||
Wir Karl von Gotes gnaden romischer keyser czu allen czeiten merer des reichs und kunig czu Beheim, bekennen und tun kunt offenlich mit disem brieve allen den, die yn sehen oder horen lesen, wann alle fursten, geistliche und werltliche graven, freyen, dienstlute, ritterer, kneh¬ ||
te und stete des furstentums der markgrafschafft und marken czu Brandemburg uns als einem romischem keyser furbracht und furgelegt haben, wie das sie durch ewigen frides beschuczungen und beschirmungen willen der marken czu Brandemburg, alle derselben marken, lande, ||
stete, slosse, lute, guter und czugehorungen, die vormals lange czeit mit manigfaldigem swerlichem kriege vorderbet und beschedigt ist und die auch die durchleuchtigen Wenczlaw kunig czu Beheim, markgraff czu Brandemburg und herczog in Slesien, Sigmund und Johans gebruder, unser ||
fursten und lieben sone, mit des kunigreichs und der kronen czu Beheim erblichen landen, steten, gutern und bereitem gelde vormals von dem hochgebornen Otten herczogen in Beyern, czu den czeiten markgrafen czu Brandemburg, irem swager, und von seinen brudern und vettern recht ||
und redlichen gekawfft haben und der sie auch als rechte fursten und markgrafen czu Brandemburg in gewerlichen lehnen, nucz und in gewere siczen und sein, sich czu dem kunigreiche und lande czu Beheim, der markgrafschafft czu Lusicz, den herczogtumen czu Breslaw, czu der Sweydnicz und ||
czu dem Jawr und andern landen, die czu demselben kunigreiche und der kronen czu Beheim gehoren, und disselbe kunigreiche sich hinwider in ewige eynunge und sazze czu eren und dienste dem heiligen romischen reiche genczlichen gesaczt haben, mit willen, wissen, gunst und ||
volenbort unsers als eines romischen keysers obristen lehenherren des egenanten furstentums und marken czu Brandemburg und die vorgenanten fursten, grafen, freyen, dienstlute, ritterer, knechte und stette den vorgenanten kunig Wenczlawn, Sigmunden und Johansen gebru¬ ||
dern, und allen andern iren brudern, erben, erbeserben und nachkomenn, die nu sein und hernach geborn werden, und ob die alle nicht weren, dem hochgebornem Johansen markgrafen czu Merhern, unserm lieben bruder und fursten, allen seinen erben, erbes erben und ||
nachkomen, als markgrafen czu Brandemburg, iren rechten erpherren, gelobt und gesworn haben, das sie ewiclichen bey dem kunigreiche czu Beheim, der markgrafschafft czu Lusicz, den herczogtumen czu Breslaw, czu der Sweydnicz und czu dem Jawr und bey andern lan¬ ||
den, die czu dem kunigreiche czu Beheim gehoren, ewiclichen beleiben sullen und wollen und sich do von nymmer scheiden noch scheiden lazzen durch dheynerleye sachen oder stucken willen in dheinenweis. Und furbasmer, ob es czu schulden queme, das die vorgenanten kunig Wenczlaws bruder, seine ||
oder ire erben oder vettern oder derselben erben oder nachkomen, die nu sein oder in kunfftigen czeiten werden, ire erpherren markgrafen czu Brandemburg, irer weren einer, oder mer sie die obgenanten fursten, graven, freyen, dienstlute, ritterer, knechte, und stette der mar¬ ||
ken czu Brandemburg oder dieselben marken czu Brandemburg, czemale oder derselben marken ein teyl, von dem kunigreiche czu Beheim und den landen, die darczu gehoren, von dem kunige czu Beheim, oder seinen brudern, iren erben, vettern oder nachkomen, die in czeiten ire ||
erpherren, markgrafen czu Brandemburg sein und werden, oder ob sie der marken czu Brandemburg ein teil von dem lande derselben marken czu Brandemburg und dem kunigreiche czu Beheim scheiden, vorgeben, vorkawffen, vorseczen, vorwechseln oder empfremden wolten, schieden, ||
vorgeben, vorkawfften, vorseczten, vorwechslten oder die empfremdten in dheineweis, das denne die vorgenanten fursten graven, freyen, dienstlute, ritterer, knechte und stette der marken czu Brandemburg dem oder den iren erbherren, markgrafen czu Brandemburg, die das tun ||
