus salubrius inuitantur et animarum salus suscipiat salutaria incrementa. Sane nuper pro parte venerabilis et religiosi viri domini Ottonis abbatis monasterii in Altouado ordinis Cisterciensis nostre Pragensis diocesis nobis oblata peticio continebat, quod reuerendissimus in Christo pater et dominus dominus Johannes olim archiepiscopus Pragensis noster inmediatus precessor quandam orationem catholicam ad laudem gloriam et honorem sanctissimi ac gloriosissimi Johannis apostoli et ewangeliste que sic incipit: "Aue frater domini Jhesu care“, compilauit ipsamque in scriptis dicto domino Ottoni abbati tradidit, quam ipse dominus abbas et nonnulli Christi fideles ex deuocione legunt et dicunt ac legere et dicere consueuerunt. Nos igitur ex debito officii pastoralis de thezauro Cristi nobis in parte credito mercari volentes et ipsum dominum abbatem ac alios Christi fideles donis spiritualibus ad legendum et dicendum dictam orationem sepius et frequencius incitare et deo animas lucri facere cupientes, omnibus vere penitentibus contritis et confessis, qui predictam orationem "Aue frater domini“, quocienscunque et quandocunque deuote legerint ac dixerint, de omnipotentis dei misericordia et beatorum Petri et Pauli apostolorum eius meritis et intercessione confisi quadraginta dies indulgenciarum de iniunctis eis penitenciis in domino misericorditer relaxamus. In cuius rei testimonium presentes litteras fieri et sigillorum nostrorum appensione comuniri. Datum Prage anno domini millesimo trecentesimo nonagesimo septimo die prima mensis Octobris.

Source Fulltext: PANGERL, Stift Hohenfurth (=FRA II/23, Wien 1865) S. 215-216