In nomine domini amen. Pridem sanctissimus in Christo pater et dominus noster dominus Bonifacius divina providentia papa nonus causam et causas appellatione interposita pro parte honorabilis viri domini Johannis Benessii praepositi ecclesiae sancti Petri Wissegradensis prope Pragam a quadam diffinitiva sententia per reverendum patrem dominum Nicolaum de Vivianis electum Potentinum sacrique palatii apostolici causarum auditorem pro venerabilibus et religiosis viris dominis abbate et conventu monasterii Sanctae Coronae ordinis Cisterciensis Pragensis diocesis et contra dictum dominum Johannem praepositum lata in causa et causis, quae coram eodem domino Nicolao electo et auditore vertebantur inter dictos dominos abbatem et conventum ex una et praefatum dominum Johannem praepositum de et super quibusdam villis, iurisdictionibus, silvis, terris, possessionibus et rebus aliis in huiusmodi causa deductis et eorum occasione parte ex altera, nobis Jacobo Floriani decretorum doctori decano ecclesiae Gneznensis dicti domini nostri papae capellano et dicti palatii causarum auditori commisit audiendam, decidendam et fine debito terminandam cum omnibus et singulis emergentibus, incidentibus, dependentibus et annexis. Huiusmodi siquidem nobis factae et praesentatae commissionis vigore nos Jacobus auditor praefatus in causa et causis huiusmodi et inter partes praedictas seu earum legitimos procuratores ad discreti viri magistri Roteri de Balhorn in Romana curia et dictorum dominorum abbatis et conventus monasterii Sanctae Coronae principalium in dicta nobis facta commissione principaliter nominatorum procuratoris instantiam provido viro magistro Johanni de Scrinanis in dicta curia et praefati domini Johannis praepositi ex adverso principalis etiam in dicta nobis facta commissione principaliter descripto procuratori, de quorum procurationum mandatis nobis in et ex actis causae et causarum huiusmodi legitimis constabat et constat documentis, ad diccndum et opponendum, quicquid verbo vel in scriptis dicere vel opponere volebat contra dictam nobis factam et .praesentatam commissionem certum peremptorium terminum competentem duximus praefigendum et praefiximus. In quo comparens iudicialiter coram nobis magister Johannes de Scrinanis procurator praedicto quo supra nomine et contra dictam nobis factam commissionem quasdam exceptiones verbales et generales exhibuit atque dedit. Nos deinde ad dicti magistri Roteri de Balhorn procuratoris instantiam magistrum Johannem de Scrinanis procuratorem ex adverso praedictum ad dandum et recipiendum, darique et recipi videndum libellum sive petitionem summariam in huiusmodi causa per certum dicti domini nostri papae cursorem citari mandavimus peremptorie et fecimus ad certum peremptorium terminum competentem, quem dicto magistro Rotero petenti partique suae statuimus tunc ad idem. Quo adveniente termino et in eodem coram nobis iudicialiter comparente, magistro Rotero de Balhorn procuratore praedicto quo supra nomine et dicti magistri Johannis de Scrinanis procuratoris ex adverso non comparentis neque aliquem libellum sive petitionem summariam in huiusmodi causa dare aut dari videre curantis contumaciam accusante, ipsumque contumacem reputari per nos instanter postulante, in ipsius contumaciam termino huiusmodi satisfaciente quendam libellum sive petitionem summariam in huiusmodi causa pro parte sua facto realiter et in scriptis exhibente, cuius tenor sequitur et est talis: ,Procurator et procuratorio nomine venerabilium et religiosorum virorum dominorum abbatis et conventus monasterii Sanctae Coronae ordinis Cisterciensis petit per vos venerabilem et circumspectum virum dominum Jacobum Floriani sacri palatii apostolici et huiusmodi causae auditorem ac vestram sententiam diffinitivam pronuntiari, decerni et declarari per reverendum patrem dominum Nicolaum de Vivianis electum Potentinum coauditorem vestrum alias in huiusmodi causa bene et legitime fuisse et esse processum, sententiatum et diffinitum, eiusdemque sententiam confirmandam fore et per vos confirmari, ab