Johannes miseracione diuina Sancti Angeli sacrosancte Romane ecclesie diaconus cardinalis apostolice sedis in Germanie et nonnullis aliis partibus de latere legatus vniuersis Christi fidelibus presentes litteras inspecturis salutem in domino sempiternam. Splendor paterne glorie, qui sua mundum illuminat ineffabili claritate, pia vota fidelium de ipsius clementissima maiestate sperancium tunc precipue benigno fauore prosequitur, cum deuota ipsorum humilitas sanctorum precibus et meritis adiuuatur. Cupientes igitur ut ecclesia parrochialis sancti Nicolai in Rosenberg Pragensis diocesis congruis frequentetur honoribus, fidelesque ipsi eo libencius deuocionis causa confluant ad eandem, quo ibidem dono celestis gracie vberius conspexerint se refectos a Christi quoque fidelibus iugiter venerentur, de omnipotentis dei misericordia et beatorum Petri et Pauli apostolorum eius auctoritate confisi omnibus vere penitentibus et confessis, qui in natiuitatis circumcisionis epiphanie resurreccionis ascensionis et corporis domini nostri Jesu Christi ac penthecostes necnon natiuitatis purificacionis annunciacionis et assumpcionis beate Marie virginis ac natiuitatis beati Johannis baptiste dictorum Petri et Pauli apostolorum necnon ipsius ecclesie patronorum et dedicacionis festiuitatibus omniumque sanctorum et animarum celebritate ecclesiam predictam deuote visitauerint annuatim et ad reparacionem et conseruacionem calicum librorum ac aliorum ornamentorum pro diuino cultu inibi celebrando necessariorum, quocienscunque manus porrexerint adiutrices, nos cardinalis et legatus prefatus pro qualibet ipsarum festiuitatum celebritate centum dies indulgenciarum de iniunctis eis penitenciis misericorditer in domino relaxamus presentibus vero perpetuis futuris temporibus duraturis. In quorum fidem et testimonium premissorum presentes litteras per secretarium nostram infrascriptum subscriptas exinde fieri nostrique sigilli iussimus et fecimus appensione conmuniri. Datum Crumpnaw dicte Pragensis diocesis sub anno a natiuitate domini millesimo quadringentesimo quadragesimo octauo indiccione vndecima die vero vicesima quarta mensis Aprilis pontificatus sanctissimi in Christo patris et domini nostri domini Nicolai diuina prouidencia pape quinti anno secundo.||
F. Assissinus. Jo. Vaultier secretarius.

Source Fulltext: PANGERL, Stift Hohenfurth (=FRA II/23, Wien 1865) S. 273-274