||
Wir Karl von Gots gnaden romischer kunig, ze allen zeiten merer des reichs und kunig ze Behem, Albrecht, hertzog ze Osterreich, ze Steyr und ze Kernden, Johans, margraf ze||
Merhern , und Rudolf, des obgenanten hertzog Albrecht, erstgeborner sun, von denselben Gots gnaden, vor uns selber und alle unser bruder, bechennen und tun chund offenlich mit disem ||
brief allen den, die in sehent oder horent lesen, daz wir durch angeborne liebe luter, trewe und stete, freuntschaft, die von gemeinscheffte der geburde und des geslechts alleweg ||
zwischen uns gewesen sind, und mit hilff Gots sullen ewichlich unverrukcht in freuntlicher guter sazze beleiben, ze sunderlichem troste und gnaden unser getrewn undertanen, uns allesampt ||
mit wolbedachtem mute, mit rate unserr fursten, herrn und ouch getrewn mit rechter wizzen, zesamme verbunden haben und verpinden uns vor uns und unser erben ewichlich in guten ||
trewn an geverde und mit dem eyde, den wir allesampt daruber gesworen haben, uf den heiligen ewangelien und geloben in chreften derselben verpuntnuzze in guten, steten, trewen, daz ||
wir indwendig den kreizzen und gemerken unserr kunigreich furstentume und herschefte, die uns von erbschaft angehorent, und die wir ytzund innehaben oder mit hilfe Gots ||
furbaz noch gewinnen, einander getrewlich und freuntlich beholfen sein wellen und sullen wider allermenilich, nymant auzgenomen, und in den zeiten, so eins oder mer wenn eins wider ||
uns kunigreich, furstentum, herschefte und lande veintlich angriffen werden, so sullen und wellen wir andern zehant, alz wir dez ermanet werden, an ufschub und an allz verziehen ||
dem oder denselben mit leib oder mit gute rat, hilf, gunst und bruderlich liebe mit aller macht beygestendig und geholffen sein uf unsern aigen schaden und verlust, die weil ||
wir leben wider einen iglichen menschen und persone in welichen eren oder wesen, der sey und ob er ouch in kuniglichen wirden were, nymant auzzenemen, alz da vor begriffen ||
ist, auzzenemen doch den kunig von Ungern, wann wir mit dem in allen den punden beleiben sullen, alz die brif sagent, die wir obgenanter romischer kunig, die weil wir margraf ||
ze Merhern waren, und seliger gedechtnuzze die hochgebornen fursten her Karl ze Ungern und her Johans ze Behem kunige und her Ott, hertzog ze Osterreich und wir obgenanter hertzog||
Albrecht und ouch wir, obgenanter Johans, margrafe ze Merhern, in den zeiten graf ze Tirol, einander geben haben, wann diselb brif und punde unverrukchet und unzebrochen beleiben, ||
sullen in solicher beschaidenhait, waz vesten lande, burge und stette in des landen gewunnen werden, der unserr hilff begeret, daz die demselben ungehindert beleiben sullen, ||
aber varunde hab und gevangen mag und sol unserr iglicher ze seinem nutze behalten, der si mit seiner arbaitt erchrieget und gewinnet und in welichs hilff wir sein, ||
der sol uns kost geben, brot, weyn, und pyer, nach der lande gelegenhait alle die zeit, und wir in seiner hilff beleiben, und die obgenanten verpuntnuzze gelubde und eyde ge¬ ||
loben. Und wellen wir stete und unverrukcht haben und halden, und dawider nymmer getun, noch streben mit dem rechte oder mit der tat geleich oder abwegs mit werken, ||
worten, sinnen, entschuldigung, helfrede oder varben, selber oder mit ymant anders haimleich oder offenbar, oder sust in dhainen weis, wie man die kan oder mag sunderlich benennen. ||
Mit urchund ditz brifs, versigelt mit unsern insigeln, und wir Rudolf dez obgenanten hochgebornen fursten, hern Albrechts, hertzogen ze Osterreich, erstgeborner sun, umb daz wir ||
aigens insigels nicht haben, so geloben wir die obgenanten puntnuzze, gelubde und ayde in aller der weis, alz da vor begriffen ist vor uns und alle unser bruder, ||
gantz stete und unverrukcht ze haben und ze halten gleicher weys, alz ob unser selbs insigel gehangen were an disem brif, der geben ist ze Wienn, do man zalt ||
nach Krists gepurde dreutzehen hundert iar und darnach in dem dreu und fumftzigistem iar dez nesten donrstags vor dem Palmtage, und unserr dez obgenanten ||
Romischen kunigs reiche in dem sibenden iare.