|N001|Wir Woldmar von Gots gnaden margraf ze Brandenburg und zu Lantzperch enbiten allen herren, mannen, rytteren, knechten, steten, purgern, |N002|gemeinen, schultheizzen, gepauren, armen und reichen, geystIichen und wereltlichen luten, die in der marken und dem lande ze Luzitz wonhaftig |N003|sein, und dar ein gehoren unserr genad und unsern gruez, wann wir dem alerdurchleuhtigsten fürsten und unserm genedigem herren herren KarI, romischem|N004|kunige, ze allen zeiten merer dez reichs und künige ze Beheim , seinen erben und nachkomen kunigen ze Beheim, durch besunder guet und gnaden willen, |N005|die er uns erzeiget und beweiset hat, und noch genediclich erzeigen mag ze gewinnen und zu erkrigen, unser land und erbe geben haben, und |N006|geben die marke ze Luzitz mit dem lande, steten, vesten, merkten, herren, mannen, ryttern, knechten, burgern, schultheizzen, gepouren, mit aller |N007|zugehorung, als wir ee wir von lande schiden, und seliger gedechnüzze unserr vorvaren margrafen ze Brandenburch, die selben marken ze Luzitz |N008|mit dem lande innegehabt und besessen haben, daz sye furbas ewiclichen zu dem vorgenanten kunichrich und zu der kron ze Beheim gehoren |N009|sol, als in unsern briefen, die wir dar uber geben haben volkumenlicher geschriben stet. Dar umb lazzen wir euch ledig und loz mit kraft |N010|ditz briefs eüch allesamt und idlichen besunder aller huldung, treuwen und eydes, da mit ir, uns und unsern vorvaren margrafen ze |N011|Brandenburch und ze Luzitz verpunden gewesen seyt und leiten und weisen euch an den vorgenanten unsern gnedigen herren, den romischen kunig |N012|und konig ze Beheim, sein erben und nachkomen kunigen ze Beheim und gebiten euch erenstlich und vesticlich, daz ir allesamt von euren und |N013|eurer erben wegen dem vorgenanten unserm herren, dem romischen kunig, seinen erben und nachkomen kunigen ze Beheim, hulden, sweren und geloben |N014|sult, getrewe, gehorsam und undertenig ze sein ewiclich als ir, euren rechten erbherren, billich und zu recht ze tun phlihtig seit, wann wir |N015|geloben euch mit guten trewen an geverde, daz wir euch allesampt und iglichen besunder wenn wir dez ermant werden, huldung, treung |N016|und eide ledig sagen und lazzen wollen. Mit unser selbes mund und euch an den vorgenanten unsern herren, den romischen kunig und kunig ze |N017|Beheim, seine erben und nachkomen kunig ze Beheim, weisen und leiten wollen on furgetzog und an alles hindernuzze. Mit urkund ditz |N018|brifes versigelt mit unserm insigel, der geben ist ze Tempelberch pey Furstenwald, do man zalt von Crists geburt dreuczehen hundert |N019|jar, dar nach in dem acht und virzigsten jar, dez nechsten donerstags nach sand Michels tag .