Anno domini M^o CCCCLXXXI. in festo beatorum Felicis et Adaucti martyrum deuotus et honestus laicus Wolfgangus Chnoll carnifex ciuis Budwicensis hanc manum deauratam simul cum annexo argenteo deaurato pectorali ac preciosissimis reliquiis in eo contentis et registratis obtulit deuotissime ecclesie parrochiali in opido Hericz. Eodem die per omnia similem manum cum reliquiis obtulit etiam ad capellam prefatorum sanctorum martirum in monasterio beate virginis ordinis predicatorum in Budweis. Continet autem hoc presens pectorale reliquias infrascriptas: [Duas particulas notabiles de reliquiis]* sanctorum Stephani et Laurentii martyrum in vno fasciculo primo loco posito. Item de crinibus beate Katherine virginis et martyris. Item reliquias sanctorum felicis et Adaucti martyrum. Item de loco natiuitatis beate virginis lapillus. Item de presepio Christi infantis. Vt igitur omnis ambiguitas suspicio uel error Christi fidelium, ad quos presentes venerint de ueritate predictarum reliquiarum tollatur, notum sit vniuersis, quod ipse reliquie preciosissime precipue ipsorum sanctorum Filicis et Adaucti martyrum a triginta sex annis et vltra per studiosissimam et deuotissimam solicitationem prefati Wolfgangi ad mandatum reuerendorum patrum Nicolai et Andree prouincialium prouincie Bohemie ordinis predicatorum felicis memorie diuersis fratribus factum, vt in conuentibus ac monasteriis Morauie Austrie Stirie et in Ytalia inquirerent huiusmodi reliquias, postularent et asportarent. Et factum est per successum temporis, quod de tribus distinctis locis scilicet de conuentu Cznoymensi Morauie de conuentu Bethouiensi in Stiria et de Ytalia dei gratia inuente impetrate et allate sunt more solito honeste antiquissimis panmiculis (sic) sericis vetustate quodammodo consumptis studiose circumvolute colligate et vetustissima scriptura propriis nominibus diligenter intitulate. Quapropter pro speciali gloria dei et sanctorum ego frater Wolfgangus Rabenstain de Wienna arcium liberalium professor et sacre theologie lector predicator et vicarius prioris prefati conuentus Budwicensis immeritus et indignus testificor coram deo et sanctis eius presenti scripto manus proprie, quod ego bona fide et conscientia sine omni dolo et fraude reuerenter oratione premissa reliquias illas michi presentatas vidi et ad instantiam supradicti Wolfgangi contrectaui et inter eas duas notabiles particulas figura et quantitate differentes de reliquiis ipsorum sanctissimorum Felicis et Adaucti martyrum ab aliis diuisi in rubeo panniculo hic colligaui et in medio huius pectoralis vna cum aliis reliquiis manu propria diligenter, ut sciui et potui, consuendo ornando et intitulando posui et ordinaui in presentia plurium venerabilium patrum et fratrum meorum de supradictis fidele testimonium perhibentium et assensientium, quod in fidem premissorum ac testimonium sigillum officii prioratus presentibus subimpressi. Hec inclusio reliquiarum facta est anno quo supra in festo beati Egidii abbatis peracto diuino cultu ante prandium in prefato conuentu nostro.

Source Fulltext: PANGERL, Stift Hohenfurth (=FRA II/23, Wien 1865) S. 343-344