||
Wir Karl von Gotes gnaden roemischer keyser ze allen zeiten merer des reichs und kunig ze Behem, und wir Wenczla, sein erstgeborner ||
sun, und wir Johans von denselben Gotes gnaden margraff ze Merhern, und wir Ruodolff, Friderich, Albrecht und Leupolt von Gotes gnaden||
herczogen ze Oesterreich, ze Steyr und ze Kernden et cetera , bechennen und tuon kunt offenlich mit disem brief allen den, die in sehen oder hoeren lesen, ||
daz unser ieglicher sunderlich und wir all gemainlich, nach guoter wibetrachtung, mit rechter wizzen, gesworn haben lerplich ayde zu den heiligen ||
recht und redlich mit angerurten handen, auf das heilig ewangeli, für uns und für all unser erben und erbes erben ewiklich, daz wir, ||
mit allen unsern landen und herscheften, wo die gelegen und wie si genant sein, die wir nu haben oder hienach gewinnen, bey einander ||
beleiben und einander mit aller unserr macht ewichlich geraten und geholffen sein sullen und wellen, getrewelich, fürderlich und freuntlich, ||
mit leiben und mit guoten, ane alle geverde, wider aller menlich, nieman ausgenomen, in welichen wirden eren oder wesen, der sey in ||
solicher mazze, wer der ist oder wirdt, dem ayner under uns veynt ist oder wirdt, dem sullen wir die andern all, ze gleicher weise veynt sein, und ||
sullen ouch einander in allen sachen beygestendig und geholffen sein, alz vestiklich, alz endlich und alz ernstlich, alz unverczogenlich und alz ||
getrewelich, alz ob die sache, unser ieglichen besunder angieng und sein aygen ding, wer ane alle geverde, und arge liste, und in ||
welichen krieg, wir also mit einander vallen oder komen, gegen wem oder wa das sey oder werde, da sol sich unser dhamer nicht vertai¬ ||
ding noch berichten oder seynen, ane des andern und der andern aller wizzen, rat und willen, ouch ensol unser dhamer dham grozze ||
redliche und ernstliche oder namhaft sache verantwurtten anvahen, noch enden, noch dhame puncnuzze, mit iemanne machen, an ||
der andern aller wizzen, rat und willen, und sol ouch unser dhamer, sich selber, noch seine chind, die wir nu haben oder hienach ge¬ ||
winnen, die nicht verlobt sind, verheyratten, denn mit der andern aller wizzen, rat und willen. Daruber sullen wir ouch einander ||
getrew und gewer sein, fur all ander leutt, und sol unser ieglicher, des andern schaden, wenden sein, nucz und ere fürdern und sullen, ouch ||
einander eren und guotes verantwurten und versprechen getrewelich und freuntlich wider aller menlich, niemann ausgenomen, mit worten ||
und mit werchen, haimlich und offenbar, alz verr wir kunnen und mugen, ane alle geverde, sweg wir ouch vormals puncnuzzen ||
mit ieman, wer der ist gemacht haben, die sullen diser puncnuzze aller ding unschedlich sein. Mit urchund dicz briefs, versigelt mit ||
unser aller insigeln, der geben ist ze Prage, nach Christs gepurd dreuczehen hundert iar, darnach in dem ayn und sechczigistem||
iar, an sand Peters tag, ze der ketenseyer unser des egenanten keysers reiche des romischen in den sechczehenden, des Beheimschen in dem||
fumfczehenden und des keysertuoms in dem sibenden jare .