ipsoque reverendo patre domino Nicolaio electo et eius sententia pro parte domini Johannis Benessii praepositi ecclesiae sancti Petri Wissegradensis prope Pragam adversarii in hac causa male fuisse et esse appellatum, ipsumque dominum Johannem Benessii praepositum praedictum in expensis in hac instantia factis una cum fructibus a tempore dictae latae sententiae ex dictis bonis perceptis condempnandum fore et per vos condempnari de expensis faciendis et fructibus percipiendis, protestatur et alias in, de et super praemissis omnibus et singulis communiter et divisim sibi fieri petit iustitiae complementum, super ipsis etiam vestrum officium humiliter implorando, salvo iure addendi, minuendi corrigendi et alias si opus fuerit libellum de novo dandi etc. seu quolibet iuris beneficio sibi salvo et protestatur, ut fuit et est moris atque stili praedicti palatii apostolici causarum etc.‘ Quo sic oblato libello nos dictum magistrum Johannem de Scrinanis procuratorem non comparentem, terminoque praenotato minime satisfacientem, licet sufficienter expectatum reputavimus merito prout erat exigente iustitia contumacem, in ipsiusque contumaciam et ad supradicti magistri Roteri Balhorn procuratoris petitionem et instantiam magistrum Johannem de Scrinanis procuratorem ex adverso praedictum ad iurandum et deliberandum, iurarique et deliberari videndum de calumpnia vitanda et veritate dicenda cum singulis suis capitulis in et sub calumpniae iuramento contentis tam super dicto superius ut praemittitur oblato libello quam tota praesenti causa per unum ex dicti domini nostri papae cursoribus citari mandavimus peremptorie et fecimus ad certum diem condecentem, quam tunc ad idem dicto magistro Rotero procuratori petenti, partique suae curavimus assignare. In qua per dictum magistrum Roterum de Balhorn procuratorem quo supra nomine coram nobis iudicialiter comparentem neque calumpniae iuramentum in huiusmodi causa praestare aut praestari videre curante contumacia Johannis accusata, ipsumque per nos contumacem reputari postulato in ipsiusque contumaciam. Postquam idem magister Roterus procurator per nos admissus esset, statim ad mandatum nostrum et in nostris manibus tactis per eum manualiter scripturis sacrosanctis ad sancta dei evangelia de calumpnia vitanda cum omnibus et singulis capitulis in et sub iuramento calumpniae contentis et veritate dicenda tam super libello superius ut praefertur oblato quam tota praesenti causa corporale praestitit iuramentum. Quo sic iuramento praestito nos dictum magistrum Johannem de Scrinanis procuratorem non comparentem, terminoque praenotato minime satisfacere curantem debite tamen expectatum reputantes merito prout erat contumacem, in ipsiusque contumaciam eodem magistro Rotero procuratore instante et petente praefatum magistrum Johannem procuratorem ex adverso ad ponendum et articulandum, ponique et articulari videndum in huiusmodi causa per unum ex dicti domini nostri papae cursoribus citari fecimus ad certum peremptorium terminum competentem, quem dicto magistro Rotero procuratori petenti partique suae assignavimus tunc ad idem. In quo comparuerunt iudicialiter coram nobis magistri Roterus ex una et Johannes procuratores praedicti quibus supra nominibus parte ex altera et huiusmodi termino hincinde satisfaciendo omnes et singulos positiones et articulos pro partibus suis in huiusmodi causae prima et secunda instantiis datos hincinde repetierunt et de novo verbo reproduxerunt. Nos vero dictis magistris Rotero et Johanne procuratoribus hincinde quibus supra nominibus instantibus et petentibus ad dicendum et opponendum quicquid verbo vel in scriptis dicere vel opponere volebant contra dictos alterutriusque partis positiones et articulos hincinde ut praemittitur in huiusmodi causa repetitos et reproductos, si et in quantum articuli et respondendum eisdem si et quare positiones existerent et esse censerentur, certum peremptorium terminum competentem duximus hincinde praefigendum et praefiximus. In quo comparuit coram nobis magister Johannes de Scrinanis procurator