wolten oder teten, nichtes pflichtig oder vorbunden sein sullen von huldungen wegen oder sust, noch den oder die fur ire herren haben oder halten, alle die weile, das die nicht von sulchen sachen liezzen und die widerteten, sunder sie sullen sich denne halten an den kunig czu Beheim ||
und an andere seine bruder, vettern, erben und nachkomen, die denne ire erpherren, markgrafen czu Brandemburg, sein oder werden und sulche scheydungen, vorgebungen, vorkawffungen, vorseczungen, vorwechslungen oder empfremdungen nicht teten oder getan hetten, uncz an die czeit, ||
bis derselbe oder dieselben do von genczlichen liezzen oder das widertan hetten. Und furbasmer haben und die vorgenanten fursten, graven, freyen, dientstlute, ritterer, knechte und stete furbracht, das sie gelobt und czu den heiligen gesworn haben fur sich, ire erben nachkomen und ||
stete, ab es czu schulden kumpt, das der vorgenanten kunig Wenczlaw und seine bruder und ir aller erben, erbes erben und nachkomen, kunige czu Beheim und markgraven czu Brandemburg und auch der vorgenanten markgraff Johans von Merhern, seine erben, erbes erben und nach¬ ||
komen allen absturben, do Got fur sey das sie, denne einen yeglichen kunig von Beheim, der denne in czeiten wirdet und ist, und mit ym seine erben und derselben erben, erbes erben und nachkomen ewiclichen fur markgraven czu Brandemburg, ir rechte naturlichen erpherren und ||
nyemanden anders haben und habten sullen, und sich von yn, iren erben und nachkomen, kunigen czu Beheim, dem kunigreiche czu Beheim seinen egenanten furstentumen, herschefften und auch von den landen, die dorczu gehoren, nicht scheiden noch scheiden lazzen in dheinenweis, sunder ||
das sie yn als iren rechten erpherren getrewe, gewer und gehorsam sein sullen, als das alles in sulchen brieven, die dorober an beidenseiten geben sein, vollenkomenlicher ist begriffen. Und wann auch die obgenanten fursten, graven freyen, dienstlute, ritterer, knechte und ||
stete fur sich, ire erben und nachkomen uff eine seiten und die egenanten unser sone, kunig Wenczlaw, Sigmund und Johans fur sich ander unser und ire erben und nachkomen und auch der vorgenanten unser bruder, markgraff Johans von Merhern, fur sich, seine erben ||
und nachkomen uff die andern seiten, uns fleizziclichen gebeten haben, das wir, als ein romischer keyser, obrister lehenherre des vorgenanten furstentums der marken czu Brandemburg, dor uff, das dieselben marken, ire land und lewte widerbracht und in fride und ||
selikeit gesaczt werden mochten, sunderlichen dem heyligen romischen reiche czueren und wirden merklichen bedenken und eygentlichen betrachten wolten, wie gar swerlichen und grozzlichen das egenanten furstentum der marken czu Brandemburg, seine lande, lew¬ ||
te und guter in vorgangnen czeiten von unfride und kriege, der steticlichen do gewesen ist, vorterbet, beschedigt und vorwustet weren, und noch furbasmer beschedigt, vorterbet und vorwustet wurden, ob sie ane rat, schucz und hulffe der kunige und kung¬ ||
reichs czu Beheim beliben, und auch, wie das mangerleye herschafft, stete, lande, slozze, lewte und guter demselben furstentume und der marken czu Brandemburg von umbgesezznen kunigen, fursten und herren beynamen den kunigen von Denemarken, ||
und von Polon, den herczogen von Sachsen und Lunemburg, dem erczbischove von Meideburg, den herczogen von Brunswig, von Stetyn, von Mekelmburg und den fursten von Anhalt eines teiles erblichen und ewiclichen und eines teiles czu pfantschafft ||
umb sulche grozze summen geldes, des dieselben land und vesten kawme wert gesein mochten abgebrochen, abgedrungen und abgerissen sein, und das auch dasselbe furstentum und marke czu Brandemburg ane vorsichtigen rat, schirm und hulffe des ||
vorgenanten kuniges und kunigreiches czu Beheim, landen und lewten, mitnichte widerbracht werden mochten, noch in ganczen steten fride gesetzet. Sunderlichen do von wann das kunigreiche czu Beheim seine furstentum und lande an manigen orten mit der ||
