||
Wir burgermeystir, ratluyte, und dy gancze gemeynschaft allir unsir miteburger der stat czu dem Bunczlow bekennin und tun kunt offinlich mit disim brife allen den, dy in sehin adir horin lesin, wen der hochgeborn furste und herre her Bolke, herczoge von Slezien||
und herre czu Furstemberg, czur der Swydenicz und czu dem Jawir , unsir libir genedigir herre, mit wolbedachtem mute, mit gutin willin und mit rate synir getruwen mannin, angeschin hat, dy besundirn frunschaft und ouch dy sundirliche truwe, do mite her dy allirdurch¬ ||
luchtigste furstinne und vrowin vrowin Anna, romische kungin, cze allin czytin merern des richis und kungin cze Behim, etwen selgir gedechnisse herczogin Heynrichs, unsirn heren, synis brudir tochtir, unsir gnedigin frawin, begriffin hat und von angebornir ||
gute stetiklichin meynit und hat ir, der obgenanten unsir vrowin und iris lybis erbin beydis geslechte, dy sy mit dem allirdurchluchtigsten fursten und heren hern Karl, romischim kunge, czu allin czytin merer des richis und kunig czu Behim gewinnit, alle sinne furstentum, her¬ ||
czogtum und herschefte czu der Swidenicz und czu dem Jawir mit allin andirn stetin, vestyn und czu gehorungin vorschribin und vormacht in alle der mase, als in synin furstlichin brifin, do noch begriffin ist in semlichin luyte. Wir Bolke von Gotis genadin herczog von Slezien, her¬||
re von Furstinberk, czu der Swydenicz und czu dem Jawir , bekennin und tun kunt ofinlich in disin brife allen den, dy in sehin adir horin lesin, das wir habin angeschin dy sundirliche gnade und furstliche gunst, des allirdurchluchtigsten furstin und herren hern Karls, romischin||
kungis, czu allin czytin merir des richis und kungis czu Behim , unsirs libin gnedigin herrin, dy her uns und unsirn geslechte bewysit hat mit konschaft, dy geschehin czwischin im an eyme teyle und der durluychtigistem furstyn vrowin Annan, der romischin kungin und kungin||
cze Behim , unsir libin vrowin und mumin, etwenn herczogin Heynrichs, selgin unsirs brudir tochtir, an dem andirn, und darimb geben machen und verschribin wir der obgenante unsir libin vrowin und mumin als eynir kunigin czu Behim und iris libis erbin, dy sy mit dem obgenanten un¬ ||
sir herrin, dem kunge habin wirdit unser herczogetum, furstentum und herschaft czu der Swidenicz und czu dem Jawir mit den stetin Swidenicz, Strgom, Hayn, Landishut, Rychmbach, Nymczsch, Jawir, Leuberk, Hirzberk, Bunczlaw und Czobotyn mit den vestyn und merktin Gryfin¬ ||
steyn, Gryfemberk, Len, Schonov, Kliczschdorf, Hornsberk und Kynsberk mit allin mannin, manscheftin, lehin, lehinscheftin, vorlehntim gute, gerichtin, czollin, munczin, cinsin, guldyn, creysen, wychbildir, kirthin, pfrudin und Gotis gabin, weldin, puschin, bergin, slichtin, wassirn, ||
wassirloyfte, molin, wesin, weyden, geieide, vogilweide, rechtin, nuczczin, gewonheytin und allin czugehorungin, wy man dy bennennen mag, mit sundirlichin wortin, richtis, nicht usczunemin in alle der mase, als wir is czunt habin und her noch mit rechte czu uns brengin moch¬ ||
tin, insulchir bescheydenheyt, by das sache, das wir von Gotis vorhentinsse also vorschidin, das wir eliche lybis erbin mannes, geslechte, hundir uns nicht lasin das den dy obgnante unsir genedige vrowe und libe mume und iris libis erbin, dy sy mit unsirn herren dem ||
kunge habin, wirt als do vorgeschribin stet, dy selbin unsir herczogetum furstetum und herschefte, lant, luyte und alle andir czugehorunge, als do vor begriffin ist, erbin und besiczin, sal genczlich ungehindirt, und do mite tun und lasin noch vryir willekor, als mit irim rech¬ ||
tin erbe unschedlich, doch der hochgebornin furstin vrowin Agnesin, unsir elichin wirtinne in irim lypgedinge, wen sy alle dy obgenante furstintum, lant, herschefte mit allin nuczin habin und besiczin, sal nur czu irin lebetagen, wer abir das wir mit gnadin Gotis elichs lybis ||
erbin mamis geslechte gewunnin, so sullin dy selbin unsir erbin, der obgenanten unsir vrowin und mumin adir iris libis erbin, ob si nicht were czentusnit schok grosir pfennige pregischir muncze mit gereytim gelde berichtin und bezalin, adir dy vestin Lenberk und Buncz¬ ||
law mit wytbilde, vestin, rechtin, nuczin und czugehorunge czu rechtin pfande seczin, als lange, uncz das sy dy obgenanten czentusint schok genczlich berichtin und beczalin, und do mite sullin, den dy selbin unsir erbin, by den obgenanten unsirn furstintum, herscheften und lan¬ ||
din ungehindirt blybin, wer ouch das wir eliche lybis erbin mames geslechte nicht hettin, und doch tochtir liezsin, so sullin dy obgenanten unsir genedige vrowe adir iris lybis erbin, dy sy mit unsirm herrin dem kunge gewinnet, ychlich unsir tochtir czentusint schok gro¬ ||
