Nos Sigismundus dei. et apostolice sedis gratia episcopus Salonensis cooperator in pontificalibus ecclesie Pathauiensis vniuersis Christi fidelibus deum sincero corde colentibus presentes litteras inspecturis salutem in eo, qui est vera salus viuorum et mortuorum. Quia pro modulo nostro fidelium mentes vnius effici voluntatis et ad cultum diuinum ex cordis affectu per opera pie deuocionis Christi fideles alicere cupientes de consensu et voluntate specialique singulari commissione venerabilium administratorum ecclesie Pragensis sede vacante gratia sancti spiritus nobis specialiter suffragante ea diligentia et deuocione, qua potuimus, in monasterio Altiuadensi gloriosissimeque dei genitricis virginis Marie altare in media ecclesia situatum de nouo consecrauimus in honore sancte ac victoriosissime crucis et sancti Andree apostoli ipso die sanctorum apostolorum Symonis et Jude, que fuit vicesima octaua die mensis Octobris, dedicacionem autem prenominati altaris ipso die sancte crucis inuencionis et exaltacionis statuimus a cunctis Christi fidelibus perpetuo venerari. Igitur omnibus vere penitentibus contritis et confessis, qui ad predictum altare conuenerint missasque ibi legerint, siue manus adiutrices porrexerint cum cera candelis libris quibusue aliis rebus ad cultum diuinum spectantibus, si qua deuote obtulerint, in omnibus festiuitatibus infrascriptis: Natiuitatis domini circumcisionis epyphanie resurreccionis ascensionis domini nostri Jesu Christi in festo penthecosten (sic) trinitatis corporis domini nostri Jesu Christi et per octauas eiusdem dominici corporis atque in omnibus festiuitatibus sanctissime dei genitricis virginis matris Marie et per octauas assumpcionis et visitacionis Marie ad Elyzabeth omni die dominico sancti Mychaelis archangeli omnium sanctorum Johannis baptiste sancti Andree apostoli et omnium apostolorum Stephani et Laurencii martyrum Nicolai Martini Jeronimi presbyteri Marie Magdalene, Katherine Margarethe Barbare Dorothee in festo dedicacionis predicti altaris, qui ad predictum altare deuote conuenerint, de omnipotentis dei misericordia et beatorum Petri et Pauli apostolorum eorum auctoritatibus confisi semper quadraginta dies criminalium et octaginta venialium de iniunctis sibi penitenciis misericorditer in domino relaxamus. Datum et actum loco el temporibus quibus supra sub anno domini millesimo quadringentesimo sexagesimo quinto harum testimonio litterarum sub appensione nostri sigilli roboratum.

Source Fulltext: PANGERL, Stift Hohenfurth (=FRA II/23, Wien 1865) S. 308-309