||
Ich Ulrich Chramer von Sülczbach, bekenne und verich offenlich mit disem brief für ||
mich und alle mein erben, daz ich verzeich ledig und los sag den hochgeborn fürsten und ||
meinen gnedigen herren hern Rüdolffen, pfallntzgraven an dem Rine und herczog in Beyern, alle ||
der schulde und ansprach, di ich und alle mein erben hin zu meinen vorgenanten herren haben, und ||
sag ich und alle mein erben, meinen vorgenanten herren und sin erben, der vorgeschriben ansprach quit ||
und ledig mit disem brief. Und waz brief ich und alle mein erben von unserm eegenanten herren ha¬ ||
ben, di sullen alle furbaz immer mee, ewiclichen tod sin und weder kraft noch maht haben, und wo ||
mich mein vorgenanter herre zu Porgen geseczzet hat, da sol mir mein vorgenanter herr fürbaz nihtes ||
mee schuldig sin und auch doz ich um mein erben, da von nemen, da sol unser here furbaz ||
nihts mee schuldig sin, wer auch doz ich und mein erben keynen schaden genomen hetten von der ||
schuld wegen, dar umb ich für meinen vorbenanten herren behafft bin gewesen, da sol ich noch keyn mein ||
erbe keyn ansprach nimmer mee nach gehaben. Und dez zu urkunde gib ich meinem vorgenanten herren dis¬ ||
en brief, versigelt mit meinem insigel, daz dar an hanget, und der vorgeschriben stukke, artikeln und sache ||
sint durch meiner bet willen, gezewgen mein lieb herren del edel vest ritter her Kun von Reiffenberch ||
und her Heinreich von der Wysen, ein ritter, zu den ziten meins herren hertzog Rudolfen hofmeister, und her Ekhart||
der Rehsse, ein ritter, meins vorbenanten herren obrigster schenkke . Der brief ist geben zu Sulczbach, ||
do man von Kristus geburt zalt drewczehen hündert jar, dar nach in dem ahten und viertzigsten ||
jar an dem nehsten donerstag nach sant Nyclas tag, des heyligen bischolfs .