||
Ich Hainrich Grozz, schultheizz, und wir die scheppfen der stat zu Nurnberg veriehen offenlichen mit disem brif, ||
daz fur uns kom in geriht Ulrich Stromair von wegen dez allerdurchleuchtigsten fursten, unsers genedigen herren ||
hern Karls, dez romischen kaisers und kunges zu Behaim, und erzeugt als reht, waz mit den ersamen mannen ||
Berhtolt, dem tucher, mit Peter Stromair und mit Hainrich, dem gewder, die sagten auf ir ayde, dez sie des ||
geladen zewge, wem umb die zwen hof zu Heuchlingen gelegen, und umb die zwen hof zu Weizzenbach gelegen ||
die Ulreich Winterstain, burger ze Nurnberg, gekauft het auf einen widerkauff von dem vesten ritter hern Hainrich ||
vom Wildenstain umb funfhundert pfunt haller, ains und ahczig pfunt und vir und ahczig haller, als der ||
brif sagt, den er daruber het den die obgenanten zeugen gesehen heten, dez het der vorgenant Ulrich Winterstain ||
mit gesampter hant frawn Agnesen, seiner elichen wirtinn, veriehen und bechant, daz sie dieselben vir hof, als ||
sie hie vor geschriben sten unserm genedigen herren dem Romischen kaiser wider ze losen solten geben zu der ||
vesten ze dem Rotenberg, alz ainem kunge ze Behaim oder seinen erben und nachkumen, welches iares sie die ||
wider losen wollen, umb so vil gelcz, als hie vor benant ist, doch also daz die losung ie geschehen, sollt virzehen ||
tage vor lihtmesse oder virzehen tage darnach, als losung reht ist on gewerde, und dez zu urkund ist im dirr ||
brif mit urteil von geriht geben, versigelt mit dez gerihcz ze Nurnberg anhangendem insigel. Geben an ||
sant Ulrichs tage, nach Gotes gepurt drewzehenhundert jar und in dem sechczigistem jar .