egenanten marken czu Brandemburg ane allerleye ander fursten und herren lande underscheide und mitteil an einander gemerken und stiezzen, und wann auch scheimbarlichen offembar were, das dieselben marken czu Brandemburg derselbe kunig von Beheim ||
mit seinen und seines kunigreichs czu Beheim erplichen landen, lewten, stetten, vesten und auch merklichen grozzen summen bereites geldes gekawfft hette, und auch das der egenanten kunig von Beheim dieselben marken czu Brandemburg, die vilnahen al¬ ||
czemale vorpfemdet und vorseczet was, mit seines kunigreiches erblichem gelde und gute yeczunt in kurczer czeit merklichen und nuczlichen widerbracht, geloset und mit Gotes hulffe fridlichen gemachet hette und er auch doran noch teglichen und fur¬ ||
sichticlichen seinen fleizz und arebeit kerte und wendte. Und haben uns auch fleizziclichen gebeten, das wir eygentlichen bedenken wolten, so des heiligen romischen reiches nemliche sulche furstentume uff die dasselbe reiche usgeseczet und gebawet ist ||
mit sulcher bezzerungen eynungen fride und gemache widerbracht und gesterket wurden das denne derselben furstentume vorweser und fursten dem romischen reiche und desselben reiches keysern und kunigen nuczlichen geraten und gehelffen mochten, ||
und beynamen uff die rede, das kunige und das kunigreiche czu Beheim sulcher lande, stette und vesten und auch merkliche grozze summen geldes, die sie uff die egenanten marken czu Brandemburg gewendet haben und noch teglichen doruff wenden nucz¬ ||
zen, ane schaden beleiben und die nicht vorloren, das wir als ein romischer keyser alle sulche obgeschribne eynungen, stucken und sachen von keyserlicher macht geruchten bestetigen und gevestnen. Des haben wir eygentlichen betrachtet sulche manigfaldi¬ ||
ge und redliche bete und auch offembare notdurfft der egenanten marken czu Brandemburg, dorumb durch sulcher obgenanten bete, sachen und stucken willen, die unsern mut billichen und redlichen beweget und dorczu geneyget haben, sunderlichen dem hey¬ ||
ligen romischen reiche czu eren und wierden, und uff die rede, das derselben marken czu Brandemburg lande und vesten bey dem heyligen romischen reiche beleiben und nicht bey den egenanten kunigen und kunigreichen czu Dennemarken und czu Polon, die ||
demselben heiligen romischen reiche nichtes bekennen noch von yn halten wollen, und auch das derselben marken czu Brandemburg von den und andern umbgesezznen fursten und herren furbas nicht mer abgebrochen und abgedrungen werde, und beynamen ||
auch durch ewigen nucz, vride und selikeit des egenanten furstentumes der marken czu Brandemburg, seiner lande und lewte. Haben wir mit wolbedachtem mute, rechter wissen und rate unserr und des reiches fursten, graven und getrewen, die czu den ||
czeiten bey uns waren die, vorbeschribene eynungen und sachen, als die uff beydenseiten begriffen und gescheen sein, und auch alle und yegliche brieve, die doruber geben sein, von worte czu worte bestetigt und bevestent, bestetigen und bevestnen von key¬ ||
serlicher mechte vollenkomenheit mit crafft dicz brieves, und seczen und gebieten mit unser keyserlichen macht ewiclichen, das alle sulche obgenanten eynungen und sachen, als die in iren synnen, meynungen, puncten und stucken begriffen sein, und auch alle ||
und yegliche brieve, die dorober an beidenseiten gemachet und geben sein, von worte czu worte, als die begriffen sein, ewige crafft und macht haben sullen und das dowider nyemant getun muge oder sulle in dheynenweis, in welcherleye adel, eren, wierden oder wesen ||
der sey, und ob er auch in kuniglichen wirden were und wer es sache das dowider yemant tete mit welcherleye sachen das were das sal untuglichen und uncrefftig sein und czu allen und yeglichen obgeschribnen sachen und sulhen brieven die doruber geben sein ewi¬ ||
