||
Wir burgermeister, ratlute und die burger gemeinlich der stat zu Hyrzberg bekennen und tun kunt offenlich mit diesem brive allen den, die in sehen oder horen lesen, wann der hochgeborn furste und herre her Bolke, herczog von Slezien und herre czu Furstemberg||
czur Swydnicz und czu dem Jawer, , unsir liebir gnediger herre, mit wolbedachtem mute, mit gutem willen und mit rate seiner getruwen manne angeschen hat die besundere frunschaft und ouch die sundirliche truwe, do mit er die allirdurchluchtigste furstinne und ||
frowen frowen Annen, romische kunigin, ze allen zeiten mererin des reichs und kunigin ze Beheim, etwenn seliger gedechtnuss herczogen Heinrichs, seines bruder tochter, unsir gnedigen frowen, begriffen hat und von angeborner gute stetichlichen meinet. Und ||
hat ir der obgenanten unser frowen und ires leibes erben beydes geslechtis, dy mit dem allirdurchluchtigsten fursten und herren hern Karln, romischem kunge, ze allen czeiten merer des reichs und kunge zu Beheim, gewinnet, alle seine furstentum, herczog- ||
tum und herschefte zu der Swydnicz und zu dem Jawer mit allen andern steten, vesten und zugehorungen verschriben und vermachet in all der mazze, als in seynen furstlichen briven, do noch begriffen ist in semlichem lute. Wir Bolke von Gots gnaden herczog||
von Slezien, herre von Furstemberg, zu der Swydnicz und zu dem Jawer , bekennen und tun kunt offenlich mit diesem brive allen den, die in sehen oder horen lesen, daz wir haben angeschen die sundirliche gnad und fruntliche gunst des allirdurchluchtigsten fur¬ ||
sten und herren hern Karls, romischen kuniges, ze allen zeiten merer des reichs und kuniges ze Beheim, unsirs lieben gnedigen herren, die er uns und unsirn geschlechte beweiset hat mit der konschaft, die geschehen ist zwisschen im an eynem teile und der durch¬ ||
luchtigen furstinne frowen Annen, der romischen kunigin und kunigin ze Beheim, unsir lieben frowen und mumen, etwenn herczogen Heinrichs seligen unsirs bruder tochter an dem andern, und dorumb geben machen und verschreibn wir der obgenante unser ||
lieben frowen und mumen, als einer kunigin cze Beheim und ires leibes erben, di sie mit dem obgenanten unsirm herren dem kunige haben, wirdit unser herczogetum, furstentum und herschefte czu der Swydnicz und czu dem Jawer mit den stetten Swydnicz, Strygom, Hayn, ||
Landishut, Reychenbach, Nympcz, Jawer, Lewemberg, Hyrzberg, Bunczlaw, und Czoboten mit den vesten und merkten Greyffenstein, Greyffemberg, Len, Schonow, Kliczchdorf, Hornsperg, und Kynsperg mit allen mannen, manscheften, lehen, lehenscheften, furlehen¬ ||
ten guten, gerichten, czollen, munczen, cinsen, gulden, kreizzen, wichpilden, kirchlehen, pfrimden, und Gots gaben, welden, pusschen, bergen, slichten, wazzern, wazzerlouften, molen, wysen, weiden, geieide, vogehuride, rechten, nuczen, gewohnheiten und alle czugeho¬ ||
rungen, wie man die lennennen mag, mit sunderlichen worten, nichtisnicht uzzenemen in all der mazze, als wir ez czunt haben, und her noch mit rechte czu uns brengen, mochten, insulch bescheidenheit, bei daz sache, das wir von Gots verhenknisse also verscheiden, ||
das wir eliche leibes erben mannes geslechte hinder uns nicht lazzen, daz denn die obgnante unsir gnedige frowe und liebe mume und ires leibes erben, die sie mit unsirn herren dem kunge haben wirt, als do vorgeschrieben stet, die selben unser herczogtum, fursten¬ ||
tum, herschefte, land, lute und all ander czugehorunge, als do vor begriffen ist. Erben und besiczen sol genczlichen ungehindert und do mit tun und lazzen noch frey willekur als mit irem eigenn erbe unschedlich, doch der hochgeborn furstinne frawen Agnesen, ||
unser elichen wirtinne in irem leibgedinge, wann sie all die vorgenante furstentum, land, herschefte, mit allen nuczen haben und besiczen sol, nur czu iren lebtagen, wer abir daz wir mit gnaden Gots eliche leibes erben mannes geslechte gewunnen, so sullen ||
di selben unser erben der obgenanten unser frowen und mumen ad ires leibis erben, ob sie nicht wer czehentusent schock grozzer pfennige pregischer muncze mit gereitem gelde berichten und bezalen odir die vesten Lewenberg und Bunczlaw mit wich¬ ||
pilden, vesten, rechten, nuczen und zugehorunge czu rechtem pfande seczen als lange, uncz daz sie die obgenanten czehenthusent schock genczlich berichten und beczalen und do mitt sullen, denn die selben unser erben bei den obgenanten unsern furstentum, herscheften ||
und landen ungehindl bleiben, wer ouch daz wir eliche leibes erben mannes geslechte nicht hetten und doch tochter liezzen, so sullen die obgenanten unser gnedige frowe odir ires leibes erben, die sie mit unsirm herren dem kunge gewinnet, igtlicher unser tochter ||
czehenthusent schock grozzer pfennige geben und sie bestaten noch rechtir gewonheit als gebornen fursten kinder. Ouch haben wir gelobt und geteidingt bei daz sache, daz die obgenante unsir eliche wirtinne unsirn tot gelebtem, daz sie denn noch der czeit unsers ||
