Urbanus episcopus servus servorum dei dilecto filio . . scolastico ecclesiae Pragensis salutem et apostolicam benedictionem! Ad audientiam nostram pervenit, quod tam dilecti filii . . abbas et conventus monasterii Sanctae Coronae Pragensis diocesis quam praedecessores eorum decimas, terras, domos, possessiones, vineas, casalia, pistorias, prata, pascua, grangias, nemora, molendina, redditus, iura, iurisdictiones et quaedam alia bona ipsius monasterii [datis super hoc litteris confectis, exinde publicis instrumentis interpositis, iuramentis factis, renuntiationibus et poenis adiectis] in gravem ipsius monasterii laesionem nonnullis clericis et laicis [aliquibus eorum ad vitam, quibusdam vero ad non modicum tempus, et aliis perpetuo ad firmam vel sub censu annuum] concesserint, quorum aliqui super hiis litteras confirmationis in fornia communi a sede apostolica impetrasse dicuntur. Quia vero nostra interest super hoc de oportuno remedio providere, discretioni tuae per apostolica scripta mandamus, quatenus ea quae de bonis ipsius monasterii per concessiones huiusmodi alienata inveneris illicite vel distracta, non obstantibus litteris, instrumentis, iuramentis, renuntiationibus, poenis et confirmationibus supradictis, ad ius et proprietatem eiusdem monasterii legitime revocare procures, contradictores per censuram ecclesiasticam appellatione postposita compescendo. Testes autem qui fuerint nominati, si se gratia, odio vel timore subtraxerint, censura simili appellatione cessante compellas veritati testimonium perhibere. Datum Romae apud sanctam Mariamm (sic) trans Tiberim, Idus Januarii, pontificatus nostri anno primo.||
Auf dem Umbug: . T. Curre.||
Unter demselben rechts: = A. de Gaieta.||
Auf der Rückseite: Conradus Duszenauwe . . .

Source Fulltext: PANGERL, Goldenkron (=FRA II/37, Wien 1872) S. 155-156