praedictus quo supra nomine et satisfaciendo huiusmodi diei termino pro parte sua quasdam exceptiones facto et in scriptis certi tenoris contra positiones et articulos partis sibi adversae exhibuit et produxit. Nos tunc instante et petente dicto magistro Johanne de Scrinanis procuratore quo supra nomine praelibatum magistrum Roterum de Balhorn procuratorem ex adverso ad producendum et produci videndum omnia et singula iura, acta, actitata, litteras, scripturas, processus et cetera munimenta, quibus uti et se iuvare volebat in hac causa, per unum ex dicti domini nostri papae cursoribus citari mandavimus peremptorie et fecimus ad certum peremtorium terminum congruentem, quem tunc ad idem dicto magistro Johanni procuratori petenti, partique suae duximus statuendum. In quo comparentibus successive in iudicio coram nobis magistris Rotero de Balhorn ex una et Johanne de Scrinanis procuratoribus praedictis procuratoriis quibus supra nominibus parte ex altera et huiusmodi termino pro partibus suis hincinde satisfacientibus omnia et singula iura et munimenta in huiusmodi causae prima et secunda instantiis exhibita et praedicta hincinde repetentibus et de novo verbo reproducentibus, nos tunc ad supradicti magistri Johannis procuratoris petitionem et instantiam magistrum Roterum procuratorem ex adverso saepedictum ad dicendum et opponendum, quitquid verbo vel in scriptis dicere vel opponere volebat contra huiusmodi iura et munimenta sicut praemittur pro parte dicti magistri Johannis procuratoris repetita et reproducta, per certum dicti domini nostri papae cursorem citari mandavimus peremptorie et fecimus ad certum peremptorium terminum condecentem. In quo comparentes successive in iudicio coram nobis magistri Johannes de Scrinanis ex una et nonnullas exceptiones facto realiter et in scriptis contra producta partis sibi adversae exhibuit et produxit, nec non Roterus de Balhorn procuratores praedicti quibus supra nominibus parte ex altera huiusmodi termino hinc inde pro partibus suis satisfacientes omnes et singulas exceptiones in huiusmodi causae prima et secunda instantiis contra producta partis sibi adversae exhibitas atque datas hic repetierunt et easdem de novo reproduxerunt. Nos tunc ad eiusdem magistri Roteri procuratoris instantiam magistrum Johannem procuratorem ex adverso saepedictum ad declarandum et declarari videndum, quicquid verbo vel in scriptis declarare volebat in huiusmodi causa, per certum domini nostri papae cursorem citari mandavimas peremptorie et fecimus ad certum peremptorium terminum congruentem, quem dicto magistro Rotero procuratori petenti partique suae statuimus. Termino huiusmodi adveniente et in eodem successive per magistros Roterum ex una et de non volendo quicquam in praesenti causa pro parte sua declarare expresse protestato nec non per Johannem procuratores supradictos quibus supra nominibus parte ex altera coram nobis iudicialiter comparentes et huiusmodi termino hincinde satisfacientes quibusdam declarationibus facto realiter et in scriptis exhibitis et produetis, nos tunc ad dicti magistri Johannis de Scrinanis procuratoris instantiam magistrum Roterum de Balhorn procuratorem ex adverso praedictum ad dicendum et excipiendum, quicquid verbo vel in scriptis dicere vel excipere volebat, contra huiusmodi declarationes sicut praemittitur exhibitas atque datas per unum ex dicti domini nostri papae cursoribus citari mandavimus peremptorie et fecimus ad certum diem congruentem. In qua per dictum magistrum Roterum de Balhorn procuratorem quo supra nomine coram nobis iudicialiter comparentem nonnullis exceptionibus facto realiter et in scriptis contra declarationes partis sibi adversae ut praemittitur datas, exhibitas et productas, deindeque nonnullis positionibus et articulis una cum eorum declarationibus in huiusmodi causa per dictum dominum Johannem de Scrinanis procuratorem quo supra nomine successive facto et in scriptis exhibitis et productis et contra ipsum per dictum Roterum de Balhorn procuratorem nonnullis verbalibus et generalibus exceptionibus