|N001|Wir Albrecht von Gots gnaden pfalenczgraf bei Rein und herczogen zu Beyern bekennen und tun kunt offenlich mit diesem brief |N002|allen den die yn sehen odir lesen, das wir mit wolbedachtem mut und mit rat unser getruwen und ouch mit rechter wize |N003|vor uns, unsir erben und nakomen eweclich uns verczigen haben und verczihen aller der recht, anredung und ansprach, ob wir dheine |N004|gehabt haben und haben odir gehaben mochten in kunftigen ziten zu den landen zu Budissin und zu Gorlicz und zu den steten Luban, |N005|Lubaw, Camencz und andern steten, lehenen, mannen, manscheften, weipilden und kreizz, die dar zu geherent geistlich und werntlich |N006|und bei namen zu den edilen herren von Pack, von Saraw und zu dem lande zu Sarow und zu den herren von Hackenborn und irer |N007|herschafft und ir aller erben und nakomen eweclich, und was doselbes der allerdurchluchtigiste furst, unser gnediger herre herr Karl, |N008|romischir keisir, zu allen zeiten merer des richs und kunig zu Beheim , innehat und die hochgeborn fursten und herren her Johan, |N009|eczwan kunig zu Beheim , sein vatter seliger und her Heinrich, weilent hertzog zu dem Jauwir, unsir oheim seliger, innegehabt |N010|und besezzen haben und globen mit guten truwen ane geverde vor uns, unsir erben und nakomen mit gesworn eide, dem wir dor¬ |N011|uber zu den heiligen getan haben, das wir dem vorgenanten unsirm lieben genedigem herren sinen erben und nakomen kunigen zu Beheim |N012|an dem vorgenanten lande Budissin, Gerlicz und den steten Luban, Lubow, Camencz und andern steten, lehenen, mannen, manscheften, |N013|weipilden, kreizzen und allen zugeherungen, geistlichen und werntlichen und beinamen an den vorgenanten edilen herren von Pack, von |N014|Sarow und von Hackenburn, iren erben und nachkomen und aller zugeherung, nicht hindern bescheitigen ansprechen noch becrudin |N015|wollen und geloben mit guten truwen an geverde und mit dem vorgenanten gesworen eide, das wir nach den vorgenanten landen, herren, steten, |N016|mannen, manscheften und allen zugeherungen als vor geschriben stet nymmer gesten enwollen noch sollen mit ansprach anredunge |N017|noch mit dheinen sachen geistlich odir werntlich, wie man die genennen mag ez sollen, auch alle briefe und hantfesten, die wir von unsirm |N018|vater seligen odir von ymand andirs, doruber haben unkreftig, untugelich und allir sachen abesein und dem vorgenanten unsirm gnedigem |N019|herren, sinen erben und nakomen kunigen zu Beheim keinen schaden bringen, wan wir uns mit wolbedachtem mut und mit gutem |N020|rat verzigen haben und verczihen genczlich vor uns, unsir erben und nakomen eweclichen, aller derselben hantfesten und brife, ob die¬ |N021|heine zu lichte quemen odir furbracht worden. Mit urkunt ditz brifes, versigilt mit unserm insigel geben, zu Prage nach Gots|N022|geburte drutzenhundirt jar und darnach in dem acht und funfzigistem jar, am nehisten dinstag nach dem heiligen jars tag . |N023|super Budissim |N024|et Gorlicz