Helias canonicus et administrator Lithomislensis per sedem apostolicam specialiter deputatus sanctissimi domini nostri pape accolitus et plebanus ecclesie parrochialis beate et intemerate virginis Marie in Nouadomo honorabili viro domino Friderico fratri monasterii Altouadensis ordinis sancti Benedicti dyocesis Pragensis salutem in domino et in comissis debitam diligenciam adhibere. Cum quia propter viarum discrimina fratres monasterii vestri Altouadensis, ut saluti eorum consuleretur, ad nos nequeant pertingere propriis in personis, scriptis tamen reuerendissimi patris domini abbatis et conuentus predicti monasterii veniam de comissis summopere postularunt et nos humiliter deprecarunt, quatenus eorum animabus benigne de salute prouideremus et a censuris ecclesissticis, quas non obseruando interdictum incurrerunt, absolueremus et similiter irregularitate, quam horum occasione contraxerunt, dispensaremus, ad contribucionem fisci generalis contra perfidissimos hereticos dei et sue sancte ecclesie seuissimos inimicos voluntarie se obligarunt. Nos igitur eorum precibus inclinati auctoritate reuerendissimi in Christo patris et domini domini Rudolphi episcopi Lauantini apostolice sedis cum potestate legati de latere per Bohemiam et Poloniam legati missi vobis predicto domino Ffriderico vices nostras pro hac vice tantummodo comittimus et auctoritatem predictam nobis cum potestate subdelegandi concessam per presentes subdelegamus, ut omnes fratres dicti monasterii Altouadensis pro tempore presenti ibidem existentes preter dominum abbatem a predictis omnibus censuris vigore contribueionis iuxta formam nobis traditam absoluatis et similiter irregularitate, quam horum occasione contraxerunt, dispensetis, prout et nos per presentes in dei nomine dispensamus, sancte matris ecclesie sacramentis necnon participacioni fidelium eos restituentes, suscepta tamen a quolibet preter prius in forma ecclesie caucione solempnis iuramenti, prout sacrorum canonum dictat et exigit ordo de parendis in futurum perpetue apostolicis et ecclesie mandatis iniungendo pro modo culpe penitentiam salutarem, super quibus omnibus sit vestra consciencia onerata. In cuius testimonium sigillum nostrum presentibus est appensum. Datum Nouedomus anno anno domini M^o CCCC^o lxviii^o iiii. die mensis Julii pontificatus sanctissimi in Christo patris domini nostri domini Pauli diuina prouidentia pape secundi anno iiii^o.

Source Fulltext: PANGERL, Stift Hohenfurth (=FRA II/23, Wien 1865) S. 318-319