clichen keynerleye schaden brengen were. Auch das in disen abgeschribnen sachen, oder in disen gegenwortigen unsern keyserlichen brieven, oder in dheynen andern brieven, die uber die vorgenanten eynungen und sachen gemachet und geben sein, dheynerleye gebre¬ ||
chen were von vinsternuzze der worter von czweyfelhafftiger usrichtungen der synnen und ob dheynerleye czierheit und schonheit, die dorczu gehorten gelazzen weren, oder sust vorgezzen in dheyneweis, den erfullen wir mit vollenkomenheit keyserlicher ||
mechte were, auch das dheynerleye keyserrecht, die wir oder unsere vorfaren romische keyser oder kunige gemachet oder geseczet hetten, gewonheit ubungen, behaltungen oder gemeynes recht gesecze der lande, oder der stette, oder sust heimlich, ||
oder offembar und sunderliche gebot, die gemachet sein oder gemachet werden, do wider weren oder den egenanten sachen dheynerleye schaden brengen mochten, so meynen, gebieten, seczen, lewtern und erclaren wir von rechter wissen, mit crafft dicz brieves und keyser¬ ||
licher mechte volkomenheit, das sie unkrefftig sein sullen und widerrufen vorderben und vornichten, dieselben mit derselben, unser keyserlichen mechte volkomenheit gleicherweis, als ob sie, von worte czu worte, in disem brieve begriffen weren, und ob sie auch ||
durch recht oder gewonheit worttclichen begriffen solten sein, in disem brieve, als verre sie den vorgenanten sachen, dheynen, schaden, brengen oder bringen mochten in dheynenweis, dovon vorbieten wir allermeniglichem, das nyemant disen gegenwortigen ||
brieff unserr bestetigungen gewaltes, geseczes, lewterungen, erfullungen, der gebrechen widerrufens und vornichtungen in dheyneweis, vorterbe noch dowider tu wer, aber dowider vrefelichen tete, der sal in unsere keyserlichen ungnaden swerlichen vorfallen sein ||
und sal hundert tawsent mark lotiges geldes, czu rechter penen, bestanden sein, die sullen halb in unsere keyserlichen camer werden und das ander teil sol den gefalhnen, die sulches unrecht leyden, des sint geczewge der erwirdige Ludwig erczbischoff czu Mencze||
des heiligen romischen reiches in dewtschen landen erczcanczler, , der hochgeborne Wenczlaw herczog von Sachsen und von Lunemburg, des selben romischen reiches erczmarschalk kurfursten, unsere lieben oheimen, die erwirdigen Johans erczbischoff||
czu Prage, des pebstlichen stules czu Rome legate , Peter erczbischoff czu Meidgburg, Johans czu Olomucz, unsers keyserlichen hofes canczler, Albrecht czum Lewthmuschel, Gerhart czu Hyldesheim, Fridrich czu Merseburg, Albrecht czu Halberstat, Peter czu Lubus ||
und Dyetrich czu Brandemburg, bischove, die hochgebornen Albrecht herczoge von Sachsen und von Lunemburg, Fridrich markgraff von Meissen, Albrecht herczog von Mekelmburg, Ruprecht herczog von Lignicz, unsere lieben oheimen, Przimsla von Teschin, Bo¬||
gusla von Stetyn , Heinrich vom Brige, Heinrich von Sagan und Heinrich von Littowen, herczogen, unsere lieben sweger und fursten, die edlen Johans, burggraff czu Meigdburg und grafe czu Hardecke, Heinrich von Holczten, Albrecht von Ryppen, Cunrat||
von Regenstein , Burghard von Schrapelow und Otte von Hademerslewen, graven, Grafft und Gerlach von Hoenloch, Wedeke vogt vom Berge, Petir Gast, Benesch und Wenczlaw von Wartemberg, Thyme von Coldicz, Borsze von Risumburg, Johans von Rosem¬||
berg berg, Bohusla von Swamberg, Jesko von Kossowahora, Potho von Czastolowicz, Johans von Kotebus, Reinhart von Strel, Johans und Ulrich von Biberstein und anderer, vil unserr und des reiches lieben getrewen, mit urkunt dicz brieves vorsigelt, mit unserr ||
keyserlichen maiestat ingesigele, der geben ist czu Tangermund noch Crists geburt do man czalt dreyczehnhundert jar dornoch in dem vierundsibnczigstem jare an sant Peters und Pauls tage der heiligen czwelffboten, unserr reiche in dem achtund¬||
czwenczigstem und des keysertums in dem czwenczigstem jare .

||
de mandato domini imperatoris ||
Nicolaus, camericensis prepositus