Karolus dei gratia Romanorum rex semper augustus et Boemiae rex ad perpetuam rei memoriam. Etsi regiae dignitatis circumspecta benignitas universis fidelibus suis, quos Romanum ambit imperium, consuetae pietatis clementia grata beneficiorum subsidia liberaliter impertitur, illos tamen quodam¹ ferventiori favore prosequitur, qui relicta praesentis seculi vanitate sub observantia regulari et debitae religionis honore nituntur² altissimae (sic, altissimo) in humilitatis spiritu iugiter famulari. In nostra siquidem constitutus praesentia honorabilis . . abbas monasterii Sanctae Coronae ordinis Cisterciensis Pragensis diocesis devotus noster dilectus maiestati nostrae duo privilegia clarae memoriae domini Wenceslai quondam regis Boemiae avi nostri carissimi praedecessoribus suis . . abbatibus et dicto monasterio Sanctae Coronae per eundem avum nostrum concessa exhibuit et ostendit, supplicans nobis humiliter et devote, quatenus praedicta privilegia ac omnia et singula contenta in ipsis approbare, ratificare et confirmare de benignitate regia dignaremur. Quorum privilegiorum tenores tales sunt: (Folgt zuerst die Urkunde vom 10. Jänner mit diesen Namenschreibungen: Notolitz - Welisslai.) Item tenor alterius privilegii talis est: (Folgt jetzt der Wortlaut der Urkunde vom 11. Jänner und darin die Namenschreibungen: Hirzo burgravius in Clingenberch - Mn^otzstat - Jenkezlag - Diecohzlag - Zkalin - Zahzlini - Mokrie Juriszlag - Klenow- Jercenzlag - Nachirnie - Budeczlag - Hirzow - Welizlai.) Nos itaque eiusdem . . abbatisqui flagranti studio et continuato fidelis amore cum fidei perfecta constantia ad nos et regnum nostrum Boemiae sincerum gerit affectum devotis supplicationibus inclinati, considerantes quoque pium et meritorium existere apud deum personas praesertim sacrae religioni dicatas specialibus confovere favoribus et ipsas et eorum monasteria circa ipsarum libertates et gratias liberaliter conservare, praedicta privilegia ac omnia et singula contenta in eis, prout de verbo ad verbum praesentibus sunt inserta, approbamus, ratificamus et praesentis scripti patrocinio de benignitate regia ex nostra certa scientia confirmamus. Nulli ergo omnino hominum liceat hanc paginam nostrae approbationis, ratificationis et confirmationis infringere vel ei ausu temerario contraire. Si quis autem hoc attemptare praesumpserit, praeter indignationem nostram poenam quinquaginta librarum auri, medietatem regali camerae nostrae et aliam medietatem parti laesae solvendam se noverit incursurum. In quorum testimonium praesentes litteras scribi et maiestatis nostrae sigillo mandavimus communiri. Datum Pragae anno domini millesimo trecentesitno quadragesimo octavo, indictione prima, Kalendas Julii, regnorum nostrorum anno secundo.

Source Fulltext: PANGERL, Goldenkron (=FRA II/37, Wien 1872) S. 105-106