||
Wir Albrecht von Gots gnaden pfalenczgraf bei Rein und hertzog in Beyern bekennen und tun kunt offinlich mit diesem briefe allen den, die yn sehen odir horen lesen, daz czwisschen dem al¬ ||
lirdurchluchtigisten fursten und herren hern Karl Romischem keiser, zu allen zeiten merer des richs und kunig zu Beheim, unsirm lieben gnedigen herren, und dem hochgeborn fursten hern Jo¬||
hans marggrafen zu Merhern , unsirm oheim an eim teil, und uns an dem andirn, alle missehel auflauf und zwening dietusschen uns beidensiten untz auf diesen hutigen tag gewesen sint ||
umb alle sache gentzlich versunet und berichtet sein also, daz wir, unsir erben und nachkomen beidensiten dieselben numer zu arge geefern sullen noch wollen in deheinen zeiten in solcher geschicht, ||
daz der obgenante unsir herre der keiser unsir genediger herre sein sol und daz der marggraf von Merhern, der obgenante sein bruder, unsir frunt sei und wir dem obgenanten unsirm herren dem keiser als unsirme ||
rechten herren dienstes und gehorsams und dem marggrafen von Merhern, unsirm oheim, fruntschaft pflichtig sein sullen. Dornach mit wolbedachtem mut, mit rat unsir getrewen, mit gutem ||
willen und mit rechter wisze vor uns, unsir erben und nachkomen eweclich verzeihen wir uns, allir ansprach, vorderung und rechts, ob wir deheine mit briefen odir sust hetten odir gehaben moch¬ ||
ten in deheine weis zu der obgenanten herren, des keisirs und des marggrafen, landen, vesten und herscheften zu dem kungrich ze Beheim zu der kur und stymme, die ein kunig ze Beheim von wegen ||
seiner lande hat und haben sal an der wale eins Romischen kuniges, eins kunftigen keisirs zu Merhern, zu Polan, beide zu den landen und zu den fursten der lande zu der marken Budissen und ||
Gorlicz und zu den vesten Hirsow, Nuwestat, Storenstein, Lichtenstein die der hochgeboren fursten hern Ruprechtis des Eltirn, und hern Ruprechts des Jungern, pfalenczgrafen bei Reyn und herezogen ||
in Beyern , unserer vettirn rechtis erbe gewesen sint und die sie dem obgenanten unsirm herren dem keiser wizzentlich und rechtlich verkouft haben und zu dem landen und den nachgeschriben vesten und ||
merkten Solczbach, Rosmberg, Neitstein, Hertenstein, Hoenstein, Hiltpoltstein, Lichtenecke, Torrendorff, Frankenberg, Aurbach, Hirspruck, Laufen, Velden, und Plech, Esschenbach, Pegenicz, Husecke, Wer¬ ||
destein und Ruprechtistein, die etswan des hochgeborn fursten hern Rudolfs, seligen pfalenczgraff bei Rein und herezog in Beyern, furmals des obgenanten unsirs herren des keisers sweher und unsirs ||
vettirn gewesen sein, die auf den egenanten hern Ruprecht den eltirn und hern Ruprecht den iungern, unsir vettirn, nach tode hertzog Rudolfs des obgenanten, erbliche verfallen waren und die sie dem obgenanten unsirm ||
herren dem keiser wizzentlich, rechtlich und redelich verkauft haben und zu allen andirn landen und vesten, die der obgenante unsir herre der keiser in Dutschen landen hat, und allen yren zugeho¬ ||
rung und beinamen zu den landen des hochgeborn fursten hern Bolken hertzog zu der Swidenitz und zu dem Jauwir, unsirs oheims, und waz derselbe hertzog ynnehat, der die obgenanten herren, unsir ||
herre der keiser und der marggraf zu Merhern, unsir oheim, noch nit in gewer seint und zu Velters und Sybedat und waz dorzu gehoret und zu deheinen yren landen, vesten, burgen, stetten, ||
guten und allen yren zugehorung, wo odir in welchen landen die gelegen sint, die sie iczunt ynnehaben und globen mit wolbedachtem mut in guten truwen angeverde und mit gesworne ||
eyde, den wir doruber zu den heiligen getan haben vor uns, unsir erben und nachkomen eweclich dem obgenanten unsirm herren dem keiser und dem marggrafen zu Merhern, seinem bruder, yren ||
erben und nachkomen kunigen zu Beheim und marggrafen zu Merhern eweclichen, daz wir sie besament odir besunder umb soliche lande, vesten, burge, stete, gut und zugehorungen, wie man ||
die benennet odir in welchen landen die gelegen sint, als dovor begriffen ist, nymmer angesprechen hindern beschedigen odir betruben wollen noch sullen ane geverede und daz wir dornach mit de¬ ||
heinerlei geistlichen odir werentlichen hulfe nymer gesten, sullen noch wollen iz sullen auch alle briefe und hantfesten, die wir von unsirn vatter seligen odir von ymand andirs doruber haben un¬ ||
creftig, undugelich und allirsachen abesein, und dem obgenanten unsirm herren dem keiser dem marggrafen zu Merhern, seinem bruder, yren erben und nachkomen kunigen zu Beheim und marggrafen ||
zu Merhern, keinen schaden bringen, wann wir derselben briefe und hantfesten uns mit wolbedachtem mut, mit rade unsir getrewen und mit rechter wisze verziegen haben und verzihen ||
uns derselben vor uns, unsir nachkomen und erben, also daz sie uns unmitze und untugelich sein sullen, ob sie ymmer in deheinen zeiten virbrachtwurden odir zulichte quemen als verre sie ||
den obgenanten unsirm herren dem keiser, dem marggrafen zu Merhern, seinem bruder, yren erben und nachkomen in den obgenanten stucken zu schaden komen, doch sullen alle ander unser hantfeste ||
und briefe, von wem wir die haben sulche obgenante stucke nicht anruren, in yren cresten blibem. Ouch geloben wir vor uns, unsir erben und nachkomen bei den truwen und dem eyde ||
als dovor begriffen ist dem obgenanten unsirm herren dem keiser, dem magrgrafen zu Merhern, seinen bruder, yren erben und nachkomen kunige zu Beheim und marggrafen zu Merhern, daz wir ||
sie zu allen denselben yren landen, vesten, burgen, stetten, guten und allen yren zugehorungen als dovor begriffen ist, mit guten truwen ane geverde und bei dem obgenanten eyde getruwelich ||
und fruntlich widern wollen und sullen. Mit urkunt ditz briefes, versiegilt mit unsirm insiegil, geben zu Prage nach Gots geburt drutzenhundirt jar, dornach in dem acht und funfczigis¬||
tem iar, am nechsten dinstag nach dem heiligen jarstag . ||
Renuncciacio ||
generalis