||
Wir Rudolf von Gocz gnaden pfallenczgraf bi Rine, herczoge in Beygern, dez heiligen romischen richs obrister trugsecze und ||
vicarii in tuschen landen, bekennen uns offenlichen mit disem briefe, alz wir den edeln herren Ulrichen und Johansen, gebrüdern||
lantgrafen von Leutenberig , unsern lieben oheim, schuldig sin und gelten sullen zwei tusent guldin florin guter und geber, ||
umb ir dancknemen dienst die sie uns biz her getan habent, und noch furbaz tun sollent und mögent, und och umb daz, daz ||
si unsern rat gesworn habent. Und wir si der selben zweier tusent guldin solten bewiset han nach dez edeln herren, ||
unsers lieben öheims, Johansen burgrafen von Nurenberg, rat, alz sie dez briefe von uns dar umb habent, dez bewisen, ||
wir sie und ir erben der selben zweier tusent guldin uff aller pfantschaft die sie von uns inne habent, es si von unsers ||
vettern, keyser Ludwigs seligen, wegen daz uns zu teil ist an gevallen oder die sie von uns inne hant nach irre ||
briefe sage, die si dar über hant und sollent, die selben pfantschaft inne haben nuczen und niezzen nach allen rechten, ||
alz ir briefe sagent, die si vor dar über hant alz lange, biz daz wir sie oder unsere erben von in oder iren erben umb die ||
vorgenanten zwei tusent guldin zu der summe gelcz, die in vor dar uf verschriben ist nach irr briefe sage erledigen und erlösen ||
gar und genczlichen ane geverde. Were och, daz wir oder unser erben, si oder ir erben die vorgenanten zwei tusent guldin ||
bewisten uff unsern zellen oder sust anderswo, da si irs gelcz sicher sin, so sol die vorgenant unser pfantschaft umb die ||
vorgenanten zwei tusent guldin uns und unsern erben von in und iren erben ledig und loz sin ane widerrede und ane ||
allez geverde. Und dez zu urkunde geben wir in disen briefe, besigelt mit unserm insigel, der geben ist zu der ||
Nuwenstat an sampcztag nach sant Martins tag nach Cristus geburt druzehenhundert jar und dar nach||
in dem zwei und fumfzigisten jare .