todes keynen burggraven, pfleger odir amptman auff vesten, husern in steten odir in landen verkeren, endern adir wechschen sol, ez sei denn daz sie einen byderman, der do gleich gut und gewiss sei dem ersten an sein stat secze an dem der obgenanten unser ||
frowen odir iren erben möge billichen gnugen, und daz der selbe czu vor sich, allir gelubde, eide und truwen vorbunden habe der obgennante unser frowen der kunigin odir iren erben, gleich seinem vorfaren an des stat er geseczet wirdet, wer ouch daz die obgennante unser ||
gnedige frowe und liebe mume wartende des obgenanten annalles, ee wann sie in gewer keme also sturbe, daz sie leibes erben mit dem obgennante unsern herren nicht gewinne, so sullen alle man, ritter, knechte, burggraven, burger und alle lancsezzen allir ||
der obgenannten eyde und gelubde ledig sein. Doch in sulcher bescheidenheit, daz dem obgennanten unsern herren dem kunige und seinen erben, daz obgenante egelt und heymsteur der obgenanten czehentusent schock gevallen sol odir mit pfanden gesichert wenden in ||
all der mazze, als do vor begriffen ist, daz sie do mit tun und lazzen noch frey willekur. Und daz geben, wenn sie wellen, wer ouch daz die obgenante unser frowe und mume den obgenanten unsern herren den kunig ubirlebte und einen andirn man neme ||
an unsern dank und willen, so sullen beide sie, der man und alle kinth, die sie mit in gewinnet, in den obgenanten furstentum und herscheften nichtes haben. Ouch ist geredet und geteidinget, daz die obgenante unser frowe die kunigin und unser liebe ||
mume noch ymand von iren wegen uns und unser erben mannes geslechte umb keynerlei erbeteil odir umb keine ander sache anreden odir ansprechen sullen andirn, wenn do vor geschrieben ist. Ouch meinen und wellen wir sei daz sache, daz uns ||
chaftige not antreten wirdet umb genangnuss crick odir andir geschichte unser odir unser manne, ere und leib czelosen, daz wir denn der selben unsir furstentum, land und lute gewaldig sein cze tun und cze lazzen, doch in guten trewen und ane alle geverde, ||
dornoch sint dem mal, daz uns der obgenante unser genedigen herre mit sulchen seinen gnaden gunstlich und fruntlich begrifen hat, so globen und wellen wir im mit guten truwen an geverde beigestendig und beholfen sein wider allirmenlichen niemand ||
uzzenemen und in nymmer undiwegen zulazzen. Mit leibe noch mit gute und alle seine veinde sullen unsir veinde sein, und meinen und wellen ouch keine seine widersachen und veinde cristen, juden oder heiden in unsern landen, husen, hoven, halden ||
oder vorteidingen, die wider daz recht sein und nicht recht tun wellen, die gunnen wir im und seinen amptluten, das sie die selben angreiffen und rechtvertigen sullen und mogen, wo sie der bekomen in allen unsern herscheften und landen. Mit ||
urkunde diccz briefs versiegel mit unsirn grozzen ingesiegel, der gegeben ist czu der Swidnicz noch Crists geburt dreiczehenhundirt in dem drey und funfzigstem jar an der nehesten mitwochen noch santh Petirs und Pawils tag der heyligen czwelf¬ ||
boten, dovon durch sundirlich gebot des obgenanten fursten und herren herczog Bolken, unsers lieben gnedigen herren, der uns daz geboten und geherzen hat mit lebinder styme und in offembarer gegenwertikeit seiner edeln getriwen manne, so haben wir mit ||
wolbedachtem mute, mit worte, gunst, willen und wizze der ganczen gemeinschaft, aller unser mitburg der obgenanten allirdurchleuchtigsten furstinne der romischen kungin und kungin cze Beheim frawen Annen, unser gnedigen frowen, und iren leibin erbin, ||
die sie mit dem obgenanten fursten und herren kunig Karls, wem elichem wirte gewinnet, gehuldet, gelobt und gesworn, hulden, globen und sweren, daz wir, wenn czu sulchen schulden komet, als dovor geschriben stet, in unsirs herren herczog Bolken bri¬ ||
ven ir und den selben iren leibes erben, wenn sie die mit hilfe Gots gewinnet, getruwe, gehorsam, wartende und undirtenig sein wellen und sullen, als unser naturlich und angeboren herschaft in all den punkten, meynnugen und artikeln und ||
in all der mazze, als die obgenanten unsirs herren herczogen Bolken brive sprechen, usgenomen doch den artikel, der czu leczsten in den selben brive stet, umb di hilfe, die beide der obgenante kunig Karl und ouch unser herre herczog Bolke einander tun ||
und leisten sullen, wann uns die selben gelubde nicht angeben. Und czu den andern unsern sachen darauff wir gehuldet und gesworn haben nicht gehoret. Mit urkund diecz brifs, versiegelt mit unser stat ingesiegel, der geben ist czu der Swydnicz ||
noch Crists geburt dreiczehennhundert, und dor noch in dem drey und fumfczigsten jar, des nehsten donrstags noch santh Petirs und Pawels tage, der heiligen zwelfboten.