sir pfennige gebin und sy bestatin, noch rechtir gewonheyt als gebornen furstin kindir, ouch habin wir globit und geteidingit sy da sache, das dy obgenante unsir eliche wirtinne unsirn tot gelebete, das sy den noch der czyt unsirs todis kenin burggraven, pfleger adir amp¬ ||
man auff vesten, husirn in stetin adir in landin vorkerin andirn adir wechsilin, sal is sy den, das sy einin bidirman, der do glich gut und getriwe sy dem erstin an syne stat secze, an dem der obgenanten unsir vrowin adir irin erbin mogin billichin genugin, und das der ||
selbe czu vor sich allir gelobde eyde und truwin vorbundin habe der obgennantin unsir vrawin der kunnginnen adir irin erbin, glich synim vorvarn an des stat begeseczit wirdit, were ouch das dy obgennante unsir genedige vrowe und libe mume wartinde des obgenanten Anen, al¬ ||
lis ee wan sy in gewer kome also sturbe, das sy libis erbin mit dem obgennante unsirm herren nicht gewinne, so sullin alle man, rittir, knechte, burger, burggravin und alle lantsessin, alle der obgenannten eyde und gelobde ledit sin. Doch in sulchir bescheydenheit, das dem obgennanten unsirn ||
herrin dem kunige adir sinin erbin, das obgenante egelt und heymsteur der obgenanten czentusint schok gevallin sal adir mit pfandin gesichirt werde in alle der mase, als do vor begriffin ist, das sy do mite tun und lasin noch vryir willekor, und das gebin, wenn sy wellin ||
were. Ouch das dy obgenante unsir vrowe und mume den obgenanten unsirn herrin den kunig obnlebete und eynin andirn man neme an unsirn dank und willin, so sullin beyde sy, der man und alle kunt, dy sy mit in gewinnit, in dem obgenanten unsirn furstentum und herscheftin nichtis ||
haben, ouch ist geredit und getedingit, das dy obgenante unsir vrowe, dy kunigin und unser lybe mume, noch ymand von wen wegin uns adir unsir erbin mannis geslechte umb keynirleye erbeteyl adir umb keyne andir sache anreden adir ansprechin sullin, andirs wen do vor geschri¬ ||
bin ist. Ouch meynin und wellin wir sy das sache, das unschafte no antretin wirdet umb genenknisse umb kryk adir andir geschichte unsir adir unsirn mamin, ere lip czulasin, das wir den denselbin unsir furstintum, lant und luyte gewaldik sin czu tun und czu lasin, doch in gutin ||
truwin und an alle geverde, dornoch sint dem male, das uns der obgenante unsir herre mit sulchin synin gnadin gunstlich und fruntlich begrifin hat, so globin und wellin wir im mit gutin truwin an geverde bystendig und beholfin sin widir allir menlich nymant usczunemin ||
und in nymmir undir wegin zulassin mit libe noch mit gute und alle seine vinde sullin unse vinde sin. Und meynin und wellin ouch keine syne widirsache adir vinde cristin, judin, heydin in unsirn landin, husen, hoven, haldin adir vortedingin, dy widir das recht sein, ||
und nicht recht tun wollin, dy gunnen wir im und synen amptluytin, das sy dy selbin angrifin und rechnertigin sullin und mogin, wo sy dy bekomen in alle unsirn herscheftem und landin. Mit urkunde dis brifis, vorsigilt mit unsirn gresin ingesigil, der gegebin ist czu der ||
Swidenicz noch Cristis geburt dryczenhundirt in dem dry und funfzigistin jare an der nehistin metewochin noch sente Petirs und Pawils tak, der heyligin czwelfbotin. Dovon durch sundirlich gebot des obgenantin furstin und herrin herczog Bolkin, unsirs libin ||
genedigin herrin, der uns das gebotin und geheysin hat, mit lebindir stumme und in offinbarir kegniwartikeyt, synir edelin, getriwin, manin, so habin wir mit wolbedachtim mute, mit worte gust, wissin und willin der ganczin gemeynschaft, allir unsir meteburger, der ||
obgenanten allirdurchleuchtigsten furstinne, der romischin kunginnen und kunnginen czu Behim, frawin Annan, unsir gnedigin vrowin und iris lybis erbin, dy si mit dem obgenanten furstin und herrin kunig Karl, irim elichin wirte, gewinnit, gehuldit, globit und gesworn, ||
huldin, globin und swern, das wir, wen is czu sulchin sachin kunt, als dovor geschribin stet und vudutenk syn wollin und sullin, als unsir naturlichir und angebornir herschaf in allin den punkin, meynnugin und artikiln und in allir mase, als dy obgenanten unsirs ||
herrin herczogin Bolkin brifen sprechin, usgenomin doch den artikil, der czu leczstin in den selbin brifen stet um dy beyde der obgenante kunig Karl und ouch unser herre herczog Bolke, eynandir tun und leystin sullin, wen uns dy selbin gelobde nicht an¬ ||
gen. Und czu den andirn unsirn sachin, daruf wir gehuldit und gesworn habin nicht gehorit. Mit urkude dis brifis, vorsigilt ist mit insir stat ingesigil, der do gegebin ist czu der Swydenicz nach Cristis geburt dryczenhundirt jar do noch in dem dryundfunf||
czigistim jare, des nehistin donrstagis noch sente Petir und Pauwils tak, der heyligin czwelfbotin¬ .