|N001|Ich Wilhalm von Hoen Rechperg vergich und tun kunt offenlich mit disem brive, daz ich dem allerdurchleuchtigistem |N002|fursten und herren hern Karl Romischen kunige, ze allen zeiten merer des reichs und kunige ze Beheim, |N003|meynem lieben genedigen herren, gelobt habe und gelobe mit guten trewen one geverd, daz ich im alle |N004|brife, die mein vater seliger von im gehabt hat uber die steur ze Ulm, wider geben wil zwischen |N005|weynachten, die schirest kumftig sein. Und ob ich des nicht tete oder sust deheinerley sumnuzze dor in |N006|keme, so bekenne ich mit meinem guten willen, daz die selben brive, ob si ymmer zu lichte kemen, |N007|untuglich und unkreftig sein und wesen sullen, und daz sie dem obgenanten meinem herren oder seinen nach |N008|komen romischen keysern und kunigen, und ouch den kunigen ze Beheim keinen schaden bringen |N009|sullen. Mit urkunde dicz brives, versigelt mit meynem ingesigel, der geben ist ze Prag, do |N010|man zalt nach Cristus gepurt dreuczehen hundert jar, dar nach in dem zwei und fumfzigistem jar|N011|an dem nehsten montag nach santh Michels tag .