Helias canonicus et administrator Lithomislensis per sedein apostolicam specialiter deputatus sanctissimi domini nostri pape accolitus et plebanus ecclesie parochialis beate et intemerate virginis Marie in Nouadomo dilecto nobis in Christo fratri Friderico Cisterciensium ordinis monasterii in Altouado Pragensis dyocesis salutem in domino. Quia tu pro defenssione sancte fidei katholice contra perfidos hereticos juxta licenciam et voluntatem abbatis tui et ordinacionem nostram contribuisti, idcirco auctoritate apostolica nobis in hac parte in ecclesia beate virginis Marie parochiali in Nouadomo per reuerendissimum in Christo patrem et dominum dominum Rudolphum dei gratia episcopum Lauantinum sacrosancte apostolice sedis ad Bohemie et Polonie regna ac certas Almanie partes cum potestate legati de latere legatum missum specialiter commissa data et delegata horum vigore concedimus tibi facultatem, ut tibi confessorem presbyterum regularem dicti ordinis preter neccessitatem katholicum tamen et ydoneum sancte matri ecclesie summoque pontifici Romano obedientem eligere possis, qui te iuxta forman infrascriptam ab omnibus et singulis tuis peccatis criminibus et excessibus quantumcumque grauibus et enormibus eciam in casibus sedis apostolice (sic) specialiter reseruatis semel in vita et semel in mortis articulo plenarie absoluere possit, prouiso tamen quod alicui satisfaccio, sit facienda omnino satis fiat, quodque propter huiusmodi graciam non efficiaris pronior ad peccandum. Fforma absolucionis: Misereatur tui omnipotens deus etc. Dominus noster Jesus Christus te absoluat et ego auctoritate ipsius ac beatorum apostolorum Petri et Pauli auctoritateque apostolica tibi concessa et michi commissa absoluo te ab omnibus et singulis censuris ecclesiasticis excommunicacionis et suspensionis et interdicti in te ab homine uel a iure generaliter prolatis, nec non et ab omnibus criminibus et excessibus tuis eciam in casibus apostolice sedi specialiter reseruatis dando tibi plenariam omnium peccatorum indulgenciam et remissionem ac, in quantum claues ecclesie se extendunt, remitto tibi penam, quam pro huiusmodi peccatis in purgatorio pati debuisses, in nomine patris et filii et spiritus sancti amen. - Eciam recongnoscimus tenore presencium vniuersis, quod predictus frater Ffridericus spiritu, nescio quo ductus, mandatis apostolicis non paruit eiusdemque sedis reuerendissimi domini Rudolphi episcopi Lauantini legati de latere predicti eciam mandata spreuit, non obstante, quod in monasterio perstitit interdictum ecclesiasticum propter adhesionem domini de Rosis et suorum Georgii de Podiebrad dampnati heretici regni Bohemie occupatoris, non obseruauit et propter hoc excommunicacionis et agrauacionis sententia est innodatus. Et quia in hiis censuris diuinis se inmiscuit sacramentis irregularitatis eciam maculam contraxit atque notam. Sed quia dictus frater Fridericus zelo penitentie ductus cupiens reuerti ad gremium sancte matris ecclesie, que nulli humilianti claudit synum, humiliter de predictis censuris veniam postulauit, filium sancte matris ecclesie se recongnoscens; cuius peticionibus inclinati nos antedictus Helias sepe dicti reuerendissimi domini domini legati auctoritate ymmo verius sanctissimi domini nostri domini Pauli summi pontificis super hiis nobis tradita et concessa necnon specialiter delegata ipsum ffratrem Fridericum ab omnibus censuris ecclesiasticis ab homine uel a iure absoluimus et super irregu!aritate, quam horum occasione contraxit, in dei nomine dispensamus. Et sic ab omnibus culpis suis absolutum remittimus sancte matri ecclesie eundum reconciliantes, suscepta tamen ab eo prius caucione solempnis iuramenti, prout sacrorum canonum dictat et exigit ordo de parendis in futurorum apostolicis eiusdemque sedis legatorum et aliorum superiorum in perpetuum obedire mandatis. In cuius testimonium sigillum nostrum presentibus est appensum. Acta sunt hec in ecclesia pretitulata sancte Marie virginis anno domini millesimo CCCC^o lxviii^o xxiii. die mensis Junii pontificatus sanctissimi in Christo patris domini nostri domini Pauli diuina prouidentia pape secundi anno iiii^o in presencia notarii infrascripti ad hoc specialiter vocati et requisiti. - Ego Johannes Tawt publicus apostolica auctoritate notarius prenotate absolucioni reconciliacioni juramenti presticioni dispensacioni presens interfui, omnia sic fieri vidi et audiui de verbo ad verbum nichil addens neque minuens de mandato venerabilis viri domini Elye suprascripti fideliter perlegi et auscultaui. Manu mea propria.

Source Fulltext: PANGERL, Stift Hohenfurth (=FRA II/23, Wien 1865) S. 316-318