||
Wir Albrecht der vater und Albrecht der son, genant Nothafft von Tierstein, bekennen offenlich mit diesem brief allen den, die yn sehen oder horen lesen, allein die brieve, dez allerdurchleuchtigsten fursten und ||
herren hern Karls, Romischen keisers. zu allen zeiten merer dez reichs und kunigs zu Beheim, unsers lieben genedigen herren, die er uber seyne pfantschefte der stat und dez landis zu Eger und der vesten Flozz und ||
Parkstein, und waz darzu gehoret gehabt hat, und die auch seliger gedechtnuzze, die hochgeborn fursten, etwenn kunige zu Beheim, seine eldern durch myrklicher sachen willen von dem heiligen reiche behylten ||
und erwurben von wyderzemer ungeschicht beide verbrunnen und verloren seint, daz er domit sein recht nicht bewisen mag, als billich were doch seint dem mal daz dieselb pfantschaft den kurfursten ||
dez heiligen reichs beide geistlichen und werltlich wol kundig ist, und sie ire brieve, geczungnuzze mit iren anhangenden insigelen doruber geben haben, und wir auch sulcher gelegenheit wol und genczlich under¬ ||
wiset sein, daz die obgenante stat zu Eger mit dem lande und die obgenanten vesten Flozz und Parkstein mit allen zugehorungen dem kunigreich und der cronen zu Beheim umb vyertzigtausent mark lotiges ||
silbers, sechsthalben guldein florenczer gewichtes, fur ye die mark ze reiten zu rechtem pfande recht und redlich von wegen dez heiligen reichs verseczt seint, und sein aldern und vorfarn kunige zu Beheim ||
in gewer und rechter besiczunge derselben pfantscheffte gewesin seint, und er noch ist auf diesen hutigen tag, wann auch die obgenanten kurfursten, geistlichen und werltlichen angesehen haben, die besunder gnade ||
und nuczen, fleiz und die stetig arbeit, domit der obgenante unser herre dez heiligen reichs nucz und ere getrewlichen geschaffet hat und auch geprufet haben, die mirklichen getrewen dienst, die sein eldern, ||
etwenn hochgeborn kunige zu Beheim, dem obgenanten reich erlich und nuczlich getan haben, wann auch daz kunigreich zu Beheim ein edeles wirdiges gelyd ist, der Romischin cronen so meynten und wolten, sie sulchen ||
schaden dez obgenanten kunigreichs zu Beheim vernunfticlich understeen durch die besunder trewe, domit sie als kurfursten dem heiligen reich verbunden seint auf die rede, daz der obgenante unser herre dazselb sein kunig¬ ||
rich und die crone zu Beheim durch sulchen czwyvel icht beschediget oder gehindert wurden, so habent sie bekant mit wolbedachtem mute, mit rechter wizzen und mit iren offenen brieven, daz die obgenant ||
stat zu Eger mit dem lande und die obgenant vesten Flozz und Parkstein mit merckten, dorfern, mit edeln und unedeln, armen und reichen, kreizzen und allen zugehorungen, die in dem gemerke derselben ||
lande und vesten gelegen und gesezzen seint, dez obgenanten unsers herren als eyn kuniges zu Beheim, seyner erben und nachkomen kunige zu Beheim und der cronen desselben kunigreichs rechte pfantschaft ||
lange gewesen sein, und auch noch seint vor vierczigtausent mark lotiges silbers gewichtes, als dovor begriffen ist, und dieselben pfantschaft haben dieselben kurfursten bestetigt mit rechter wizzen ||
in aller der maze, als auch dovor begriffen ist, und haben auch dorzu geben ire gunst willen und wort, als sie dez macht haben als kurfursten dez heiligen Romischen reichs, dez haben wir angesehen, ||
die redliche geczugnuzze und kuntlich underwisunge, als dovor geschrieben steet und dovon wir die obgenanten Albrecht und Albrecht von Dierstein, gesezzen in dem egenanten Egerlande, mit ||
rate und wizzen umbetwungen, mit freyer wilkur und mit wolbedachtem mute, fur uns, unser erben und nachkomen haben gehuldit, gelobet und gesworen, hulden, geloben und sweren dem obgenanten ||
unserm herren, dem keiser Karln als eynem kunige zu Beheim, seynem erben und nachkomen kunigen zu Beheim und der cronen desselben kunigreichs, daz wir gleicherweiz als wir mit der stat und deme ||
lande zu Eger und mit den vesten Flozz und Parkstein semmentlichen zu eynem rechten pfande fur die obgenanten vierczigtausent mark silbers versetzet sein, als dovor begriffen ist yn getrew holt gehorsam ||
und bigestendig sein sullen und wellen, als unserm rechten herren. Mit urkund dicz briefes, versigelt mit unsern der obgenanten Albrecht dez vaters und Albrecht dez sones genant Nothaft insigelen, ||
die dor an hangent. Geben zu Eger, do man czalte von Crists geburt drewczenhundert jar, dornach in dem acht und funftzigstem jar dez nechsten freitagis nach unsers Herren auffart tage.