||
Wir Baldwin von Gots gnaden erczebischove zu Tryere, des heiligin reichs erczcanczler durch Welische lant und daz kungrich zu Arle, bekennen und tun kunt offenlich ||
mit disem brive allen den, die in sehent odir horent lesen, alleine die brive dez allirdurchluchtigsten fursten und herren, hern Karls romischem kungs zu allen tzeiten merer||
des reichs und kungs zu Beheim , unsirs lieben gnedigen herren, die er ubir seine pfantscheft der stat und des landes zu Eger und der vesten Flozz und Parkstein und waz ||
dorczu gehoret, gehabt hat und die auch seliger gedechtnuzze die hochgebornen fursten, ettwenne kunge zu Beheim, seine eltern durch merklichin sachin willen von dem heiligen ||
reiche behaldin und derworben haben, von widirczemer ungeschicht beyde verbrennet und verlorn sint, daz er domite sein recht nicht beweisen mag, als billich were, ||
doch, sintdemmal, daz uns dieselbe pfantschaft wol kundig ist und wir sulchir geleginheit wol und genczlich undirweisit sein, daz die obgenante stat zu Eger mit dem lande ||
und die vesten Flozz und Parkstein mit allen czugehorungen dem kungriche und der cronen zu Beheim umb viertzig tusent mark lotiges silbers, sechst halben guldin floren¬ ||
tzer gewicht fur ye die mark czu reyten, zu rechtem pfande, recht und redlichen, von wegen des heiligin reichs versetzit sind, und sein eldirn und vorvarn, kunge zu Be¬ ||
hem, in gewere und rechtir besitzunge derselbin pfantschefte gewesen sint und er noch ist uf disen hutigen tag, des habin wir angesehin die besunder gnade und ||
den nutczen, fleizz und auch die steticliche arbeyt, domit der obgenante unsir herre, dez heiligin reiches nutz und ere getrewlich undirstandin hat, und habin auch ge¬ ||
bruvet die merklichin getrewin dienst, die seine eldern, ettwenne hochgeborne kunge zu Behem, dem obgenanten reich erlichin und nuczlichin offte getan haben, wanne ||
auch das kungriche zu Behem ein edlez und wirdigez gelyet ist der, romischen cronen, so meinen und wollen wir sulchin schaden dez obgenanten kungrichs zu Behem vernuf¬ ||
ticlich undirsteen durch die besundire trewe, domit wir, als ein kurfürste dem heiligin reich verbunden sein, uf die rede, daz der obgenante unsir herre daz selbe sein kung¬ ||
rich zu Behem, durch sulchin tzweyvel icht beschedigit oder gehindirt werde. So bekennen wir mit wolbedachtem mute und mit rechter wizzen, daz die obgenante stat zu ||
Eger mit dem lande und die vesten Flozz und Parkstein mit merkten, dorfen, mit edlen und unedlen, armen und reichen, kreizzen und allen zugehorungin, die in den ge¬ ||
merken derselbin lande und vesten gelegen und gesezzen sint, dez obgenanten unsirs, herren als eines kungs zu Beheim, seiner erbin und nachkumen, kunge zu Beheim, und der cronen ||
dezselbin kungrichs rechte pfantschaft lange gewesen sein und noch sein fur fyertzig tusent mark lotiges silbers sulchis gewichtez, als dovor begriffen ist. Und diesel¬ ||
bin pfantschaft bestetigen wir mit rechter wizzen in allir der mazze, als dovor begriffen ist, und gebin dortzu unsire gunst, willen und wort, als ein ertzbischove zu ||
Tryere, der heiligin reichs ertzcanczler durch Welische lant und daz kungrich zu Arle un kurfurste dez heiligen reichs. Mit urkund dicz brives, versigilt mit ||
unserm insigel, der gebin ist czu Meincz nach Cristus geburtte dreyczen hundirt jare, dornoch in dem drey und fumfczigsten jare dez nechstin suntags nach dez heiligen||
czwelfboten santh Thomas tag .