||
Wir Fridrich von Gotes gnaden lantgraf zcu Duringen, marcgraf zcu Myszen in dem Osterlande unde zcu Landesperg, graf zcu Orlamunde unde herre des landes zcu Plyssen, voriehen ||
unde tun kunt offenlichen mit disem brief allen den, die in sehen, horen oder lesen, daz wir durch gemeines nutzces willen frides unde gemaches unserer lande beidersit unde auch umb sunderer ||
fruntschaft begerunge und liebe, die uns darzcu leitet, uns mit dem allerdurchluchtigsten fursten unde unserm gnedigen herren hern Karl, Romischem kunge, zcu allen zciten merer des reichs unde kunge||
zcu Beheim zcu Beheim, unde den hochgeboren fursten unde herren Johansen, herzcogen zcu Kernthen, graven zcu Tirol unde zcu Gortz, unde Wenczlawen, sinen brudern, iren erben unde nachkomen kungen zcu Beheim ||
und der cronen da selbes marcgrafen zcu Merhern unde grafen zcu Lutzcemburg von unsers unde der hochgeborn Friderichs, Balthazars, Ludewiges unde Wilhelms, unser sune, und aller unser unde ||
irerr erben unde nachkumen, wegen fursten unde herren der vorgenanten unserr herschefte und lande mit vollem rate und mit wolbedachtem mut voreint unde vorbunden haben, und voreinen unde ||
vorbinden uns mit disem gegenwertigen brief und geloben mit geswornem eide in guten truwen on alles geverde, daz wir unde die vorgenanten unser sune Friderich, Balthar, Ludwig, Wilhelm und unser aller ||
erben unde nachkomen lantgraven zcu Duringen, marcgraven zcu Myszen in dem Osterlande unde zcu Landesperg, grafen zcu Orlamunde unde herren des landes zcu Plyssen in allen iren erben unde nach¬ ||
komen kungen zcu Beheim unde der cronen doselbis, marcgraven zcu Merhern unde grafen zcu Lutzcemburg zcu behalden ire furstentum, erbe, lande, herschefte, gut, ere und gewonheit, die sie yzcunt ||
haben oder noch erkrigen unde gewinnen, wie oder von welchen sachen, die an sie quemen, ewiglichen beholfen sullen unde wollen, sin wider allermenlich niemanden uzzcunemen von den sie angegriffen ||
gehindert oder beschedigt wurden, oder wen sie angriffen, hindern oder beschedigen wolten in dheinewis nach dem als der hulfe in zcu widersten oder sie anzcugriffene not wirt, so wir beste mugen ||
on geverde. Unde des zcu urkunde unde ewiger gedechtnuzz haben wir Friderich, lantgrave zcu Duringen, marcgrave zcu Myssen in dem Osterlande unde zcu Landesperg, graf zcu Orlamunde, unde herre des ||
landes zcu Plyssen und wir Fridrich und Balthazar, sine sune vorgenanten unser insigel gelegt an disen brief unde uber daz geloben wir alle dri mit gesammenter hant, mit geswornem eide in guten ||
truwen on geverde, vor die vorgenanten hochgeborn Ludewigen unde Wilhelm, unser kinde unde bruder, wenne sie mundig werden, unde zcu iren tagen kumen, daz sie alle dise vorgenanten vorbuntnizze, eide ||
unde gelubde vollfuren sullen, unde ire insigel legen an disen brief, were aber daz sie von hindernuzz oder von deheinen sachen, welcherlei die weren an disen brief nicht quemen, dennoch sal diser gegen¬ ||
wortige brief alle kraft haben und in allen den gelubden eiden vorbuntnuzz und macht beliben, als ob derselben unser kinde und bruder insigel daran kumen weren. Auch ist bi namen geteidingt und geredt, ||
daz alle vorbuntnuzz gelubde stucke, teyding unde artikel, die zcwischen dem vorgenanten unserm herren, dem romischen kunge unde kunge zcu Beheim, uns unde unsern erben bevestent und beschriben ||
sint in allen iren kreften, ewiglichen sin und beliben sullen, nach brieve lute, die daruber gegeben sint. Unde wann wir oder unser vorgenanten sune, unser unde ire erben, oder wer von unsern, iren unde ||
unserer erben wegen in unsern unde iren landen und herscheften gewaldig ist von dem vorgenanten unserm herren hern Karl, sinen brudern und iren erben mit brieven oder mit boten umb hulffe ge¬ ||
mant werden, so sullen wir binnen fier wuchen, die nach der manunge allerschirst sich nach einander volgen unde ergen, in zcu hulfe kumen in aller wise, als vor geschriben stet. Des sint gezcug ||
die edeln Bothe von Turgow, herre zcu Arnow, her Sbinke von Hasenburg, des vorgenanten unsers herren cammermeister her Benesch von Wartenberg, herre zcu Tethzin, her Jeske von Cravar, Bothe ||
von Turgow des Bichin , ist Fridrich von Schonenburg, des Crymatschow, ist Thime von Kolditz, unser marschalk, unde Alber von Maltitz, unser hoverichter, unser lieben getruwen. Mit gezceuge ditz ||
briefs, der gegeben ist zcu Dresden nach Gotes gepurd dryzcehen hundert iar, darnach in dem acht unde fierzcigesten iar an send Thomastag, des heilgen zcwelfpoten.