successive datis et formatis, habitisque in causa huiusmodi nonnullis aliis altercationibus coram nobis inter partes praedictas, tandem vero comparuit in iudicio coram nobis magister Roterus de Balhorn procurator praedictus quo supra nomine et praesente magistro Johanne de Scrinanis ex adverso procuratore praedicto et audiente per nos in praesenti causa concludi et pro concluso haberi per nos instanter postulavit. Nos autem tunc ad dicti magistri Roteri procuratoris petitionem et instantiam et una cum ipso concludente et statim concludi petente, praesente ut praefertur dicto magistro Johanne procuratore ex adverso et contradicente conclusimus et habuimus et habere volumus pro concluso in causa memorata. Subsequenter autem die et hora infrascriptis comparentibus in iudicio coram nobis magistro Rotero de Balhorn ex una et Johanne de Scrinanis procuratoribus praedictis procuratoriis nominibus quibus supra parte ex altera, idem vero magister Roterus procurator diffinitivam in hac causa pro se et parte sua iuxta et secundum supradictae suae petitionis superius insertae tenorem et formam et contra dictum magistrum Johannem procuratorem ibidem praesentem et non consentientem partemque suam fieri et promulgari sententiam per nos instanter postulavit. Nos igitur Jacobus auditor praefatus visis per nos primitus et diligenter inspectis omnibus et singulis actis, actitatis litteris, scripturis, processibus et ceteris munimentis in huiusmodi causa hincinde habitis, factis et productis, eisque cum diligentia et maturitate recensitis, de dominorum coauditorum nostrorum consilio et assensu, quibus de huiusmodi causae meritis relationem plenariam fecimus et fidelem, ac una cum eisdem maturis deliberationibus praehabitis ad nostram diffinitivam sententiam in huiusmodi causa proferendam in scriptis duximus procedendum et processimus, eamque secundum ea, quae vidimus et cognovimus et quae de praesenti videmus et cognoscimus, in scriptis tulimus et praesentibus ferimus in hunc qui sequitur modum. ,Christi nomine invocato pro tribunali sedentes et habentes prae oculis solum deum de dominorum nostrorum coauditorum consilio et assensu per hanc nostram diffinitivam sententiam quam ferimus in hiis scriptis pronuntiamus, decernimus et declaramus, per reverendurn patrem dominum Nicolaum electum Potentinum coauditorem nostrum alias in huiusmodi causa bene et legitime fuisse et esse processum, sententiatum et diffinitum, eiusdemque sententiam confirmandam fore et confirmamus, ab ipsoque domino Nicolaio electo et eius sententia pro parte domini Johannis Benessii praepositi ecclesiae sancti Petri Wissegradensis prope Pragam adversarii in hac causa male fuisse et esse appellatum, ipsumque dominum Johannem Benessii in expensis in hac instantia coram nobis legitime factis ac in fructibus ex dictis bonis a tempore dictae sententiae perceptis condempnandum fore et condempnamus, quarum expensarum nobis taxationem imposterum reservamus.‘ Lecta, lata et in scriptis promulgata fuit haec praesens nostra diffinitiva sententia per nos Jacobum auditorem praefatum Romae apud sanctum Petrum in palatio causarum apostolico, in quo iura reddi solent, nobis inibi mane hora causarum ad iura reddendum in loco nostro solito pro tribunali sedentibus, sub anno a nativitate domini millesimo trecentesimo nonagesimo quarto, indictione secunda, die Veneris vicesima septima mensis Novembris, pontificatu sanctissimi in Christo patris et domini nostri domini Bonifacii divina providentia papae noni praedicti anno sexto, praesentibus ibidem discretis viris magistris Johanne de Loen et Bartholomaeo Johannis de Swecza notariis publicis scribisque nostris clericis Coloniensis et Wladislaviensis dioceseum, testibus ad praemissa vocatis specialiter et rogatis. Postremo vero nos ad dicti magistri Roteri de Balhorn procuratoris coram nobis iudicialiter comparentis instantiam magistrum Johannem de Scrinanis procuratorem ex adverso praedictum ad videndum et audiendum expensas pro parte sua in huiusmodi causa factas taxari et moderari vel dicendum et