|N001|Wir Johan und Gunther, grafen von Swarczburg, bekennen und tun kunt offenlich mit diesem brief allen den, |N002|die yn sehen odir horen lesen, daz der allirdurchluchtigist furst und herre, unser genedig herre her Karl, von Gots gnaden |N003|Romischer keiser, ze allen czeiten merer des reichs und kunig ze Beheim , mit uns und wir mit ym uberkomen und |N004|eindrechtig worden sein in dieser nachgeschriben weis, daz wir ym seinen stetten Gorlicz und Budissen, odir wem er |N005|daz entfelet tusschen, hie und wynachten schirst komend zu kaufe und zu losung geben sullen die vesten Hogirswirde |N006|mit alle ire zugehorung umb virtzehenhundirt schog groszer pfennige pragscher muntz und werung, als wir |N007|die selbe festen an uns gewonnen und kouft han, umb den ediln man, den jungen von Schonenfelt, in der zeit do sie |N008|in unsers herren und des kungreichs von Behem achte waren, und doch also were iz, daz uns herre der keiser, sein vorgenanten |N009|stette Gorlitz und Budissin, odir wem er daz entfelet, daz gelt nicht geben noch bezelten vor diesen nehesten wynachten, |N010|daz danne die vesten unser und unser erben eweclich verliben sulle, und daz die selbe vesten Hogirswirde mit allir zuge¬ |N011|horung, auz der acht sein sal und zu irm recht komen, als sie vor der acht was und doch unsirs herren des keisers, sei¬ |N012|ner nachkomen kunigen ze Beheim und der cronen desselben kungreichs ze Beheim recht lehen sei und verliben |N013|zu allem rechte, als die festen Hogirswirde ietzunt ist, und vor zyden ist gewesen, dovon geleben wir in guten trewen |N014|dem vorgenanten unsirm herren dem keiser alle ietliche dieser vorgeshcriben artikel stede und feste zu haldene und |N015|nicht dar wieder zu tun in dieheineweis, und han dorumb zu urtkunde und rechter stedekeit ich graf Johans |N016|von Swartzburg vorgenanten min insiegel an diesen brieff gehangen, und wann ich graf Gunther von Swartzburg |N017|obgenanten myn insiegel zu diesen zeiten nicht bei mir han, so haben wir beide gebruder vorgenanten gebeten und bieten |N018|an diesem briefe unsern lieben vettern grafen Heinrich von Swartzburg, herren zu Arnsteten und zu Sundirschusen, |N019|daz er zu urtkunde aller dieser vorgeschriebener sachen sein insiegel an diesen brieff henke, des ich Heinrich, graf von|N020|Swartzburg vorgenanten, mich bekennen und han durch bete willen myner vorgenanten vettern Johans und Gunthers, |N021|grafen von Swartzburg , und zu urtkunde dieser obgenanten sachen myn ingesiegel an diesen brief gehangen, der geben |N022|ist nach Cristus geburt drutzenhundert jar, dornach in dem syben und funftzigistem jar an der heiligen sant Petirs|N023|und Paulus abent .