||
Wir Eberhart und Ulrich gebrüder, graven von Wirtenberg, verjehen offenlich an disem brief, das die ersamen herren, her Johan von Liehtenberg tümprobest zu Strazburg, her ||
Jesco probest zu Allen heyligen uf der pürg ze Prage, her Jöhel Jacob burger ze Prage und Paul camerschreiber, von wegen des aller durchlühtigen unsers gnedigen ||
herren, herren Karls romischen künigs und künigs ze Beheim, uf ein seit, Eglolf von Friberg, unser diener, und Ulrich, unser schreiber, von unsern wegen uf die andern ||
seit bis uf disen hiutigen tage, als dirre brief geben ist, gerechent haben, und mit rechter rechenung erfunden und uzgetragen haben, das die zwelf tusent mark ||
silbers, da wir des vorgenanten unsers herren, des romischen künigs brief über haben, von den ersten tedingen, die er mit uns hette, und die sechs tusent guldin ||
von der stiuwer der stette in Swaben, die er uns bescheiden het und dar nach die stet ledig liez und über sich nam, von dem selben unserm herren dem römischen ||
künig uns gar und genczlich bezalt und verrihtet sint bis uf fünfzehen tusent driu hundert fünf und niuntzig güter guldin, die ze Nürenberg genge und ||
gebe sint, die der vorgenant unser herre der römisch künig uns noch sehuldig beleibt. Und dar umbe haben wir den selben unsern heren den künig aller der vorge ||
schribenn summen geltes bis uf fünfzehen tusent driu hundert und fünf und niuntzig guldein quit, ledig und lose gesagt und sagenn ouch ledig und los ||
mit disem brief. Wan ouch der vorgenant unser herre der künig der selben fünfzehen tusent driu hundert und fünf und niuntzig guldin uns versichern und ||
gewiz machen wil, als das sinen küniclichen gnaden wol an zimpt, so hat er uns die selben summen geltes bewiset und bescheiden uf siner urbor und münsze ||
zu den Chutten also bescheidenlich, das wir oder unser botten von unsern wegen, an dem nehsten montag nach dem obrosten tage, der nu schierst kumpt, an ze heben, ||
alle wochen drizzig pergmark, für ie die mark sechs und fünftzig grosse ze rechenn, ufheben und innemen süllen ane alle hindernüzze, gebrechen und fürzog ab ||
ze slahen als lange, das uns die vorgenanten fünfzehen tusent driu hundert and fünf und niuntzig guldein und dar zu ze ie der wochen ein pergmark zu ||
kostgelt gar und genczlich verriht und bezalt werdent. Were ouch, das uns an der selben bewisunge und bescheidung der egenanten drizzig mark wochenlichen dehein ||
hindernüzze oder bruch geschehe, von welhen sachen das were, so mügen wir den obgenanten unsern herren mit unsern alten briefen manen umb den selben bruch, ||
der uns denn geschehe, und sol er uns nach der manung dar umbe leisten nach der selben unserre alten brief sage als lange, bis er uns den selben bruch umb alle ||
wochen, die uns ze hindernüzze versumet weren, mit sampt dem wider angendem gelt genczlich erfüllet und ufgerihtet. Und des ze urkünde ist dirre brief besigelt ||
mit unserm grave Ulrichs insigel, under dem wir grave Eberhart der vorgenant uns bekennen der vorgeschribenn dinge, und mit Eglolf von Friberg und Ulrichs unsers||
schreibers , der vorgenanten, insigeln, die si ze einer geziugnüzze der vorgeschribenn dinge gehenket hant an disen brief, der geben ist ze Prage an dem Uffart abent||
do man zalt von gotes geburt driuzehen hundert jare und in dem ein und fünftzigesten jare, .