causam, si quam habebat rationabilem allegandi quare huiusmodi expensae taxari et moderari non debebant, per certum dicti domini nostri papae cursorem citari mandavimus peremptorie et fecimus ad certum peremptorium terminum competentem, videlicet ad diem et horam inferius annotatas quas etiam eidem magistro Rotero procuratori petenti, partique suae statuimus tunc ad idem. Hiis itaque advenientibus et in eisdem coram nobis iudicialiter comparente magistro Rotero de Balhorn procuratore praedicto quo supra nomine et dicti magistri Johannis de Scrinanis procuratoris non comparentis neque expensas supradictas per nos taxari et moderari videre, neque causam rationabilem si quam habebat, quare huiusmodi expensae minime taxari et moderari debebant, allegare curantis contumaciam accusante, ipsumque contumacem reputari petente, et in ipsius contumaciam expensas supradictas per nos taxari et moderari debita cum instantia postulante, nos autem Jacobus auditor praefatus dictum magistrum Johannem de Scrinanis procuratorem non comparentem neque huiusmodi termino in aliquo satisfacere curantem licet tamen sufficienter et usque ad horam debitam expectatum reputavimus merito prout erat exigente iustitia contumacem in ipsius contumaciam expensas supradictas ad quadraginta florenos de camera dicti domini nostri papae boni auri et iusti ponderis per praefatum dominum Johannem Benessii principalem supradictis dominis abbati et conventui monasterii Sanctae Coronae ex adverso principalibus seu eorum legitimo procuratori solvendos et tradendos fore realiter et cum effectu, ratione et occasione expensarum praedictarum provida moderatione praehabita in scriptis taxavimus et taxamus per praesentes, recepto tamen primitus ab eodem magistro Rotero procuratore et per ipsum ad mandatum nostrum et in manibus nostris tactis per eum manualiter scripturis sacrosanctis ad sancta dei evangelia corporali praestito iuramento, se tantum et ultra expendidisse seu necessario expendere habere in et pro lite et causa antedictis. In quorum omnium et singulorum fidem et testimonium praesentes nostrarum diffinitivae sententiae et taxationis expensarum litteras seu praesens publicum instrumentum huiusmodi nostras diffinitivam sententiam et expensarum taxationem in se continentes seu continens exinde fieri et per Bartholomaeum notarium publicum nostrumque scribam et huiusmodi causae coram nobis scribam infrascriptum subscribi et publicari mandavimus, nostrique sigilli iussimus appensione muniri. Taxatae vero fuerunt huiusmodi expensae per nos Jacobum auditorem praefatum curiae in palatio causarum apostolico praedicto nobis inibi mane hora causarum ad iura reddendum in loco nostro solito pro tribunali sedentibus, sub anno, indictione et pontificatu quibus supra die Mercurii secunda mensis Decembris, praesentibus ibidem supradictis magistris Johanne de Loen et Bartholomaeo Johannis notariis publicis supradictis, testibus ad praemissa vocatis specialiter et rogatis.||
Signum Tabellionatus||
Et ego Bartholomaeus Mathei de Chotow clericus Gneznensis diocesis publicas apostolica et imperiali auctoritatibus notarius ac venerabilis et circumspecti domini Jacobi Floriani auditoris praefati et huiusmodi causae coram eo scriba praedictae sententiae diffinitivae per dictum dominum auditorem prolationi et promulgationi, expensarumque taxationi omnibusque aliis et singulis praemissis dum sic ut praemittitur per praefatum dominum auditorem agerentur et fierent, una cum praenominatis testibus praesens interfui, eaque omnia et singula sic fieri vidi et audivi. Et quia occupatus diversis aliis negotiis per alium fideliter scribere et ingrossari feci et me huic propria manu subscribens de mandato dicti domini auditoris in hanc formam publicam redegi, signoque quo apostolica auctoritate et nomine meis solitis et consuetis circa talibus (sic) utor, una cum appensione sigilli dicti domini auditoris consignavi rogatus et requisitus in fidem et testimonium omnium praemissorum.

Source Fulltext: PANGERL, Goldenkron (=FRA II/37, Wien 1872) S. 255-264