Bonifatius episcopus seruus seruorum dei dilecto fillo Ottoni abbati monasterii in Altovado Cisterciensis ordinis Pragensis diocesis salutem et apostolicam benedictionem. Exigit magne tue deuotionis et sinceritatis affectus, quo erga nos et ecclesiam Romanam splendere dinosceris, ut peticionibus tuis, quantum cum deo possumus, fauorabiliter annuamus. Hinc est, quod nos tuis in hac parte supplicationibus inclinati, ut tu cum vno ex monachis tui monasterii in Altovado Cisterciensis ordinis Pragensis diocesis, cuius abbas existis, quem ad hoc duxeris eligendum, in illis diebus, quibus alias de iure uel consuetudine non est esus carnium interdictus, carnibus uesci libere et licite ualeas ac ualeat, dummodo tu uel ille, quem elegeris, ut prefertur, iuramento uel uoto proprio specialiter ad abstinenciam esus huiusmodi minime sitis astricti, quibuscunque statutis priuilegiis consuetudinibus et constitutionibus contrariis monasterii et ordinis predictorum nequaquam obstantibus, deuotioni tue auctoritate apostolica tenore presentium indulgemus. Nulli ergo omnino hominum liceat hanc paginam nostre concessionis infringere vel ei ausu temerario contraire. Si quis autem hoc attemptare presumpserit, indignacionem omnipotentis dei et beatorum Petri et Pauli apostolorum eius se nouerit incursurum. Datum Rome apud sanctum Petrum ij. Non. Decembris. Pontificatus nostri anno decimo.

Source Fulltext: PANGERL, Stift Hohenfurth (=FRA II/23, Wien 1865) S. 219-220